༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཨོསྟྲེ་ལི་ཡཱའི་གྲོས་ཚོགས་འཐུས་མི་དང་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་སུ་སན་ཀྲེམ་པེ་ལི་ཀྲེན་ (Susan Templeman) ལགས་བསྐྱར་དུ་གྲོས་ཚོགས་འཐུས་མིར་འོས་འདེམས་བྱུང་བར་འཚམས་འདྲི་གནང་ཡོད། 

དེ་ཡང་འཚམས་འཕྲིན་ནང་དུ་ཕྱི་དྲིལ་བཀའ་བློན་མཆོག་གིས། ངས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཚབ་ཞུས་ཏེ་སྐུ་ཉིད་མེ་ཁུ་རི་ (Macquarie) མངའ་ཁོངས་ནས་བསྐྱར་དུ་ཨོསྟྲེ་ལི་ཡཱའི་གྲོས་ཚོགས་འཐུས་མིར་བདམས་ཐོན་བྱུང་བར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། སྐུ་ཉིད་བསྐྱར་འདེམས་བྱུང་བ་ནི་ཨོསྟྲེ་ལི་ཡཱའི་གྲོས་ཚོགས་སུ་སྐུ་ཉིད་ཀྱིས་ལོ་མང་རིང་ཞུ་གཏུག་བྱེད་པའི་བདེན་པ་དང་དྲན་བདེན་ལ་རྒྱལ་ཁ་ཐོབ་པ་ཞིག་རེད། 

སྐུ་ཉིད་ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ཡིན་པའི་ཆ་ནས་སྐུ་ཉིད་ཀྱི་བོད་མིར་རྒྱབ་སྐྱོར་གནང་བ་དེ་ནི་རྒྱལ་སྤྱིའི་བོད་དོན་ལས་འགུལ་ལ་སྙིང་སྟོབས་དང་སེམས་འགུལ་སྐྱེ་གཞིའི་རྒྱུ་ཆགས་ཡོད། ལྷག་པར་སྐུ་ཉིད་ཀྱིས་བཙན་ཁྲིད་ཀྱིས་གར་སོང་ཆ་མེད་གྱུར་བའི་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པའི་གནད་དོན་ཐོག་དམིགས་བསལ་ཞུ་གཏུག་གནང་བ་དེས་བོད་མིའི་སེམས་ལ་ཚོར་སྣང་ཆེན་པོ་བྱུང་ཡོད་པ་མ་ཟད། དེས་༸པཎ་ཆེན་རིན་པོ་ཆེའི་གནད་དོན་གསོན་པོར་གནས་པར་ཡང་ཕན་ཐོགས་ཆེན་པོ་བྱུང་ཡོད། 

རྒྱལ་སྤྱིའི་སྟེང་ཨོསྟྲེ་ལི་ཡཱ་ནི་བོད་མིར་རྒྱབ་སྐྱོར་ཤུགས་ཆེ་ཤོས་གནང་མཁན་གྲས་ཤིག་ཡིན་པ་དང་། ཉེ་ལམ་བོད་མི་མང་དག་ཨོསྟྲེ་ལི་ཡཱར་གནས་སྤོས་བྱས་ཏེ་ཁོ་ཅག་གིས་ཨོསྟྲེ་ལི་ཡཱར་ཕ་ཁྱིམ་གཉིས་པ་ལྟ་བུར་ངོས་འཛིན་བྱེད་ཀྱི་ཡོད། ཁྱེད་ལྟ་བུའི་མཛའ་གྲོགས་ཨོསྟྲེ་ལི་ཡཱའི་གྲོས་ཚོགས་སུ་ཡོད་པར་བརྟེན་བོད་དང་ཨོསྟྲེ་ལི་ཡཱའི་འབྲེལ་ལམ་མ་འོངས་མུ་མཐུད་གནས་ངེས་རེད། ཅེས་དང་།

མཐར་བཀའ་བློན་མཆོག་གིས་བོད་མི་མང་དང་། བོད་ནང་རང་དབང་དང་འགྲོ་བ་མིའི་ཐོབ་ཐང་བསྐྱར་གསོ་ཐུབ་ཐབས་སུ་བཀུར་འོས་གྲོས་ཚོགས་འཐུས་མི་སུ་སན་ལགས་ཀྱིས་མུ་མཐུད་རྒྱབ་སྐྱོར་གནང་བའི་རེ་བ་ཡོད་ཅེས་གསུངས་འདུག །