༄༅། །བེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཕ་རཱན་སིར་གནས་འཁོད་བོད་མིའི་རོགས་སྐྱོར་ཚོགས་པ་ (Aide à l’Enfance Tibétaine) ཞེས་པའི་ལས་ཁུངས་སུ་ཆེད་ཕེབས་གནང་ཡོད། 

དེ་ཡང་ (AET) ཞེས་པའི་རོགས་ཚོགས་དེས་རྒྱ་བལ་འབྲུག་གསུམ་གྱི་བོད་མི་འདུས་སྡོད་ས་གནས་ཁག་ཏུ་ཡར་རྒྱས་ལས་གཞི་མང་དག་ལ་མཐུན་འགྱུར་གནང་གི་ཡོད་པ་མ་ཟད། འདས་པའི་ལོ་བཞི་བཅུའི་རིང་ལོ་ལྟར་བོད་ཕྲུག་དང་རྒན་རྒོན་གྲངས་ ༢༠༠༠ ནས་ ༣༠༠༠ བར་ལ་འཚོ་འཛིན་འགན་ཁུར་གནང་བཞིན་ཡོད་པ་རེད། 

ཐོག་མར་ཚོགས་པའི་ཚོགས་གཞོན་ངག་དབང་སྒྲོལ་དཀར་ཚེ་རིང་ལགས་ཀྱིས་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ལས་ཁུངས་སུ་ཕེབས་བསུ་སྣེ་ལེན་ཞུས་ཤིང་། དེ་རྗེས་ཚོགས་འདུའི་ཐོག་རོགས་ཚོགས་ཀྱི་དངུལ་གཉེར་ཇོར་ཇ་བོར་ཊེ་ལགས་དང་། འཛིན་སྐྱོང་འགན་འཛིན་བསྟན་ནམ་ལགས། སྐུ་ཚབ་དོན་ཁང་གི་དྲུང་ཆེ་རྣམ་རྒྱལ་བསམ་གྲུབ་ལགས་བཅས་ཀྱང་ལྷན་ཞུགས་གནང་ཡོད། 

ཚོགས་འདུའི་སྐབས་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་རོགས་ཚོགས་ངོས་ནས་འདས་པའི་ལོ་ངོ་བཞི་བཅུ་ལྷག་རྒྱ་བལ་འབྲུག་གསུམ་གྱི་བོད་མི་རྣམས་ཀྱི་བདེ་དོན་ཆེད་སྐུ་ངལ་སྐྱོན་པར་ཐུགས་རྗེ་ཆེ་ཞུས་པ་དང་། ལྷག་པར་ (Thank You Europe for Adopting Tibetan Communes in Solidarity with Tibet) ཞེས་པའི་དཔེ་དེབ་ཀྱི་འགྲོ་གྲོན་མཐུན་འགྱུར་གནང་བར་ཐུགས་རྗེ་ལེགས་འབུལ་ཞུས་ཡོད།

བེལ་ཇམ་སྐུ་ཚབ་དོན་ཁང་ནས་ཕྱི་ལོ་ ༢༠༡༩ ལོར་ཡང་ (Thank You Europe for Hoisting the Tibetan Flag-Banned in Tibet but celebrated in the Free world) ཞེས་པའི་དཔེ་དེབ་འགྲེམས་སྤེལ་གནང་ཡོད་པ་དང་། དེ་ཉིད་མ་འོངས་བོད་དོན་ཉམས་ཞིབ་བྱེད་འདོད་ཡོད་རིགས་ཆེད་དཔྱད་གཞིའི་ཡིག་ཆར་གྱུར་ཡོད། 

ཕྱོགས་མཚུངས་ཁོང་རྣམས་ཀྱིས་རྒྱ་བལ་འབྲུག་གསུམ་ནང་གནས་སྡོད་བོད་མིའི་མི་འབོར་འགྱུར་བ་འགྲོ་བཞིན་པའི་སྐོར་བགྲོ་གླེང་གནང་ཞིང་། རོགས་ཚོགས་ངོས་ནས་སླད་མར་འཆར་གཞི་སྒྲིག་སྐབས་གནས་སྟངས་དེ་དག་ལ་བསམ་གཞིག་གནང་དགོས་པའི་དགོངས་ཚུལ་གསུངས།

མཐར་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཉེ་ལམ་གསར་དུ་པར་འགྲེམས་ཞུས་པའི་དཔེ་དེབ་གྲངས་ ༦༥ རོགས་ཚོགས་ལ་འགྲེམས་སྤེལ་ཆེད་ཕུལ་ཡོད་པ་བཅས།།