༄༅། །ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་ཕྱི་ལོ་ ༢༠༢༢ ཟླ་བ་ ༠༥ ཚེས་ ༡༧ ཉིན་ཏོག་དབྱིབས་གཉན་རིམས་ཁྱབ་བརྡལ་སོང་བའི་ལོ་གཉིས་རྗེས་ངོ་ཐུག་ཚོགས་འདུ་ཐོག་མ་དེ་བསྐོང་ཚོགས་ཀྱིས་བོད་དོན་དང་འབྲེལ་བའི་གནད་དོན་ཁག་གི་ཐོག་བགྲོ་གླེང་གནང་ཡོད། 

དེ་ཡང་ཐེངས་འདིའི་ཚོགས་འདུ་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མི་ཀུ་ལ་ས་པེག་ས་ ( Mikulas Peksa) ལགས་ཀྱིས་གཙོ་སྐྱོང་གནང་ཞིང་། སྐབས་དེར་ལི་ཐུ་ནི་ཡཱ་ནས་ཀོས་ར་མལ་དྷི་ཀི་ནི་ (AusraMaldeikiene) ལགས་དང་། ཕ་རཱན་སི་ནས་ས་ལི་མ་ཡེན་བྷོ་ (Salima Yenbou) ལགས། ཡུ་རོབ་གྲོས་ཚོགས་འཐུས་མིའི་ལས་བྱེད། བེལ་ཇམ་སྐུ་ཚབ་དོན་གཅོད་གསར་རྙིང་། རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་བཅས་མཉམ་ཞུགས་གནང་ཡོད་པ་རེད། 

ཐོག་མར་གཙོ་སྐྱོང་བས་སྐུ་མགྲོན་རྣམས་ལ་ཕེབས་བསུ་དང་སྦྲགས། ད་ཆ་ཏོག་དབྱིབས་གཉན་རིམས་ཀྱི་བཀག་རྒྱ་ལྷོད་དུ་ཕྱིན་པས་ལས་དོན་མང་བ་བརྩམ་རྒྱུའི་གོ་སྐབས་ཐོབ་ངེས་ཡིན་ཞེས་དང་། དེ་སྔ་ཏོག་དབྱིབས་གཉན་རིམས་ཁྱབ་བརྡལ་ཆེ་བའི་སྐབས་སུའང་ཚོགས་པས་ལས་དོན་སྣ་མང་བརྩམས་ཡོད་པ་དང་ལས་དོན་ཇི་བརྩམས་མཉམ་ཞུགས་པ་རྣམས་ལ་སྙན་སེང་ཞུས་ཡོད། དེ་རྗེས་སྐུ་ཚབ་དོན་གཅོད་རྙིང་པ་བཀྲ་ཤིས་ཕུན་ཚོགས་ལགས་ཀྱིས་བོད་དོན་དང་འབྲེལ་བའི་གནས་ཚུལ་གསར་པ་ཇི་ཐོན་ངོ་སྤྲོད་དང་། ད་ལྟ་ཨུ་རུ་སུའི་བཙན་འཛུལ་འོག་དཀའ་སྡུག་མྱོང་བཞིན་པའི་ཡུ་ཀེ་རེན་མི་མང་ལ་གདུང་སེམས་མཉམ་སྐྱེ་ཞུས་པ་དང་འབྲེལ་ད་ལྟའི་ཡུ་ཀེ་རེན་གྱི་གནས་སྟངས་དེས་ལོ་ངོ་དྲུག་ཅུ་སྔོན་གྱི་བོད་ཀྱི་གནས་སྟངས་དྲན་གསོ་བཏང་ཡོད་ཅེས་དང་། ཉག་ཕྲ་བའི་དུས་སྐབས་དེར་མི་མང་དང་། གྲོང་སྡེའི་སྤྱི་ཁྱབ་ལས་ཁུངས། གྲོས་ཚོགས་འཐུས་མི། སྲིད་གཞུང་བཅས་ཀྱི་རྒྱབ་སྐྱོར་ཙམ་ལས་ཡུ་རོབ་མཐུན་ཚོགས་ཀྱི་དམག་གི་རོགས་སྐྱོར་མེད་ནའང་བོད་མི་རྣམས་གསོན་གནས་ཐུབ་པ་བྱུང་ཞེས་དང་། མཐར་ཁོང་གིས་ཡུ་རོབ་གྲོས་ཚོགས་ཀྱི་འཐུས་མི་རྣམ་པས་བོད་དོན་ལ་རྒྱབ་སྐྱོར་གཡོ་བ་མེད་པ་གནང་བར་ཐུགས་རྗེ་ལེགས་འབུལ་དང་། ཁོང་ཉིད་ལོ་ངོ་ ༤༢ ཙམ་རིང་སྲི་ཞུ་ཞབས་འདེགས་ཞུས་རྗེས་བགྲེས་ཡོལ་ལ་ཕེབས་ཀྱི་ཡོད་པས། ཡོང་འགྱུར་གྱི་སྐུ་ཚབ་དོན་གཅོད་རྣམ་པར་རྒྱབ་སྐྱོར་གཅིག་མཚུངས་གནང་སྐྱོང་ཡོང་བའི་འབོད་སྐུལ་ཞུས། 

གསར་དུ་བསྐོ་གཞག་གནང་བའི་བེལ་ཇམ་སྐུ་ཚབ་དོན་གཅོད་རིག་འཛིན་ཆོས་སྒྲོན་ལགས་ཀྱིས་རང་ཉིད་ངོ་སྤྲོད་དང་འབྲེལ་བོད་མིར་བཙན་གནོན་སྔར་ལྷག་གཏོང་བཞིན་པའི་དུས་སྐབས་ཤིག་ཏུ་ཁོང་མོ་སྐུ་ཚབ་དོན་གཅོད་དུ་བསྐོ་བཞག་བྱུང་བ་དང་། ད་ཆ་བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་ཡོད་ནའང་བོད་མིའི་འཚེ་མེད་ཞི་བའི་འཐབ་རྩོད་ལ་དོ་སྣང་ཆུང་དུ་འགྲོ་བཞིན་ཡོད་སྟབས། ཡུ་རོབ་མཐུན་ཚོགས་ཀྱི་མདུན་དུ་བོད་དོན་འཁྱེར་རྒྱུ་ནི་ཧ་ཅང་གལ་གནད་ཆེ་བས་ཚང་མས་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས། དེ་བཞིན་ཁོང་མོས་དགོས་ཕན་མེད་པའི་ཡུ་ཀེ་རན་གྱི་དམག་དེ་ནི་བོད་མི་རྣམས་ལ་མཚོན་ན་རྒྱ་ནག་གིས་བོད་ས་བཙན་བཟུང་བྱས་པའི་དྲན་གསོ་ཞིག་ཡིན་ཞེས་དང་། ཨུ་རུ་སུ་ལྟར་ལོ་ངོ་དྲུག་ཅུའི་སྔོན་ལ་རྒྱ་མིས་བོད་བཅིངས་བཀྲོལ་གཏོང་དུ་ཡོང་བ་ཡིན་ཞེས་བོད་ནང་བཙན་གྱིས་འཛུལ་ཞིང་། དེའི་མཇུག་འབྲས་ད་ལྟ་འཛམ་གླིང་མི་མང་གི་མིག་མདུན་དུ་མཐོང་རྒྱུ་ཡོད། ད་ལྟའི་ཡུ་ཀེ་རེན་གྱི་དཀའ་ངལ་ནི་ལོ་ངོ་བཅུ་ཕྲག་རིང་སྲིད་དབང་སྒེར་འཛིན་པ་རྒྱ་ཡན་དུ་བཏང་བའི་ལན་པ་རེད་ཅེས་གསུངས། 

ཕྱོགས་མཚུངས་ཁོང་མོས་རྒྱལ་སྤྱིའི་མི་མང་གིས་ཡུ་ཀེ་རེན་གྱི་དཀའ་ངལ་ལ་དོ་སྣང་བྱེད་བཞིན་ཡོད་པ་ལྟར། དེས་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་གཏོང་མཁན་རྒྱ་ནག་ལྟ་བུའི་སྲིད་དབང་སྒེར་འཛིན་པ་གཞན་ལའང་བཟོད་ཡང་གཏོང་གི་ཡོད། རྒྱ་ནག་ནི་འཛམ་གླིང་ལ་ཉེན་ཁ་ཆེ་བས་རང་དབང་ཅན་གྱི་འཛམ་གླིང་མི་མང་ནས་རྒྱ་ནག་ལ་ཁ་གཏད་གཅོག་དགོས་ཞེས་གསུངས་ཡོད། 

གཞན་ཡང་ཚོགས་འདུའི་ཐོག་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པས་མ་འོངས་ལས་དོན་བྱེད་ཕྱོགས་སྐོར་བགྲོ་གླེང་དང་། བེལ་ཇམ་སྐུ་ཚབ་དོན་ཁང་ནས་དཔར་འགྲེམས་ཞུས་པའི་དཔེ་དེབ་ (Thank You Europe for adopting Tibetan Communes in solidarity with Tibet) ཞེས་པ་དབུ་འབྱེད་གནང་ཡོད་པ་རེད། 

ཚོགས་འདུའི་ནང་དྲུང་ཆེ་འཕྲིན་ལས་དབང་འདུས་ལགས་དང་། རྩིས་པ་བསྟན་འཛིན་ལེགས་བཤད་ལགས་ཀྱང་མཉམ་ཞུགས་གནང་ཡོད་པ་བཅས།།