༄༅། །ཕྱི་ལོ་ ༢༠༢༢ ཟླ་བ་ ༠༤ ཚེས་ ༢༩ ཉིན་རྒྱ་གར་བོད་དོན་རྒྱབ་སྐྱོར་ཚོགས་པའི་ (Bharat Tibbat Samanvay Sangh) སྤྱི་ཁྱབ་འགན་འཛིན་ཧ་མེནྡྲ་སིངྒ་ཏོ་མར་མཆོག་གིས་གཙོས་དམིགས་བསལ་སྐུ་ཚབ་ཚོགས་ཆུང་ཞིག་གིས་རྒྱ་གར་གྱི་སྲིད་འཛིན་སྐུ་ཞབས་རཱམ་ནཱཐ་ཀོ་བིནྡ་མཆོག་དང་མཇལ་འཕྲད་ཞུས་འདུག 

མཇལ་འཕྲད་སྐབས་སྐུ་ཚབ་ཚོགས་ཆུང་ངོས་ནས་སྲིད་འཛིན་སྐུ་ཞབས་ཀོ་བིནྡ་མཆོག་ལ་རྒྱ་གར་བོད་དོན་རྒྱབ་སྐྱོར་ཚོགས་པའི་ (BTSS) དམིགས་ཡུལ་དང་ལས་དོན་བྱེད་ཕྱོགས་སྐོར་ངོ་སྤྲོད་དང་འབྲེལ། དོན་ཚན་བདུན་ཅན་གྱི་ཞུ་སྐུལ་ཞིག་ཕུལ་འདུག་ཅིང་། དེ་ཉིད་ཚོགས་པའི་སྤྱི་ཁྱབ་འགན་འཛིན་ཧ་མེནྡྲ་སིངྒ་ཏོ་མར་མཆོག་གིས་ལྗགས་ཀློག་གནང་།  སྲིད་འཛིན་སྐུ་ཞབས་རཱམ་ནཱཐ་ཀོ་བིནྡ་མཆོག་གིས་དོན་ཚན་དེ་དག་ལ་ལེགས་པར་གསན་རྗེས་དོན་ཚན་དེ་དག་འབྲེལ་ཆགས་ལས་ཁུངས་སོ་སོར་གཏང་རྒྱུ་ཞལ་བཞེས་གནང་ཞིང་། ཁོང་གིས་དོན་ཚན་དེ་དག་ལས་རེ་འགའ་ཕྱི་འབྲེལ་ལྷན་ཁང་དང་། ཁ་ཤས་བདེ་སྲུང་ལྷན་ཁང་དང་འབྲེལ་བ་འདུག་པས་ལྷན་ཁང་དེ་དག་ལ་ཁོང་གིས་རྒྱབ་གཉེར་བཅས་བསྐུར་རྒྱུ་ཡིན་ཞེས་གསུངས། སྐར་མ་ཉི་ཤུ་རྩ་ལྔའི་མཇལ་མོལ་སྐབས་རྒྱ་གར་བོད་དོན་རྒྱབ་སྐྱོར་ཚོགས་པ་དང་བོད་དང་གངས་རིན་པོ་ཆེའི་སྐོར་བགྲོ་གླེང་ལྷུག་པོ་གནང་ཞིང་། སྐབས་དེར་སྲིད་འཛིན་སྐུ་ཞབས་ཀོ་བིནྡ་མཆོག་གིས་གནད་དོན་དེ་དག་རྒྱ་ཆེ་མང་ཚོགས་ལ་གོ་རྟོགས་སྤེལ་དགོས་པ་མ་ཟད། གཞོན་སྐྱེས་ཀྱི་ནུས་པ་སྟོན་དགོས་པའི་དགོངས་ཚུལ་གསུངས། དེ་བཞིན་ཁོང་གིས་ཚོགས་པས་དམིགས་ཡུལ་རྒྱ་ཆེན་པོ་བཟུང་ནས་ལས་དོན་གཉེར་བཞིན་པ་མ་ཟད། ཚོགས་པ་དེར་རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པའི་ (RSS) ཚོགས་མི་རྒན་པ་དང་། རྒྱ་གར་གྱི་སྲིད་དོན་ཚོགས་པ་བྷི་ཇེ་པིའི་སྒྲིག་འཛུགས་དྲུང་ཆེ། མངའ་སྡེའི་སྲིད་སྐྱོང་ཟུར་པ་སྐུ་ཞབས་ཀཔྟཱན་སིངྒ་སོ་ལཾ་ཀཱི་མཆོག་གིས་དབུ་ཁྲིད་གནང་བཞིན་པར་ལེགས་གསོལ་བསྔགས་བརྗོད་གནང་། 

དོན་ཚན་བདུན་ཅན་གྱི་ཞུ་སྐུལ་ནང་ཕྱི་ལོ་ ༡༩༦༢ ཟླ་བ་ ༡༡ ཚེས་ ༡༤ ཉིན་རྒྱ་གར་གྲོས་ཚོགས་གོང་འོག་གཉིས་ཀས་རྒྱ་ནག་གིས་བཙན་བཟུང་བྱས་པའི་རྒྱ་གར་གྱི་ས་ཆ་གང་ཡིན་པ་རྣམས་ཕྱིར་ལེན་དགོས་པའི་གྲོས་ཆོད་བཞག་པ་ལྟར། ད་ཆ་ལོ་ངོ་ ༦༠ རྗེས་དབུས་གཞུང་ནང་དབང་ཤུགས་ཆེ་བའི་གཞུང་འཛིན་ཚོགས་པ་ཡོད་པས་དབུས་གཞུང་ངོས་ནས་གོང་གསལ་གྲོས་ཆོད་དོན་སྨིན་ཡོང་ཐབས་གནང་དགོས་པ་དང་། རྒྱ་གར་དབུས་གཞུང་གིས་རྒྱ་ནག་གཞུང་དང་གྲོས་མོལ་གྱིས་གངས་རིན་པོ་ཆེ་དང་མ་ཕམ་གཡུ་མཚོར་གནས་མཇལ་སྐྱོད་མཁན་གྱི་ཁ་གྲངས་སྤར་དགོས་པ་མ་ཟད། གནས་མཇལ་བ་དེ་དག་ལ་རྒྱ་ནག་གཞུང་གིས་གནས་ཡོན་ག་ཚོད་བསྡུས་པ་རྒྱ་གར་གཞུང་ངོས་ནས་དངུལ་འབབ་ཕྱིར་སློག་གནང་དགོས་པ་དང་། ཕྱི་ལོ་ ༡༩༩༣ དང་། ༡༩༩༦ ལོར་རྒྱ་གར་གཞུང་དང་རྒྱ་ནག་དམར་ཤོག་གཞུང་གཉིས་བར་བཞག་པའི་གྲོས་མཐུན་དེ་དག་ཕྱིར་འཐེན་གནང་དགོས། གང་ཡིན་ཞེ་ན། གྲོས་མཐུན་གཉིས་ཀའི་ནང་དོན་ལྟར་ན་རྒྱ་གར་གྱི་དམག་མི་རྣམས་བོད་ཀྱི་ས་མཚམས་སུ་རྒྱ་ནག་གི་དམག་མིའི་མདུན་མཚོན་མ་ཐོགས་པར་སྡོད་དགོས་ཀྱི་ཡོད། 

བོད་ཀྱི་གསོ་རིག་སྨན་དང་འབྲེལ་ནས་རྒྱ་གར་གཞུང་གིས་བོད་ཀྱི་གསོ་བ་རིག་པའི་ཕན་ཡོན་དང་། གཞུང་གི་ཡོང་འབབ་ལ་དགོངས་བཞེས་ཀྱིས་དེ་ཉིད་རྒྱ་གར་གཞུང་གིས་སྲོལ་རྒྱུན་སྨན་(AYUSH) ཁོངས་སུ་ངོས་འཛིན་གནང་དགོས་པ་དང་། བོད་ཀྱི་ས་མཚམས་ཀྱི་ངོ་བོ་དང་ངོས་འཛིན་མ་བརླག་པའི་ཆེད་དུ་འཕགས་བོད་ས་མཚམས་ཞེས་ལས་རྒྱ་དཀར་ནག་གི་ས་མཚམས་ཞེས་མི་འབྲི་བའམ་མི་འབོད་རྒྱུ། གང་ལགས་ན། ལོ་རྒྱུས་ནང་རྒྱ་ནག་ནམ་ཡང་ང་ཚོའི་ཁྱིམ་མཚེས་རྒྱལ་ཁབ་མིན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བྷ་རཏ་རཏྣ་ཞེས་པའི་གཟེངས་རྟགས་དབུལ་དགོས་པ་དང་། བོད་མི་རྣམས་ལ་རྒྱ་གར་མི་སེར་ལག་ཁྱེར་སྤྲོད་དགོས། ཞེས་འཁོད་འདུག 

མཐར་རྒྱ་གར་བོད་དོན་རྒྱབ་སྐྱོར་ཚོགས་པ་ (BTSS) ངོས་ནས་སྲིད་འཛིན་སྐུ་ཞབས་ཀོ་བིནྡ་མཆོག་ལ་དྲན་རྟེན་ཞིག་དང་ཚོགས་པའི་བརྙན་དེབ་ (SHIVBODHI) དེ་བཞིན་བདེ་སྲུང་བློན་ཆེན་རཱཇ་ནཱཐ་སིངྒ་མཆོག་གི་སྐོར་བྲིས་པའི་ཕྱག་དེབ་སོགས་ཕུལ་འདུག 

ཐེངས་འདིའི་མཇལ་འཕྲད་ཀྱི་སྐུ་ཚབ་ཚོགས་ཆུང་ནང་ (BTSS) ཚོགས་པའི་སྤྱི་ཁྱབ་འགན་འཛིན་སྐུ་ཞབས་ཧ་མེནྡྲ་སིངྒ་ཏོ་མར་ལགས་དང་། རྒྱལ་ཡོངས་སྤྱི་ཁྱབ་དྲུང་ཆེ་སྐུ་ཞབས་ཨར་བིཾད་ཀེ་ས་རཱི་ལགས་དང་སྐུ་ཞབས་བི་ཇ་ཡ་མཱན་ལགས། དངུལ་གཉེར་སྐུ་ཞབས་ཨ་ཇཱིཏ་ཨ་གྲ་བཱལ་ལགས། རྒྱལ་ཡོངས་གཞོན་སྐྱེས་འགན་འཛིན་སྐུ་ཞབས་ནཱི་རཇ་སིངྒ་ལགས། དྲུང་ཆེ་ནཱ་རེནྡྲ་སིངྒ་ཅཻ་ཧཱན་ལགས་བཅས་ཡོད།།