༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༣༠ ཉིན་གངས་སྐྱིད་སི་སྤོལ་རྩེད་ཐང་དུ་ཨི་ནིས་ཀེན་ཊར་ཕྲྀ་ཊོམ་ (Enes Kanter Freedom) ལགས་ལ་ཐུགས་རྗེ་ལེགས་འབུལ་མཚོན་བྱེད་ཀྱི་སི་སྤོལ་རྩེད་འགྲན་ཉིན་མཐའ་མའི་མཇུག་སྡོམ་མཛད་སྒོ་ཚོགས་ཡོད།དེ་ཡང་མཇུག་སྡོམ་མཛད་སྒོའི་སྐུ་མགྲོན་གཙོ་བོར་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། གཞན་ཡང་སྐུ་མགྲོན་དུ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས། བདེ་སྲུང་དྲུང་ཆེ་ཀརྨ་རིན་ཆེན་ལགས། བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་བཅས་ཕེབས་ཡོད། སྐབས་དེར་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཐེངས་འདིའི་རྩེད་འགྲན་བརྒྱུད་གཞོན་སྐྱེས་གྲངས་ ༡༦༠ ཙམ་ལ་ཐད་ཀར་ལུས་སེམས་ཀྱི་འཕྲོད་བསྟེན་ལ་ཕན་ཐོགས་བྱུང་ཡོད་སྐོར་དང་། ཏོག་དབྱིབས་གཉན་རིམས་ཀྱི་རྐྱེན་པས་མི་མང་དག་ལ་སེམས་ཀྱི་དཀའ་ངལ་འཕྲད་ཡོད་སྲིད་པས་སེམས་ངལ་སེལ་ཐབས་སུ་རྩེད་རིགས་དང་གཞས་སྣ་གོ་སྒྲིག་ཞུ་གལ་ཆེ་བ་ལྟར་ད་ཐེངས་གོ་སྒྲིག་པ་རྣམས་ནས་རྩེད་འགྲན་འདི་གོ་སྒྲིག་གནང་བར་ཐུགས་རྗེ་ཆེ་ཞུས་སོང་། ཐེངས་འདིར་རྩེད་འགྲན་ནང་དུ་བུའི་རུ་ཁག་བཅུ་དྲུག་དང་བུ་མོའི་རུ་ཁག་བཞི་ཡོད་པ་ནང་ཁུལ་བདུན་ཕྲག་གཅིག་ལྷག་རིང་རྩེད་འགྲན་གྱིས་བུའི་ཐ་མའི་རྩེད་འགྲན་དེ་ཐུ་བྷོད་རུ་ཁག་དང་ཨོལ་ཨིསྚར་རུ་ཁག་བར་དང་། བུ་མོའི་མཐའ་མའི་རྩེད་འགྲན་མུན་སེལ་རུ་ཁག་དང་བྷོས་ཊོན་རུ་ཁག་བར་བརྩེས་སོང་། 

ཨི་ནིས་ཀེན་ཊར་ཕྲྀ་ཊོམ་ལགས་ཀྱིས་དྲང་བདེན་ལ་རྒྱབ་སྐྱོར་གནང་བར་ཐུགས་རྗེ་ལེགས་འབུལ་མཚོན་བྱེད་ཀྱི་སི་སྤོལ་རིམ་སྡུར་རྩེད་འགྲན་དེ་བཞིན་གཞོན་སྐྱེས་ལྔས་གོ་སྒྲིག་གནང་བ་ཞིག་རེད་འདུག་པ་བཅས།།