༄༅། །འདི་གར་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༠༥ ཚེས་ ༣༠ ཉིན་བོད་ཀྱི་དཔེ་མཛོད་ཁང་གི་སེ་སྒར་ཚན་རིག་བསྟི་གནས་ཁང་གི་ཚོགས་ཁང་དུ་བོད་ཀྱི་རིག་གཞུང་ཟབ་སྦྱོང་གི་མཇུག་སྡོམ་མཛད་སྒོ་ཚོགས་ཡོད།དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣།༣༠ ཐོག་སྐུ་མགྲོན་གཙོ་བོ་ཆོས་རིག་དྲུང་ཆེ་ཀླུ་ཁྲི་ཚང་འཆི་མེད་ཚེ་དབྱངས་ལགས་དང་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། བོད་ཀྱི་དཔེ་མཛོད་ཁང་གི་དྲུང་ཆེ་དང་ཚན་པ་སོ་སོའི་འགན་འཛིན། ཟབ་སྦྱོང་ཐོག་མཉམ་ཞུགས་གནང་མཁན་གྱི་སློབ་མ་ལྷན་འཛོམས་ཀྱིས་ཐོག་མར་ཆོས་རིག་དྲུང་ཆེ་ནས་སྣང་གསལ་ཞལ་ཕྱེ་གནང་གྲུབ་བསྟུན། དགེ་བཤེས་ལྷག་རྡོར་ལགས་ཀྱིས་ཟབ་སྦྱོང་གི་དགོས་དམིགས་ཀྱིས་གཙོས་སློབ་མ་རྣམས་ལ་བླང་དོར་ལམ་སྟོན་དང་། དེ་ནས་སློབ་མ་རྣམས་ལ་སྐུ་མགྲོན་གཙོ་བོ་ནས་ཕྱག་འཁྱེར་གནང་མཚམས་ཟབ་ཁྲིད་དང་འབྲེལ་ལམ་སྟོན་གསུང་བཤད་གནང་། དེ་བཞིན་སློབ་མ་བཞི་ནས་ཟབ་ཁྲིད་ཀྱི་མྱོང་ཚོར་དང་སློབ་མ་གཞན་གཉིས་ནས་སྙན་ངག་གྱེར་འདོན་གནང་། མཐར་བོད་ཀྱི་དཔེ་མཛོད་ཁང་གི་དྲུང་ཆེ་ནས་ཐུགས་རྗེ་ཆེ་གསུང་བཤད་གནང་སྟེ་མཛད་སྒོ་གྲོལ།ཟླ་གཉིས་བོད་ཀྱི་རིག་གཞུང་ཟབ་སྦྱོང་ནི་ཕྱི་ལོ་ ༢༠༡༡ ལོ་ནས་བཟུང་བོད་ཀྱི་དཔེ་མཛོད་ཁང་ནས་གོ་སྒྲིག་ཞུས་དང་ཞུ་མུས་ཡིན། ཟབ་ཁྲིད་དེའི་དམིགས་ཡུལ་གཙོ་བོ་ནི་མཐོ་སློབ་ཐོན་པའི་བོད་པའི་སློབ་མ་རྣམས་ལ་བོད་ཀྱི་སྐད་ཡིག་དང་རིག་གཞུང་སློབ་ཁྲིད་གནང་རྒྱུ་དེ་ཡིན། འདི་ལོའི་ཟབ་ཁྲིད་དེ་བཞིན་ཨ་རི་ (USAID) རོགས་ཚོགས་ཀྱིས་འབྲེལ་ཡོད་ཆོས་རིག་ལས་ཁུངས་བརྒྱུད་མཐུན་འགྱུར་རོགས་རམ་ཐོབ་པ་ཞིག་ཆགས་ཡོད། ཐེངས་འདིའི་ཟབ་སྦྱོང་ཐོག་སློབ་མ་ ༢༦ བྱུང་བ་ལས་བུ་ ༡༤ དང་བུ་མོ་ ༡༢ ནས་མཉམ་ཞུགས་བྱས་ཡོད་པ་བཅས། །