༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཨོསྟྲེ་ལི་ཡཱའི་གྲོས་ཚོགས་འཐུས་མི་སྐུ་ཞབས་ཝ་རེན་ཨེན་ཆེ་ (Warren Entsch) མཆོག་སླར་ཡང་གྲོས་ཚོགས་འཐུས་མིར་བདམས་ཐོན་བྱུང་བར་འཚམས་འདྲི་གནང་ཡོད། 

དེ་ཡང་སྐུ་ཞབས་ཝ་རེན་ཨེན་ཆེ་མཆོག་ནི། ཨོསྟྲེ་ལི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ཡིན་པ་མ་ཟད། བཀའ་བློན་ནོར་འཛིན་སྒྲོལ་མ་མཆོག་སྔ་ལོའི་ཕྱི་ཟླ་༡༡ ནང་སྐབས་བཅུ་དྲུག་པའི་བཀའ་ཤག་གི་ཕྱི་དྲིལ་བཀའ་བློན་དུ་བསྐོ་གཞག་གནང་རྗེས་འཚམས་འདྲི་གནང་མཁན་ཐོག་མ་ཡིན། 

ཕྱི་དྲིལ་བཀའ་བློན་མཆོག་གིས་འཚམས་འཕྲིན་ནང་། སྐུ་ཉིད་ལི་ཆ་ཧ་ཊ་ (Leichhardt) མངའ་ཁོངས་ནས་ཨོསྟྲེ་ལི་ཡཱའི་གྲོས་ཚོགས་འཐུས་མིར་བསྐྱར་དུ་བདམས་ཐོན་བྱུང་བར་ངས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། 

སྐུ་ཉིད་ལ་རྒྱལ་ཁ་ཐོབ་པ་དེས་ཨོསྟྲེ་ལི་ཡཱའི་མི་མང་གིས་སྐུ་ཉིད་ཀྱི་ཞབས་ཞུར་ཡིད་ཆེས་ཡོད་པ་གསལ་སྟོན་དང་། མི་མང་གི་སྐུ་ཚབ་ཡིན་པའི་ཆ་ནས་གཟེངས་སུ་ཐོན་པའི་ཕྱག་ལས་གནང་བའི་དན་རྟགས་ཤིག་ཡིན། 

སྐུ་ཉིད་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ཡིན་སྟབས་སྐུ་ཉིད་ཀྱི་རྒྱབ་སྐྱོར་ནི་བོད་ལ་རང་དབང་བསྐྱར་གསོ་དང་། བོད་ནང་གི་བོད་མིའི་དཀའ་སྡུག་སེལ་ཐབས་ཀྱི་རྒྱལ་སྤྱིའི་བོད་དོན་ལས་འགུལ་ལ་ཧ་ཅང་གལ་གནད་ཆེན་པོ་ཡིན། དེས་ན། སྐུ་ཉིད་སླར་ཡར་གྲོས་ཚོགས་འཐུས་མིར་བདམས་ཐོན་བྱུང་བ་ནི་བོད་མི་རྣམས་ལ་མཚོན་ན་རེ་བའི་རྒྱུ་ཞིག་ཡིན། 

ཕྲན་རང་སྒེར་ལ་མཚོན་ན་སྔ་ལོའི་ཕྱི་ཟླ་ ༡༡ ནང་ཕྱི་དྲིལ་བཀའ་བློན་དུ་བསྐོ་གཞག་བྱུང་མ་ཐག་སྐུ་ཉིད་ཀྱིས་འཚམས་འདྲིའི་ཕྱག་བྲིས་གནང་བར་སེམས་ཚོར་ཆེན་པོ་བྱུང་ལ་དེར་ཐུགས་རྗེ་ཆེ་ཞུ། སྤྱིར་བོད་ནང་གི་ཆབ་སྲིད་གནས་སྟངས་དང་འགྲོ་བ་མིའི་ཐོབ་ཐང་གནས་སྟངས་ཛ་དྲག་ཆགས་ཡོད་ཀྱང་། བོད་ལ་ཁྱེད་ལྟ་བུའི་མཛའ་གྲོགས་ཡོད་པས་ཕྲན་རང་ཡིད་བློ་བདེ་པོ་འདུག ཅེས་དང་། 

མཐར་ཁོང་མོས། ཁྱེད་ཀྱིས་འཚམས་འཕྲིན་ནང་བཀོད་གནང་བ་ལྟར། མ་འོངས་པར་སྐུ་ཉིད་མཇལ་ནས་བོད་རྒྱའི་དཀའ་རྙོག་སེལ་ཐབས་དང་། བོད་ནང་གི་བོད་མིའི་ཆེ་མཐོང་བསྐྱར་གསོ་ཡོང་ཐབས་ཐད་གྲོས་མོལ་བྱེད་འདོད་ཡོད་ཅེས་གསུངས་འདུག །