༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཨོསྟྲེ་ལི་ཡཱའི་ཕྱི་སྲིད་བློན་ཆེན་གསར་པ་ལྕམ་པེ་ནི་ཝོང་ (Penny Wong) ལགས་སུ་འཚམས་འདྲིའི་ཕྱག་བྲིས་ཤིག་གནང་ཡོད།

དེ་ཡང་འཚམས་འཕྲིན་ནང་དུ་ཕྱི་དྲིལ་བཀའ་བློན་མཆོག་གིས། སྐུ་ཉིད་གསར་དུ་བདམས་ཐོན་བྱུང་བའི་སྲིད་བློན་ཨན་ཊོ་ནི་ཨལ་བྷ་ནི་ས་ (Anthony Albanese) མཆོག་གི་ཕྱི་སྲིད་བློན་ཆེན་དུ་བསྐོ་བཞག་བྱུང་བར་ངས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། 

སྐུ་ཉིད་ཕྱི་རྒྱལ་དུ་འཁྲུངས་པ་ཞིག་ཕྱི་སྲིད་བློན་ཆེན་དུ་བསྐོ་བཞག་གནང་བ་ཐོག་མ་ཡིན་པས། དེས་དེ་སྔོན་སྐུ་ཉིད་ཨིསྟྲེ་ལི་ཡཱའི་ངལ་རྩོལ་ཚོགས་པའི་ཚོགས་མི་དང་། དེ་རྗེས་གནམ་གཤིས་འགྱུར་ལྡོག་དང་ཆུའི་བློན་ཆེན། དེ་ནས་དཔལ་འབྱོར་དང་ཁྲལ་ཁྲིམས་སྟངས་འཛིན་ (Finance and Deregulation) བློན་ཆེན་གྱི་མཛད་འགན་བཞེས་སྐབས་བསྔགས་པར་འོས་པའི་ཕྱག་ལས་གནང་བ་གསལ་སྟོན་བྱས་ཡོད་ཅིང་། ཁྱད་པར་སྐབས་དེར་འཛམ་གླིང་གིས་ཨོསྟྲེ་ལི་ཡཱའི་གནམ་གཤིས་སྲིད་བྱུས་ལ་ཡར་རྒྱས་ཤུགས་ཆེ་ཕྱིན་པ་མཐོང་བ་མ་ཟད། དམིགས་བསལ་སྐུ་ཉིད་ཀྱི་དགོངས་པ་བཞིན་ཨོསྟྲེ་ལི་ཡཱས་མཁའ་རླུང་ལ་དུག་རླངས་གཏོང་རྒྱུ་ཉུང་དུ་བཏང་ཡོད། དེ་བཞིན་སྐུ་ཉིད་ནས་གཞུང་དང་ཚོང་ལས་སྒྲིག་འཛུགས་ཀྱི་ལས་གནས་མཐོ་གྲས་སུ་བུད་མེད་བསྐོ་བཞག་གནང་རྒྱུའི་སྲིད་བྱུས་ལག་བསྟར་ཡོང་བར་སྐུ་ངལ་སྐྱོན་པ་ནི་ཡིད་སྨོན་དང་སེམས་འགུལ་ཐེབས་འོས་པ་ཞིག་རེད། 

གཞན་ཡང་ང་ཚོས་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་བོད་དོན་ཞུ་གཏུག་ཚགས་ཚུད་གནང་བར་ཐུགས་རྗེ་ཆེ་ཞུ། དེ་ཉིད་རྒྱལ་སྤྱིའི་བོད་དོན་ལས་འགུལ་ཤུགས་ཆེར་གཏང་རྒྱུ་ཕན་རླབས་ཆེན་པོ་བྱུང་ཡོད། ཅེས་དང་།

མུ་མཐུད་ཁོང་མོས། འཇོན་ཐང་ལྡན་པའི་དབུ་ཁྲིད་གསར་པའི་ལམ་སྟོན་འོག་ཨོསྟྲེ་ལི་ཡས་མུ་མཐུད་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་ཚབས་ཆེ་གཏོང་བཞིན་པ་དེར་ནུས་ཤུགས་ཆེ་བའི་སྲིད་བྱུས་གཏན་འབེབས་དང་དམ་བསྒྲགས་བཀའ་ཆད་འགེལ་བའི་ཡིད་ཆེས་ཡོད་སྐོར་གསུངས་པ་དང་ཆབས་ཅིག་ཨོསྟྲེ་ལི་ཡཱའི་གཞུང་དམངས་གཉིས་ནས་བོད་དོན་ལ་རྒྱབ་སྐྱོར་དང་། ལྷག་པར་བོད་ཀྱི་ཆབ་སྲིད་བཙོན་པ་གཙོས་པའི་བོད་མི་རྣམས་ལ་ཨོསྟྲེ་ལི་ཡར་གནས་སྡོད་ཆོག་མཆན་གནང་བར་ཐུགས་རྗེ་ལེགས་འབུལ་ཞུས་ཡོད། 

མཐར་བཀའ་བློན་ནོར་འཛིན་སྒྲོལ་མ་མཆོག་གིས་ཨོསྟྲེ་ལི་ཡཱའི་ཕྱི་སྲིད་བློན་ཆེན་ལ་འཚམས་འདྲི་དང་འབྲེལ་འཛིན་སྐྱོང་གསར་པའི་ངོས་ནས་ཕྱི་འབྲེལ་སྲིད་བྱུས་ནང་ཚོང་འབྲེལ་ཁེ་ཕན་ལས་དྲང་བདེན་དང་། མང་གཙོ། འགྲོ་བ་མིའི་ཐོབ་ཐང་རྩ་ཆེ་བར་བརྩི་བའི་ཐུགས་རེ་དང་བཅས་གསུང་འཕྲིན་མཇུག་བསྡུས་འདུག 

གཞན་ཡང་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཕྱི་ལོ་ ༢༠༢༢ ལོའི་རྒྱལ་ཁབ་བཞི་སྦྲེལ་གྱི་ཚོགས་འདུར་ (QUAD Summit) སྲིད་བློན་ཨན་ཊོ་ནི་ཨལ་བྷ་ནི་ས་ལགས་ལྷན་བཅར་ཕྱི་སྲིད་བློན་ཆེན་མཆོག་ལའང་འཚམས་འདྲིའི་ཕྱག་བྲིས་ཤིག་ཕུལ་ཡོད་པ་དང་། དེར་ཕྱི་དྲིལ་བཀའ་བློན་མཆོག་གིས་རྒྱལ་སྤྱིའི་དབུ་ཁྲིད་རྣམས་ནས་རྒྱ་ནག་གཞུང་གི་ཕྱི་གསལ་ནང་གསལ་མེད་པའི་གནད་དོན་དང་། གནམ་གཤིས་འགྱུར་ལྡོག་སྟངས་འཛིན་ཚུལ་བཞིན་བྱེད་ཀྱི་མེད་པར་བཞེངས་ཕྱོགས་མཁྲེགས་པོ་བཟུང་དགོས་པའི་འབོད་སྐུལ་ཞུས་ཡོད།།