༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་གཞོན་པདྨ་གཡུ་སྒྲོན་ལགས་དང་། ལས་དྲུང་བསོད་ནམས་སྒྲོལ་མ་ལགས་རྣམ་གཉིས་ཕྱི་ལོ་ ༢༠༢༢ ཟླ་ ༠༥ ཚེས་ ༠༤ ནས་ ༠༧ བར་ཀྲུ་ཀྲིང་ཁུལ་དུ་ཆེད་ཕེབས་ཀྱིས་ས་གནས་འཐུས་ཚོགས་ཀྱི་ཚོགས་གཙོ་དང་། ས་གནས་རང་བདེན་ཚོགས་གཙོ། གཞིས་གྲོང་ཁག་གི་སྤྱི་མི་དང་ལྷན་ས་གནས་འགོ་འཛིན་ལས་ཁུངས་སུ་ཚོགས་འདུ་བསྐོང་ཚོགས་དང་། དེ་བཞིན་གཞིས་མི་མང་ཚོགས་དང་ལྷན་ཚོགས་འདུ་ཚོགས་ཡོད་པ་མ་ཟད། ས་གནས་ཀྱི་འཕྲོད་བསྟེན་དང་འབྲེལ་བའི་རྟོག་ཞིབ་གནང་ཡོད།

དེ་ཡང་ཕྱི་ཚེས་ ༤ ཉིན་མི་མང་ཚོགས་འདུའི་སྐབས་དྲུང་གཞོན་པདྨ་གཡུ་སྒྲོན་ལགས་ཀྱིས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལས་གཞི་གཙོ་ཆེ་ཁག་སྟེ་སྨན་བཅོས་ལྟ་སྐྱོང་ལས་གཞི་དང་། ཆུ་དང་གཙང་འཕྲོད་ལས་གཞི། མ་དང་བྱིས་པའི་འཕྲོད་བསྟེན་ལས་གཞི། སེམས་ཁམས་འཕྲོད་བསྟེན་དང་མྱོས་རྫས་ལོག་སྤྱོད་སོགས་ཀྱི་སྐོར་ངོ་སྤྲོད་གནང་བར་མང་ཚོགས་ནས་ཐུགས་སྣང་ཆེན་པོ་གནང་ཡོད། ཉིན་རྒྱབ་པི་ལ་ཨིན་ (Piline) དང་།  ལཱ་ལི་བྷས་ཏི་ (Lalibasti) ཨེ་ཨེལ་སི་ལ་ཨིན། (Alc Line) བི་ཧཱར་རི་ལ་ཨིན་ (Bihariline) པད་བསྐོང་བཅས་དང་། དེ་བཞིན་ཕྱི་ཚེས་ ༥ ཉིན་ཀོ་པུ་ (Kopu) དང་། བྷོ་ན། (Bona) ནོར་བུ་གླིང་། དགེ་གླིང་བཅས། ཕྱི་ཚེས་ ༦ ཉིན་ཉེ་རིང་ (Nyering) དང་། མྱུ་བསྐོང་། (Nyukong)  མན་ཀོ་ཊ། (Mankota) དཔལ་དབྱིངས་སྡེམ། (Payingdem) བཅས་ཁ་ཐོར་ས་གནས་ཁག་ཏུ་འཕྲོད་བསྟེན་དང་འབྲེལ་བའི་རྟོག་ཞིབ་གནང་ཡོད། ཉིན་བཞི་པ་སྟེ་ཕྱི་ཚེས་ ༧ ཉིན་བཀྲ་ཤིས་སྒོང་དུ་འཕྲོད་བསྟེན་དང་འབྲེལ་བའི་རྟོག་ཞིབ་གནང་ཡོད་པ་བཅས། །