༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༡༣ ཉིན་བཞུགས་སྒར་རྡ་སར་རྟེན་གཞི་བྱས་པའི་ཀིརྟི་བྱེས་པ་གྲྭ་ཚང་གི་ཚོགས་ཁང་དུ་ཀིརྟི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་འདུལ་བ་དང་། མཛོད། ཕར་ཕྱིན། དེ་བཞིན་འཛིན་རིམ་བཅུ་པ་བཅས་ཀྱི་སློབ་མཐར་སོན་པ་རྣམས་ལ་བཀའ་ཤོག་ཕྱག་འཁྱེར་འབུལ་བཞེས་གནང་རྒྱུའི་མཛད་སྒོ་ཞིག་ཚོགས་ཡོད། 

མཛད་སྒོ་དབུ་འཛུགས་མ་ཞུས་གོང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཀིརྟི་བྱེས་པ་གྲྭ་ཚང་གི་དཔེ་མཛོད་ཁང་དུ་ཕྱི་ལོ་ ༡༩༩༢ ནས་ ༢༠༢༢ བར་གྲྭ་ཚང་ནས་པར་འགྲེམས་བྱས་པའི་དཔེ་དེབ་འགྲེམས་སྟོན་ལ་གཟིགས་ཞིབ་གནང་རྗེས་མཛད་སྒོའི་སྐུ་མགྲོན་གཙོ་བོར་གདན་ཞུས་ལྟར་ཆེད་ཕེབས་ཀྱིས་སློབ་ཐོན་པ་རྣམས་ལ་ཕྱག་འཁྱེར་གསོལ་སྩལ་དང་། འདུས་མང་ལ་གསུང་བཤད་གནང་ཡོད།དེ་ཡང་ཐོག་མར་དཔལ་ལྡན་སྲིད་སྐྱོང་མཆོག་གིས་འདུལ་བ་དང་། མཛོད། ཕར་ཕྱིན། དེ་བཞིན་འཛིན་རིམ་བཅུ་པའི་སློབ་མཐར་སོན་མཁན་རྣམས་ལ་འཚམས་འདྲི་དང་སྦྲགས། སློབ་སྦྱོང་གི་དགོས་དམིགས་གཙོ་བོ་མི་བཟང་པོ་ཞིག་བཟོ་རྒྱུ་ཡིན་པ་དང། གྲྭ་ཚང་ངོས་ནས་༧སྐྱབས་རྗེ་ཀིརྟི་རིན་པོ་ཆེའི་བཀའ་སློབ་ལམ་སྟོན་གཞིར་བཟུང་ཕྱག་ལས་རྒྱ་ཆེ་གནང་བཞིན་ཡོད་ཅིང་། བླ་མ་ཇི་འདྲ་ཡོད་པ་སློབ་མ་ལ་བལྟས་ན་རྟོགས་ཐུབ་ཅེས་གསུང་སྲོལ་ཡོད་པ་བཞིན། གྲྭ་ཚང་ནང་དགེ་འདུན་པ་ ༡༧༩ ཙམ་ཡོད་པའི་ནང་ནས་ཕལ་མོ་ཆེ་ཕྱག་དཔེ་གཟིགས་མཁན་ཡིན་པ་མཁྱེན་རྟོགས་བྱུང་བར་དགའ་ཚོར་ཆེན་པོ་བྱུང་ཚུལ་གསུངས།

དེ་བཞིན་ཁོང་གིས། སློབ་མཐར་སོན་པའི་དགེ་འདུན་པ་རྣམས་ནས་སོ་སོའི་སྤྱི་ཚོགས་ནང་དུ་ནང་ཆོས་ངོ་སྤྲོད་དང་སློབ་ཁྲིད་ཚད་ལྡན་བྱ་ཐུབ་དགོས་པ་དང་། དེང་སྐབས་ཁྱོན་ཡོངས་ནས་འགྱུར་བ་ཆེན་པོ་འགྲོ་བཞིན་ཡོད་ལ། ལ་དྭགས་ལྟ་བུ་ཡིན་ན་གདན་ས་ཆེན་པོ་སོགས་ནང་སློབ་གཉེར་གནང་ཟིན་པ་རྣམས་ནས་སོ་སོའི་ས་གནས་སུ་འགན་ཁུར་འགོ་ཚུགས་ཀྱི་འདུག ང་ཚོའི་དགོན་སྡེ་ཁག་ལ་ཧི་མ་ལ་ཡ་མི་རིགས་ཀྱི་གྲངས་འབོར་འཕར་བཞིན་ཡོད། ད་ལྟའི་ཆར་ཆོས་རིག་ལས་ཁུངས་ཀྱི་གྲངས་ཐོ་ལྟར་ན། དགོན་པ་གྲངས་ ༢༨༨ ཙམ་གྱི་དགེ་འདུན་པའི་ཞལ་གྲངས་སྟོང་ཕྲག་བཞི་བཅུ་ཞེ་གཉིས་ཙམ་ནས་བརྒྱ་ཆ་ ༦༦ ཙམ་ཧི་མ་ལ་ཡའི་མི་རིགས་ཡིན། སྔོན་མ་ནས་༧རྒྱལ་བ་རིན་པོ་ཆེས་མ་འོངས་པར་བོད་བརྒྱུད་ནང་བསྟན་འཛིན་སྐྱོང་ཧི་མ་ལ་ཡའི་མི་རིགས་ཀྱིས་བྱེད་དགོས་ཞེས་ཐུགས་རེ་གནང་གི་ཡོད།སྤྱིར་ང་ཚོ་རང་བཙན་མེད་པའི་མི་རིགས་ཤིག་ཡིན་ནའང་ལུང་པ་རང་བཙན་ཡོད་མཁན་གྱི་མི་རིགས་ལའང་ང་ཚོས་སློབ་སྦྱོང་སྤྲོད་ཐུབ་པ་དེ་ནི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ཆོས་བརྒྱུད་རིས་མེད་ཀྱི་བསྟན་བདག་བླ་ཆེན་རྣམས་པའི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་རེད། དེ་ལྟར་ཡིན་དུས། ང་ཚོས་འགན་མཉམ་སྤུངས་བྱས་ཏེ་བོད་ནང་འགྲོ་བ་མིའི་ཐོབ་ཐང་མེད་པའི་གནས་ཚུལ་དེ་དག་ཀྱང་མིའི་རང་དབང་དང་འབྲེལ་བ་ཆགས་སྟབས། དེ་ཉིད་ཆོས་ཕྱོགས་ཀྱི་བྱ་བར་ངོས་འཛིན་བྱེད་ཆོག་གི་རེད་བསམ་གྱི་ཡོད། སྐབས་རེ་ནུབ་ཕྱོགས་སུ་ཡོད་པའི་ཆོས་ཚོགས་ཁག་གིས་བོད་ནང་འགྲོ་བ་མིའི་ཐོབ་ཐང་མེད་པའི་གནས་ཚུལ་རིགས་ཆབ་སྲིད་ཡིན་པར་ངོས་འཛིན་གྱིས་ཡ་ལན་གནང་གི་མེད་པའི་གནས་སྟངས་ཡོང་གི་ཡོད་ལ། དེ་ནི་བསམ་བློ་གཏོང་སྟངས་ཀྱི་ཁྱད་པར་ཞིག་རེད་དྲན་གྱི་འདུག་ཅེས་དང་།དེ་བཞིན་དཔལ་ལྡན་སྲིད་སྐྱོང་མཆོག་གིས། གཉའ་གནོན་བཤུ་གཞོག་འོག་གནས་པའི་མི་རིགས་སུ་འདྲ་ཞིག་ཡིན་ནའང་མིའི་ལྷན་སྐྱེས་ཀྱི་ཐོབ་ཐང་ལ་རྡོག་རོལ་འགྲོ་གི་ཡོད་ན། མི་སུ་འདྲ་ཞིག་ཡིན་ནའང་རོགས་བྱེད་དགོས་ངེས་ཡིན་སྟབས། ཆབ་སྲིད་དང་ཆོས་ཕྱོགས་ཀྱི་དབྱེ་བ་མེད་པའི་ཐོག་ནས་ལྟ་རྟོག་བྱེད་དགོས་པ་གལ་ཆེན་པོ་ཡིན་སྐོར་ནུབ་ཕྱོགས་མི་མང་ལ་གསུང་གི་ཡོད་ཅེས་དང་།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནུབ་ཕྱོགས་རྒྱལ་ཁབ་ཁག་ཏུ་ཐོག་མར་ཆིབས་སྒྱུར་བསྐྱངས་སྐབས་ཆོས་ཕྱོགས་ལས་ཆབ་སྲིད་ཀྱི་གནད་དོན་གསུངས་མེད་ཅེས་བཀའ་གནང་ཡོད། བོད་བསྟན་པ་ཆབ་སྲིད་ལ་ཕན་ཐོགས་པའི་གཞི་རྟེེན་ནི་བོད་བརྒྱུད་ནང་བསྟན་ཡིན། རྒྱལ་སྤྱིའི་སྟེང་བོད་དོན་ལ་དོ་སྣང་སླེབས་པ་དེ་ཐོག་མར་ཆོས་ཕྱོགས་ལ་དོ་སྣང་སླེབས་ནས་བྱུང་བ་དང་། དེ་རྗེས་ཆབ་སྲིད་ཐོག་ནས་ནུས་པ་སྤུངས་སའི་ལམ་ཁ་ཐོན་པ་རེད། དེས་ན་བོད་ཀྱི་ཆབ་སྲིད་ཀྱི་གནད་དོན་ལ་རྒྱལ་སྤྱིའི་དོ་སྣང་དེ་ནང་ཆོས་ལ་བརྟེན་ནས་སླེབས་པ་རེད། ངོས་རང་སྤྱི་འཐུས་ཚོགས་གཙོ་ཡིན་པའི་སྐབས་ཚོགས་ཁང་དབུ་འབྱེད་ཀྱི་གསུང་བཤད་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ང་ཚོ་བོད་མི་ཚོས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་ཐུབ་པ་ཙམ་གྱིས་ཆབ་སྲིད་ཀྱི་ལས་འགན་ཆེན་པོ་ཞིག་སྒྲུབ་པ་རེད་ཅེས་བཀའ་སྩལ་གནང་སོང་།བོད་ཀྱི་འཐབ་རྩོད་ཅེས་པ་ཆབ་སྲིད་ཀྱི་ལས་འགན་ཁོ་ན་མ་ཡིན། གང་ལགས་ཟེར་ན། བོད་ཀྱི་འཐབ་རྩོད་སྐོར་བཤད་དུས་བོད་མི་རིགས་ཀྱི་ངོ་བོ་དང་འབྲེལ་ཏེ་བཤད་ཀྱི་ཡོད་པས། བོད་ཀྱི་ཆོས་དང་། རིག་གཞུང་། སྐད་ཡིག དེ་བཞིན་ཁོར་ཡུག་སྲུང་སྐྱོབ་བྱ་རྒྱུ་དེ་ཡང་འཐབ་རྩོད་ཆགས་ཀྱི་ཡོད་སྐོར་འགྲེལ་བརྗོད་སྐྱོན་གནང་སོང་།  བོད་ཀྱི་སྐད་ཡིག་ལྟ་བུར་མཚོན་ན་དེང་སྐབས་བོད་ནང་རྒྱ་ནག་གཞུང་གི་སྲིད་འཛིན་ཞི་ཅིང་ཕིང་གི་དྲག་གནོན་ཆེ་བའི་སྐད་ཡིག་སྲིད་བྱུས་འོག་བོད་མི་རྣམས་ནས་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་བྱེད་པར་དམ་བསྒྲགས་སྔར་བར་ཤུགས་ཆེ་བྱེད་འགོ་བཙུགས་ཤིང་། བོད་མི་རྣམས་རྒྱ་རིགས་སུ་བསྒྱུར་ཐབས་ཀྱི་སྲིད་བྱུས་ངན་པ་སྤེལ་བཞིན་ཡོད། ཅེས་དང་། 

དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་འོས་འགན་དང་ཐབས་བྱུས་དང་འབྲེལ་ཏེ་གསུང་དོན། བོད་མིའི་སྒྲིག་འཛུགས་ཀྱི་ལས་འགན་ཆེན་པོ་གཉིས་རེད། གཅིག་དེ་བོད་ཀྱི་རྩ་དོན་བསྒྲུབ་རྒྱུའམ་བོད་རྒྱའི་དཀའ་རྙོག་བསལ་རྒྱུ་དང་། གཉིས་པ་དེ་བཙན་བྱོལ་བོད་མིའི་བདེ་སྡུག་ལྟ་སྐྱོང་བྱ་རྒྱུ་རེད། དེ་ཡང་ལས་དོན་གང་བྱེད་པ་ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དང་དགོངས་པ་གཙོ་བོར་བཞག་པའི་ཐོག་ནས་བསམ་བློ་དང་རིགས་པ་སྣ་ཚོགས་བརྒྱུད་བསྒྲུབ་ཐབས་བྱེད་ཀྱི་ཡོད། ད་ལྟ་བར་དུ་བོད་ཀྱི་གནད་དོན་སོན་པོར་ལྷག་པ་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཉག་ཅིག་ཡིན་ཞེས་དང་།ང་ཚོས་བོད་ཀྱི་གནད་དོན་འཛམ་གླིང་མི་མང་གིས་ཤེས་ཀྱི་ཡོད་ཤག་བྱེད་ཀྱི་ཡོད་ནའང་། རྒྱ་གར་ཁོ་ནར་མཚོན་ན། ལོ་གཉིས་གསུམ་སྔོན་ལ་ཞིབ་འཇུག་ཅིག་བྱས་པའི་ནང་རྒྱ་གར་མི་མང་བརྒྱ་ཆ་༦༨ ལྷག་གིས་བོད་དོན་ལ་རྒྱབ་སྐྱོར་བྱེད་ཀྱི་ཡོད་མོད། བོད་ཀྱི་གནད་དོན་ཤེས་མཁན་བརྒྱ་ཆ་ ༣༠ ཙམ་ལས་མེད། བོད་པ་མང་ཤོས་གནས་སྡོད་བྱ་ཡུལ་རྒྱལ་ཁབ་ནང་གནས་སྟངས་དེ་ལྟར་ཡིན་ན། རྒྱལ་ཁབ་གཞན་རྣམས་ལ་སྨོས་ཅི་དགོས། དེའི་སྟེང་རྒྱ་ནག་གཞུང་གི་འཁྱོག་བཤད་ཤུགས་ཆེ་དྲགས་ཏེ། བོད་ཀྱི་ལོ་རྒྱུས་དངོས་སུ་བལྟས་ན་མ་གཏོགས་མང་པོ་ཞིག་གིས་བོད་དེ་རྒྱ་ནག་གི་ཆ་ཤས་ཡིན་ཤག་བསམ་གྱི་ཡོད། དེ་ལ་བོད་མི་ཚོས་བོད་དེ་ལོ་རྒྱུས་ཐོག་ནས་རང་བཙན་ཡིན་པའི་གནས་བབ་འགྲེལ་བརྗོད་བྱ་རྒྱུར་འབད་རྩོལ་བྱེད་དགོས་པ་གསུངས་སོང་། 

མཐར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མི་སེར་སྐྱ་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་རྟོགས་པའི་ཐོག་ནས་བོད་ཀྱི་རྩ་དོན་ཐོད་འབད་འབུངས་རྒྱ་ཆེ་གནང་དགོས་པའི་འབོད་སྐུལ་ཞུས་ཏེ་གསུང་བཤད་མཇུག་བསྡུས་གནང་སོང་བ་བཅས།།