༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༣༠ ཉིན་ལྡི་ལི་སྐུ་ཚབ་དོན་ཁང་དུ་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་རྒྱལ་ཡོངས་དང་ས་གནས་འབྲེལ་མཐུད་པའི་ཚོགས་འདུ་བསྐོང་ཚོགས་གནང་ཡོད། 

ཐེངས་འདིའི་ཚོགས་འདུའི་གཙོ་སྐྱོང་རྒྱ་གར་བོད་དོན་རྒྱབ་སྐྱོར་ཚོགས་པ་སྡེ་ཚན་ནང་མའི་རྒྱལ་ཡོངས་འབྲེལ་མཐུད་པ་སྐུ་ཞབས་རིན་ཆེན་མཁའ་འགྲོ་ཁི་རི་མེ་ལགས་ཀྱིས་གནང་ཞིང་། ཚོགས་འདུའི་ནང་ལྡི་ལི་དོན་ཁང་གི་དྲུང་ཆེ་དོན་གྲུབ་རྒྱལ་པོ་ལགས་དང་། རྒྱལ་ཡོངས་འབྲེལ་མཐུད་པ་གཞོན་པ་སྐུ་ཞབས་སུ་རེནྡྲ་ཀུ་མཱར་ལགས་དང་སྐུ་ཞབས་ཨར་བིན་ནི་ཀོས་ལགས། གཞན་ཡང་འཕགས་བོད་འབྲེལ་མཐུད་ལས་ཁུངས་ཀྱི་ལས་བྱེད་སོགས་མཉམ་ཞུགས་གནང་ཡོད། ཐོག་མར་འཕགས་བོད་འབྲེལ་མཐུད་ལས་ཁུངས་ཀྱི་ལས་ཚབ་འབྲེལ་མཐུད་པ་བསྟན་འཛིན་འབྱོར་ལྡན་ལགས་ཀྱིས་མཉམ་ཞུགས་པ་རྣམས་ལ་ཕེབས་བསུ་དང་སྦྲགས་ཚོགས་འདུའི་གྲོས་གཞི་ཁག་ངོ་སྤྲོད་གནང་གྲུབ་མཚམས་སྐུ་ཞབས་རིན་ཆེན་མཁའ་འགྲོ་ཁི་རི་མེ་ལགས་ཀྱིས་ངོ་སྤྲོད་གསུང་བཤད་གནང་སྟེ། ཁོང་གིས་ད་ལྟའི་རྒྱ་གར་དང་བོད། རྒྱ་ནག་གསུམ་གྱི་གནས་སྟངས་ངོ་སྤྲོད་དང་འབྲེལ་ཚོགས་མི་རྣམས་ནས་བོད་ཀྱི་རང་དབང་འཐབ་རྩོད་ཆེད་ད་ཆ་སྔར་བར་འབད་འབུངས་རྒྱ་ཆེ་གནང་དགོས་པའི་རེ་སྐུལ་ཞུས་པ་མ་ཟད། ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགུང་གྲངས་བརྒྱ་ལྷག་བཞུགས་རྒྱུའི་ཞལ་བཞེས་བཟང་པོ་ཐོབ་པའི་སྐོར་ཚོགས་མི་རྣམས་ལ་ངོ་སྤྲོད་གནང་ཡོད་པ་རེད།དེ་ནས་ལྡི་ལི་དོན་ཁང་གི་དྲུང་ཆེ་དོན་གྲུབ་རྒྱལ་པོ་ལགས་ཀྱིས་འདས་པའི་ལོ་ངོ་དྲུག་བཅུ་ལྷག་རིང་རྒྱ་གར་གཞུང་དམངས་གཉིས་ནས་བོད་མིར་རྒྱབ་སྐྱོར་གཡོ་མེད་གནང་བར་ཐུགས་རྗེ་ལེགས་འབུལ་ཞུས་པ་དང་ཆབས་ཅིག འཕགས་བོད་གཉིས་ཀྱི་གནའ་དེང་གི་འབྲེལ་ལམ་ངོ་སྤྲོད་དང་། རྒྱ་གར་བོད་དོན་རྒྱབ་སྐྱོར་ཚོགས་མི་རྣམས་ནས་བོད་ལ་རྒྱབ་སྐྱོར་ཟོལ་མེད་གནང་བར་ཐུགས་རྗེ་ཆེ་ཞུས་ཡོད། 

ཚོགས་འདུའི་ཐོག་ཚོགས་མི་རྣམས་ནས་ཕྱི་ལོ་ ༢༠༢༡ ལོའི་ཚོགས་འདུའི་གྲོས་ཆོད་ཁག་ལག་བསྟར་ཐུབ་མིན་དང་། ཚོགས་མི་སོ་སོས་ལས་འགུལ་ཇི་སྤེལ་ཐད་བགྲོ་གླེང་དང་། གཙོ་བོ་འདི་ལོར་ཚོགས་གཏན་ཁེལ་བའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཐེངས་བདུན་པའི་སྐོར་གྲོས་སྡུར་གླེང་མོལ་དང་འཆར་གཞི་འཆར་འགོད་གནང་ཡོད་པ་རེད། ཕྱོགས་མཚུངས་རྒྱ་གར་བོད་དོན་རྒྱབ་སྐྱོར་བ་དང་མི་མང་བར་འབྲེལ་བ་མཐུད་རྒྱུ་གནད་འགག་ཆེ་བས་ཚོགས་མི་རྣམས་ནས་དེ་འབྲེལ་རྒྱ་གར་མི་མང་དང་འབྲེལ་བ་མཐུད་ཐབས་ཀྱི་འཆར་གཞི་བཟོ་འགོད་གནང་ཡོད། 

མཛད་སྒོའི་མཐའ་མར་འཕགས་བོད་འབྲེལ་མཐུད་ལས་ཁུངས་ཀྱི་ལས་འཆར་འགན་འཛིན་ཆོས་ཉིད་ཚེ་རིང་ལགས་ཀྱིས་ཐུགས་རྗེ་ཆེ་ཞུའི་གཏམ་བཤད་གནང་སྟེ་མཛད་སྒོ་ལེགས་པར་གྲོལ་ཡོད་པ་བཅས།།