༄༅། །རྒྱ་གར་བོད་དོན་རྒྱབ་སྐྱོར་ཚོགས་པའི་ (Bharat Tibbat Samanvay Sangh) ལྡི་ལི་ཡན་ལག་ལས་ཁུངས་ཀྱི་བུད་མེད་སྡེ་ཚན་གྱི་ཚོགས་མི་གསར་པ་རྣམས་ནས་ཕྱི་ལོ་ ༢༠༢༢ ཟླ་བ་ ༠༥ ཚེས་ ༢༥ ཉིན་ལྡི་ལི་གསར་པར་ཚོགས་འདུ་བསྐོང་ཚོགས་གནང་ཡོད། 

སྐབས་དེར་མགྲོན་འབོད་ལྟར་འཕགས་བོད་འབྲེལ་མཐུད་ལས་ཁུངས་ཀྱི་ལས་ཚབ་འབྲེལ་མཐུད་པ་བསྟན་འཛིན་འབྱོར་ལྡན་ལགས་དང་། ལས་འཆར་འགན་འཛིན་ཆོས་ཉིད་ཚེ་རིང་ལགས་ཚོགས་འདུར་མཉམ་ཞུགས་གནང་ཡོད་པ་རེད། དེ་ཡང་ཐོག་མར་ལྕམ་སན་དེཡ་སིངྒ་ལགས་ཀྱིས་ཚོགས་མི་རྣམས་ལ་ཕེབས་བསུ་དང་སྦྲགས་ཚོགས་འདུའི་དགོས་དམིགས་ངོ་སྤྲོད་དང་། རྒྱ་གར་བོད་དོན་རྒྱབ་སྐྱོར་ཚོགས་པའི་ངོས་ནས་ཁོང་མོར་དེ་ལྟ་བུའི་ལས་འགན་གནང་བར་ཐུགས་རྗེ་ལེགས་འབུལ་དང་། དེ་བཞིན་འབྱུང་འགྱུར་ཁོང་གིས་རང་ཁུར་ལས་འགན་ལྷག་བསམ་རྣམ་དག་གིས་བསྒྲུབ་རྒྱུ་ཡིན་པ་དང་ཚོགས་མི་རྣམས་ནས་ཀྱང་དེ་ལྟར་གནང་བའི་རེ་སྐུལ་ཞུས་ཡོད། 

ཚོགས་འདུའི་ཐོག་ཚོགས་མི་གསར་པ་རྣམས་ནས་རང་ཉིད་ངོ་སྤྲོད་དང་། ཚོགས་པར་འཛུལ་ཞུགས་བྱ་དགོས་པའི་དམིགས་ཡུལ་འགྲེལ་བརྗོད་གནང་བ་འབྲེལ། ཁོང་རྣམས་ལ་ཚོགས་པའི་དམིགས་ཡུལ་གཙོ་བོ་གསུམ་སྟེ། བོད་ཀྱི་རང་དབང་བསྐྱར་གསོ་དང་། གངས་རིན་པོ་ཆེ་དང་མ་ཕམ་གཡུ་མཚོ་རྒྱའི་བཙན་དབང་ནས་ཐར་གྲོལ་གཏང་རྒྱུ། རྒྱ་ནག་དང་འབྲེལ་ཐག་གཅད་རྒྱུ་བཅས་ཀྱི་སྐོར་ངོ་སྤྲོད་གནང་ཡོད། སྐབས་དེར་འཕགས་བོད་འབྲེལ་མཐུད་ལས་ཁུངས་ཀྱི་ལས་བྱེད་ཆོས་ཉིད་ཚེ་རིང་ལགས་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་ངོ་སྤྲོད་གནང་བཞིན། རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་གཏོང་བཞིན་པའི་སྐོར་དང་། བོད་ཀྱི་ཆོས་དང་རིག་གཞུང་། ཁོར་ཡུག་རྩ་གཏོར་གཏོང་ཚུལ། ད་བར་བོད་མི་གྲངས་ ༡༥༧ ནས་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་བའི་སྐོར་སོགས་ཚོགས་མི་རྣམས་ལ་ངོ་སྤྲོད་གནང་ཡོད་པ་རེད། 

གཞན་ཡང་ཚོགས་འདུའི་ཐོག་རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱུན་ལས་པྲ་ཡཱག་ཇུ་ཡཱལ་ལགས་དང་། དི་ནེཤ་པྲ་ཏཱཔ། བྷི་ཨར་ཀུག་རེ་ཏི་ལགས། སུ་མི་ཏྲ་ཀུག་རེ་ཏི་ལགས། ཀུ་ཎཱལ་ཡཱ་དབ་ལགས་སོགས་ཕེབས་ཡོད་པ་བཅས།།