༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་མངོན་དགའ་སློབ་གྲྭ་དབུ་བརྙེས་པའི་ཉིན་མོར་༧རྒྱལ་བའི་ཐུགས་རྒྱུད་ལས་འཁྲུངས་པའི་མངོན་དགའ་སློབ་གྲྭ ༧སྐུའི་བཀའ་དྲིན་རྗེས་སུ་དྲན་པ་ཞེས་པའི་མཛད་སྒོའི་ཐོག་ཆེད་ཕེབས་གནང་ཡོད། 

དེ་ཡང་ཐོག་མར་སློབ་གྲྭའི་དགེ་ལས་རྣམས་ཀྱིས་སློབ་གྲྭ་སྤྱི་ཡོངས་པར་རིས་ལམ་ནས་འགྲེམས་སྟོན་དང་། དེ་རྗེས་སློབ་ཕྲུག་རྣམས་ཀྱིས་གཞས་སྣ་འཁྲབ་སྟོན་གཟིགས་འབུལ་ཞུས་རྗེས་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་དང་། མགོན་པོ་གང་ཉིད་མཆོག་གི་ཐུགས་བསྐྱེད་དམ་བཅའ་བཞི་ཤེས་རྟོགས་ཡོད་པའི་ཐོག་ནས་༸རྒྱལ་བའི་བཀའ་དྲིན་རྗེས་དྲན་ཞུ་དགོས་ཞེས་སོགས་གསུངས།མཛད་སྒོ་གྲོལ་མཚམས་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་མངོན་དགའ་སློབ་གྲྭར་གཟིགས་སྐོར་དང་དགེ་ལས་དང་ལྷན་དུ་དཀའ་ངལ་ཇི་ཡོད་སེལ་ཐབས་ཐད་བཀའ་བསྡུར་ལྷུག་པོ་གནང་ཡོད་པ་རེད། 

དེ་བཞིན་ཉིན་ཕྱི་མར་ཁོང་གིས་བདེ་སྐྱིད་གླིང་དང་དོན་གྲུབ་གླིང་བོད་མིའི་གཞིས་ཆགས་ཀྱིས་འཕྲོད་བསྟེན་སྨན་ཁང་དུ་གཟིགས་སྐོར་དང་འབྲེལ་ཡོད་ལས་བྱེད་དང་ལྷན་ས་གནས་འཕྲོད་བསྟེན་སྨན་ཁང་སྐོར་བཀའ་བསྡུར་དང་། གཞན་ཡང་ས་གནས་སུ་ལག་བསྟར་བྱེད་བཞིན་པའི་ལས་གཞི་ཁག་གཅིག་ལའང་གཟིགས་ཞིབ་གནང་ཡོད། 

མཐར་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཡོང་འགྱུར་སྤོན་ཊ་ཆོལ་གསུམ་བོད་མིའི་གཞིས་ཆགས་སུ་ཚོགས་གཏན་ཁེལ་བའི་རྒྱལ་ཡུམ་ཆེན་མོའི་རྩེད་འགྲན་ཐེངས་ ༢༧ པའི་སྟ་གོན་ལ་གཟིགས་ཞིབ་གནང་སྟེ་ཐེངས་འདིའི་གཞུང་འབྲེལ་ཕྱོགས་ཕེབས་ལེགས་པར་གྲུབ་ཡོད་པ་བཅས།།