༄༅། །ཕྱི་ལོ་ ༢༠༢༢ ཟླ་ ༠༢ ཚེས་ ༡༡ ཉིན་དཔལ་ལྡན་སྲིད་སྐྱོང་མཆོག་གིས་མ་འོངས་ལོ་གསུམ་གྱི་སྔོན་རྩིས་ཚོད་དཔག་གྲ་སྒྲིག་སླད་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལས་བྱེད་རྣམས་ས་གནས་སོ་སོར་ཕྱོགས་བསྐྱོད་ཀྱིས་འབྱུང་འགྱུར་ལོ་གསུམ་ནང་འཕྲོད་བསྟེན་དང་འབྲེལ་བའི་གཞི་རིམ་དགོས་མཁོའི་ལས་གཞི་ཇི་ཡོད་རྟོག་ཞིབ་དང་རྒྱབ་གཉེར་ཞུ་དགོས་པའི་ལམ་སྟོན་གནང་བ་ལྟར། འཕྲོད་བསྟེན་ལས་ཁུངས་ཀྱི་དྲུང་ལས་ཚེ་རིང་ལགས་དང་སྡེ་འགན་བསྟན་འཛིན་བསམ་གཏན་ལགས་རྣམ་གཉིས་ཕྱི་ལོ་ ༢༠༢༢ ཟླ་ ༠༥ ཚེས་ ༡༡ ནས་ ༡༣ བར་ཉིན་གྲངས་གསུམ་རིང་བཀྲ་ཤིས་ལྗོངས་བོད་མིའི་གཞིས་ཆགས་དང་། སྦིར་བོད་མིའི་གཞིས་ཆགས། སྦིར་སྡེ་དགེ་བོད་མིའི་གཞིས་ཆགས། ཅོན་ཏ་ར་ནང་ཆེན་བོད་མིའི་གཞིས་ཆགས། ས་གནས་འཕྲོད་བསྟེན་སྨན་ཁང་བཅས་སུ་འཕྲོད་བསྟེན་དང་འབྲེལ་བའི་རྟོག་ཞིབ་གནང་ཡོད།
སྐབས་དེར་དྲུང་ལས་ཚེ་རིང་ལགས་དང་སྡེ་འགན་བསྟན་འཛིན་བསམ་གཏན་ལགས་རྣམ་གཉིས་ཀྱིས་ས་གནས་འགོ་འཛིན་དང་། ས་གནས་འཐུས་ཚོགས་ཀྱི་ཚོགས་གཙོ། གཞིས་སྒར་གྱི་བརྒྱ་དཔོན་རྣམ་པ་སོགས་དང་ཐུག་འཕྲད་ཀྱིས་མ་འོངས་ལོ་གསུམ་ནང་ས་གནས་སུ་འཕྲོད་བསྟེན་དང་འབྲེལ་བའི་ལས་གཞི་ཇི་ཡོད་ཁག་ལ་གྲོས་བསྡུར་དང་རྟོག་ཞིབ་གནང་ཡོད་པ་མ་ཟད། འཕྲོད་བསྟེན་ལས་ཁུངས་ཀྱི་ལས་གཞི་ཁག་རེ་རེ་བཞིན་ངོ་སྤྲོད་དང་། དེ་བཞིན་ས་གནས་སུ་ལས་འཆར་འགྲོ་བཞིན་པ་དང་དཀའ་ངལ་ཁག་ལ་རྟོག་ཞིབ་གནང་ཡོད།
ཨ་རིའི་རོགས་ཚོགས་(USAID) ནས་ཐེངས་འདིའི་རྟོག་ཞིབ་ལས་རིམ་ཆེད་དུ་མཐུན་འགྱུར་གནང་ཡོད་པ་བཅས།།
