༄༅། །འདི་གར་མན་སྤར་ཕན་བདེ་གླིང་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༠༥ ཚེས་ ༢༦ རེས་གཟའ་ཕུར་བུ་ཉིན་མན་སྤར་ཕན་བདེ་གླིང་བོད་མིའི་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་དང་མཉམ་འབྲེལ་དྲུང་ཆེ་བསྟན་འཛིན་དཔལ་འབྱོར་ལགས་རྣམ་གཉིས་ཀྱིས་ཆ་ཏྟཱིས་གར་མངའ་སྡེའི་ནང་སྲིད་བློན་ཆེན་སྐུ་ཞབས་ཏཱམྲ་དྷྭཇ་སཱཧུ་ (Shri. Tamradhwaj Sahu) མཆོག་དང་མཇལ་འཕྲད་ཞུས་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཙམ་ལ་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་དང་མཉམ་འབྲེལ་དྲུང་ཆེ་བསྟན་འཛིན་དཔལ་འབྱོར་ལགས་རྣམ་གཉིས་མན་སྤར་ས་གནས་ཉེ་འདབས་སུ་ཡོད་པའི་ (Saila Tourist) ཞེས་པའི་མགྲོན་ཁང་དུ་ཆེད་བཅར་གྱིས་ཆ་ཏྟཱིས་གར་མངའ་སྡེའི་ནང་སྲིད་བློན་ཆེན་སྐུ་ཞབས་ཏཱམྲ་དྷྭཇ་སཱཧུ་མཆོག་ལ་ཕེབས་བསུའི་སྣེ་ལེན་དང་འབྲེལ་མཇལ་འཕྲད་ཞུས་ཡོད།སྐབས་དེར་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་ཀྱིས་བློན་ཆེན་མཆོག་ལ་ས་གནས་བོད་མིའི་ཆེད་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤   (Tibetan Rehabilitation Policy 2014)  ཞེས་པའི་གནད་དོན་དང་འབྲེལ་བའི་ཐོག་ལ་ཞུ་སྙན་ཞིག་ཕུལ་བ་ཙམ་མ་ཟད། དེའི་ཐད་མཐུན་རྐྱེན་སྦྱོར་སྤྲོད་གང་མགྱོགས་གནང་སྐྱོང་ཡོང་བའི་འབོད་སྐུལ་ཡང་ཞུས་ཡོད། 

དེ་རྗེས་བློན་ཆེན་མཆོག་གཞིས་གྲོང་གསུམ་པར་རྟེན་གཞི་བྱས་པའི་སྔ་འགྱུར་གཙོ་རི་བདེ་ཆེན་ཆོས་འཁོར་གླིང་དགོན་པར་གནས་གཟིགས་སུ་ཕེབས་ཡོད་པ་བཅས། །