༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༡༦ ཉིན་གྱི་སྔ་དྲོ་ཆུ་ཚོད་ ༠༩།༣༠ ཐོག་གངས་སྐྱིད་སྲིད་སྐྱོང་ཚོགས་ཁང་དུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་བཀའ་བློན་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་དང་སྲི་ཞུའི་ལས་བྱེད་བཅས་ཚང་འཛོམས་ཐོག་ཇར་མན་གྷ་ཊ་རོགས་ཚོགས་ཀྱི་ཚོགས་གཙོ་ལྕམ་ཧེ་ཊི་མེ་ཡར་ལགས་ཀྱིས་དབུ་ཁྲིད་པའི་སྐུ་ཚབ་ཚོགས་ཆུང་ལ་ཕེབས་བསུའི་མཛད་སྒོ་ཞིག་ཚོགས་ཡོད། སྐུ་ཚབ་ཚོགས་ཆུང་ནང་ཇར་མན་རོགས་ཚོགས་ཀྱི་ཚོགས་གཙོ་ལྕམ་ཧེ་ཊི་མེ་ཡར་ (Heide Meyer) ལགས་དང་། འཛིན་སྐྱོང་འགན་འཛིན་སེ་ཝན་ཇ་ཨིལ་ཧོས་(Svenja Elchhorst) ལགས། སློབ་ཡོན་འགན་འཛིན་འཆི་མེད་འཆི་མེད་བླ་མ་ལགས། འགན་འཛིན་ལྷན་ཚོགས་ཀྱི་ཚོགས་མི་ལྕམ་ཀི་རིས་ཀྲིན་(Christine Czerlitzki) ལགས་བཅས་ཕེབས་ཡོད་པ་རེད། དེ་ཡང་མཛད་སྒོའི་ཐོག་མར་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་ཕེབས་བསུའི་གསུང་བཤད་གནང་གྲུབ་རྗེས་དཔལ་ལྡན་སྲིད་སྐྱོང་མཆོག་གིས་ཇར་མན་རོགས་ཚོགས་ངོས་ནས་འདས་པའི་ལོ་ངོ་ ༥༤ རིང་རྒྱ་བལ་འབྲུག་གསུམ་གྱི་བོད་མིའི་འདུས་སྡོད་ས་གནས་ཁག་ལ་མཐུན་རྐྱེན་སྦྱོར་སྤྲོད་ཀྱིས་རོགས་རམ་གནང་བར་བཀའ་དྲིན་རྗེས་དྲན་དང་། དེང་གི་ཆར་ནུབ་ཕྱོགས་རྒྱལ་ཁབ་ཁག་ཏུ་གནས་སྤོ་བྱེད་མཁན་བོད་མི་ཇེ་མང་དུ་འགྲོ་བཞིན་པར་བརྟེན་སློབ་གྲྭ་དང་གཞིས་ཆགས་སྲ་བརྟན་ཡོང་བར་དཀའ་ངལ་འཕྲད་བཞིན་པའི་སྐོར་དང་། དཀའ་ངལ་དེར་གདོང་ལེན་བྱེད་ཐབས་སུ་རྒྱ་བལ་གཉིས་སུ་བོད་མི་ཁང་ཁྱིམ་མེད་མཁན་དུད་ཚང་ ༡༩༩༩ ལ་ཁང་ཁྱིམ་མཁོ་སྤྲོད་གནང་རྒྱུའི་འབད་རྩོལ་གནང་གི་ཡོད་སྐོར་གསུངས། ཇར་མན་རོགས་ཚོགས་ཀྱི་ཚོགས་གཙོ་ལྕམ་ཧེ་ཊི་མེ་ཡར་ལགས་ཀྱིས་བོད་མིའི་སྒྲིག་འཛུགས་ནས་ཁོང་རྣམ་པར་ཕེབས་བསུའི་མཛད་སྒོ་གོ་སྒྲིག་གནང་བར་ཐུགས་རྗེ་ལེགས་འབུལ་ཞུས་པ་དང་འབྲེལ་ཁོང་མོས་ཇར་མན་རོགས་ཚོགས་གྷེ་ཊི་ངོས་ནས་བཙན་བྱོལ་བོད་མིར་མུ་མཐུད་རྒྱབ་སྐྱོར་གནང་རྒྱུ་ཡིན་པའི་ནན་བརྗོད་དང་། སྐབས་དེར་ཁོང་མོས། ང་ཚོའི་སེམས་ཁུར་བྱེད་ཡུལ་གཙོ་བོ་ནི་བྱིས་པའི་ཤེས་ཡོན་དང་བོད་ཀྱི་ཆོས་དང་རིག་གཞུང་སྲུང་སྐྱོབ་བྱ་རྒྱུ་དེ་ཡིན། ང་ཚོས་རྡ་ས་བོད་ཕྲུག་ཁྱིམ་སྡེ་དང་། མ་སུ་རི་བོད་ཕྲུག་ཁྱིམ་སྡེ། སཾ་བྷོ་ཊ་བོད་སློབ་ཚོགས་པ་བཅས་ལ་རོགས་སྐྱོར་ཞུ་གི་ཡོད། ང་ཚོས་རྒན་རབས་རྣམས་མ་བརྗེད་པའི་ཐོག་ནས་ལས་དོན་འདི་ཉིད་གལ་གནད་ཆེ་ཤོས་སུ་ལྟ་གི་ཡོད། ཅེས་གསུངས། 

གསུང་བཤད་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་སྐུ་ཚབ་རྣམ་པར་དཀར་གཙང་མཇལ་དར་དང་བཅས་དྲན་རྟེན་རེ་ཕུལ་ཏེ་མཛད་སྒོ་ལེགས་པར་གྲོལ།ཇར་མན་གྱི་གྲོང་ཁྱེར་ཧམ་བྷག་ཏུ་དབུ་འཛུགས་ཞུས་པའི་གྷེ་ཊི་རོགས་ཚོགས་ནི་བཙན་བྱོལ་བོད་མི་སྤྱི་དང་། ཡང་སྒོས་རྒན་རྒོན་དང་བྱིས་པ་རྣམས་ཀྱི་བདེ་སྡུག་ལ་རོགས་ཕན་གནང་མཁན་གྱི་རོགས་ཚོགས་ཤིག་ཡིན་ཞིང་། རོགས་ཚོགས་དེས་བོད་མི་སྒྲིག་འཛུགས་དང་མཉམ་སྦྲེལ་གྱིས་རོགས་དངུལ་མཁོ་སྤྲོད་གནང་བ་རྣམས་དོན་སྨིན་ཡོང་ཐབས་དང་། བོད་མི་འདུས་སྡོད་ས་གནས་སུ་གཟིགས་སྐོར་གྱིས་དགོས་མཁོ་རིགས་གཞན་ཡོད་མེད་གཟིགས་ཞིབ་གནང་གི་ཡོད་པ་རེད། ད་བར་གྷེ་ཊི་རོགས་ཚོགས་ནས་ཕྲུ་གུ་གྲངས་ ༡༤༧༢ དང་། རྒན་རྒོན་གྲངས་ ༨༩༣ དགེ་འདུན་པ་གྲངས་ ༣༧༠ བཙུན་མ་ ༨༤ ལ་མཐུན་འགྱུར་རོགས་རམ་གནང་ཡོད་ཅིང་། ཕྱི་ལོ་ ༢༠༠༩ ནས་ ༢༠༢༡ བར་དུ་རོགས་ཚོགས་ངོས་ནས་བོད་མིའི་བདེ་སྡུག་ཆེད་ཡུ་སྒོར་ས་ཡ་ ༡༧།༢༣ གྱི་མཐུན་འགྱུར་གནང་ཡོད་པ་དང་། རྩིས་ལོ་འདིར་བོད་མི་གཞིས་ཆགས་ཁག་གི་ཡར་རྒྱས་ལས་དོན་ཆེད་ཡུ་སྒོར་ས་ཡ་ ༡།༩༡ གནང་ཡོད།།