༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༠༡ ཉིན་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ནིའུ་ཡོག་ཁུལ་གྱི་བོད་རིགས་གཞོན་སྐྱེས་རྣམས་དང་མཇལ་འཕྲད་ཀྱིས་བོད་དོན་ཞུ་གཏུག་ལས་འགུལ་སྐོར་ངོ་སྤྲོད་དང་། བོད་དང་ཨ་རི་བར་གྱི་ཆབ་སྲིད་ཀྱི་འབྲེལ་ལམ་སོགས་ཀྱི་སྐོར་གསུང་བཤད་གནང་ཡོད། 

དེ་ཡང་སྐབས་བཅུ་དྲུག་པའི་བཀའ་ཤག་གིས་བརྩམས་པའི་བོད་དོན་ཞུ་གཏུག་ལས་འགུལ་གྱི་དམིགས་ཡུལ་གཙོ་བོ་ནི། གཞོན་སྐྱེས་གཙོ་བོར་གྱུར་པའི་བོད་མི་མི་རེ་ངོ་རེས་བོད་ཀྱི་རྩ་དོན་དམིགས་སུ་བཟུང་ནས་འཛམ་གླིང་སྤྱི་ཡོངས་སུ་བོད་དོན་ཞུ་གཏུག་སྔར་ལྷག་གོང་མཐོར་གཏང་རྒྱུ་དེ་ཡིན་པ་དང་། ལས་གཞི་དེ་ཉིད་འདས་ལོའི་ཕྱི་ཟླ་ ༡༡ ཚེས་ ༠༦ ཉིན་དཔལ་ལྡན་སྲིད་སྐྱོང་མཆོག་གིས་སུད་སིར་དབུ་འབྱེད་གནང་ཡོད་པ་རེད། 

ཐོག་མར་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་ལྡན་སྐྱིད་ལགས་ཀྱིས་གཞོན་སྐྱེས་རྣམས་ལ་བོད་དོན་ཞུ་གཏུག་ལས་འགུལ་གྱི་སྤྱི་ཡོངས་ངོ་སྤྲོད་གནང་ཞིང་། སྐབས་དེར་ཁོང་མོས་བོད་དོན་ཞུ་གཏུག་ལས་འགུལ་གྱི་ཚོགས་མིའི་དམིགས་ཡུལ་དང་། ཆ་རྐྱེན། བྱེད་སྒོ། ལས་འགན་སོགས་ཞིབ་ཕྲ་འགྲེལ་བརྗོད་གནང་བ་དང་འབྲེལ། ལྷག་པར་ཨ་རི་དང་ཁེ་ན་ཊ་ཁུལ་དུ་བོད་དོན་ཞུ་གཏུག་ལས་འགུལ་གྱི་བྱེད་སྒོ་རྣམ་གཞག་ངོ་སྤྲོད་དང་། རྒྱལ་ཁབ་དེ་དག་ནང་ཡོད་པའི་བོད་རིགས་གང་མང་ལས་འགུལ་ནང་མཉམ་ཞུགས་ཡོང་བའི་འབོད་སྐུལ་ཞུས་ཡོད། དེ་རྗེས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གཞོན་སྐྱེས་རྣམས་ལ་བོད་དང་ཨ་རི་བར་གྱི་ལོ་རྒྱུས་ཀྱི་འབྲེལ་བ་ངོ་སྤྲོད་གནང་བཞིན་ཕྱི་ལོ་ ༡༩༤༨ ལོའི་ཚོང་འབྲེལ་སྐུ་ཚབ་དང་། ཨ་རི་གསང་བའི་ལས་ཁུངས་ (CIA) ཀྱིས་རྒྱ་ནག་གི་བཙན་འཛུལ་ཁ་གཏད་བཅོག་ཆེད་བོད་མི་འགའ་ལ་དམག་སྦྱོང་སྤྲད་ཚུལ་སྐོར་གསལ་སྟོན་གནང་། ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཕྱི་ལོ་ ༡༩༥༩ དང་། ༡༩༦༡།༡༩༦༥ བཅས་འཛམ་གླིང་མཉམ་འབྲེལ་རྒྱལ་ཚོགས་སུ་བོད་དོན་དང་འབྲེལ་བའི་གྲོས་ཆོད་གསུམ་བཞག་པ་དེ་དག་ལ་འགྲེལ་བརྗོད་དང་བཅས་བོད་དང་ཨ་རི་བར་གྱི་ཆབ་སྲིད་ཀྱི་འབྲེལ་ལམ་སྐོར་ངོ་སྤྲོད་གནང་།

མུ་མཐུད་ཁོང་གིས་བོད་དོན་ཨ་རི་གཞུང་དམངས་གཉིས་ཀྱི་རོགས་སྐྱོར་ཐོབ་ཆེད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་སྐུ་ངལ་འཛེམས་མེད་སྐྱོན་པ་རྣམས་བོད་མི་རྣམས་ཀྱིས་རྗེས་སུ་དྲན་དགོས་པ་དང་། ད་ཆ་ཨ་རིས་བོད་དོན་ལ་རྒྱབ་སྐྱོར་ཚད་མཐོ་གནང་བཞིན་པ་ནི་ཕྱི་ལོ་ ༡༩༧༩ ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨ་རིར་ཆིབས་སྒྱུར་བསྐྱངས་པའི་བཀའ་དྲིན་ལ་བརྟེན་ནས་བྱུང་བ་ཡིན་པ་དང་། དེ་རྗེས་ཆིབས་སྒྱུར་ཞབས་སོར་མུ་མཐུད་འཁོད་ཅིང་། ཨ་རིའི་སྲིད་གཞུང་འདྲ་མིན་དང་ལྷན་འབྲེལ་ལམ་ཇེ་ཟབ་ཏུ་བཏང་གནང་བའི་སྐོར་གསུངས། གཞན་ཡང་དཔལ་ལྡན་སྲིད་སྐྱོང་མཆོག་གིས་ཨ་རིར་གནས་སྡོད་བོད་མིའི་ཁ་གྲངས་དང་བོད་དོན་རྒྱབ་སྐྱོར་བ་ཉུང་ཡང་ཁོང་རྣམས་ཀྱིས་བོད་ཀྱི་གནད་དོན་རྒྱལ་སྤྱིའི་ཚོགས་སྡེས་དོ་སྣང་བྱ་ཡུལ་དུ་གྱུར་བར་སྐུ་ལས་སྐྱོན་པར་ལེགས་གསོལ་བསྔགས་བརྗོད་གནང་བ་མ་ཟད། བོད་མི་སྤྱི་མཐུན་གྱི་འབད་རྩོལ་འོག་དུས་དང་མཐུན་པར་ཞུ་གཏུག་བྱས་ན་རྒྱལ་སྤྱིའི་སྟེང་བོད་དོན་ཞུ་གཏུག་ལ་གྲུབ་འབྲས་གཡུར་དུ་ཟ་བ་ཐོན་ངེས་ཡིན་ཞེས་དང་། དེ་བཞིན་ཁོང་གིས་བོད་དོན་ཞུ་གཏུག་སྔར་ལྷག་གཏོང་བར་བོད་རིགས་གཞོན་སྐྱེས་རྣམས་ཀྱིས་མཉམ་ཞུགས་དང་ཕྱར་གྲུ་མཉམ་འདེགས་གནང་དགོས་པའི་འབོད་སྐུལ་གནང་ཡོད། 

མཐར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་དོན་དང་འབྲེལ་བའི་ཉམས་ཞིབ་རྩོམ་ཡིག་དང་དཔེ་དེབ་ལྟ་ཀློག་གིས་བོད་དོན་སྐོར་སློབ་སྦྱོང་གནང་དགོས་པ་དང་། དེ་ལྟར་བྱས་ན་བོད་དོན་སྐོར་གདེང་ཚོད་ལྡན་པའི་ཐོག་བཤད་ཐུབ་ཅེས་དང་། ཕྱོགས་མཚུངས་བོད་རྒྱའི་དཀའ་རྙོག་སེལ་ཐབས་སུ་བོད་རིགས་གཞོན་སྐྱེས་རྣམས་ཀྱིས་མཉམ་རུབ་ཀྱིས་འབད་རྩོལ་བྱེད་དགོས་པའི་རེ་སྐུལ་ཡང་གནང་ཡོད་པ་བཅས།།