༄༅། །རྒྱ་གར་རྒྱལ་ཡོངས་གྲངས་ཉུང་མི་རིགས་ལྷན་ཚོགས་ཀྱི་ཚོགས་མི་རིན་ཆེན་ལྷ་མོ་ལགས་ཤི་ལོང་ཁུལ་དུ་གཞུང་འབྲེལ་འཚམས་གཟིགས་སུ་ཕེབས་ཡོད།

དེ་ཡང་ཁོང་མོ་གནམ་ཐང་དུ་ཕེབས་འབྱོར་མཚམས་ཤི་ལོང་ས་གནས་འགོ་འཛིན་པདྨ་དོན་གྲུབ་ལགས་དང་། ཕྱོགས་བཞུགས་སྤྱི་འཐུས་ཚེ་རིང་སྒྲོལ་མ་ལགས། མཁན་པོ་ངག་དབང་དཔལ་ལྡན་ལགས། ཤི་ལོང་ནང་པ་ཚོགས་པའི་དྲུང་ཆེ་ཨ་རུབ་ལགས་སོགས་ཕེབས་བསུར་བཅར་ཡོད་པ་རེད།དེ་རྗེས་ལྕམ་རིན་ཆེན་ལྷ་མོ་ལགས་ཤི་ལོང་ས་གནས་འགོ་འཛིན་ལས་ཁུངས་སུ་ཕེབས་ཏེ་ས་གནས་བོད་མི་རྣམས་དང་མཇལ་འཕྲད་དང་། བོད་མི་རྣམས་ཀྱིས་བོད་ཀྱི་རིག་གཞུང་དང་ངོ་བོ་སྲུང་སྐྱོབ་ཐད་སྐུ་ལས་བསྐྱོན་དང་སྐྱོན་བཞིན་པར་བསྔགས་བརྗོད་གནང་ཡོད། དེ་བཞིན་ཁོང་མོས་ཆོས་ལུགས་འདྲ་མིན་གྱི་དབུ་ཁྲིད་དང་མཇལ་འཕྲད་གནང་སྟེ་རྒྱལ་ཡོངས་གྲངས་ཉུང་མི་རིགས་ལྷན་ཚོགས་ཀྱི་དམིགས་ཡུལ་དང་། གྲངས་ཉུང་མི་རིགས་ཀྱི་ཁེ་ཕན་གྱི་ལས་འཆར་ཁག་ངོ་སྤྲོད་དང་། གྲངས་ཉུང་མི་རིགས་ཀྱི་ངལ་སེལ་བདེ་ཐབས་ཆེད་མུ་མཐུད་སྐུ་ལས་བསྐྱོན་རྒྱུ་ཡིན་པའི་ཞལ་བཞེས་གནང་ཡོད་པ་བཅས།།