༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕྱི་ལོ་ ༢༠༢༢ ཟླ་བ་ ༠༥ ཚེས་ ༢༨ ནས་དབུ་འཛུགས་ཀྱིས་ཟླ་བ་ ༠༦ ཚེས་ ༡༢ བར་རྒྱ་གར་ལྷོ་ཕྱོགས་ཁུལ་གྱི་བཙན་བྱོལ་བོད་མིའི་གཞིས་ཆགས་ཁག་ཏུ་གཞུང་འབྲེལ་འཚམས་གཟིགས་སུ་ཕེབས་ཀྱི་ཡོད།

དེ་ཡང་ཕྱི་ཚེས་ ༢༨ ཉིན་དཔལ་ལྡན་སྲིད་སྐྱོང་མཆོག་བྷེང་ལོར་གནམ་ཐང་དུ་ཕེབས་འབྱོར་སྐབས་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་ཕེབས་བསུའི་སྣེ་ལེན་ཞུས་ཐོག་ནཱི་ལ་མངྒ་ལ་ལས་རིགས་སྦྱོང་བརྡར་བསྟི་གནས་ཁང་དང་། ཡན་ལག་སྨན་རྩིས་ཁང་བཅས་སུ་འཚམས་གཟིགས་སུ་ཕེབས་ཏེ་ཡན་ལག་སྨན་རྩིས་ཁང་གི་ལས་བྱེད་རྣམས་ལ་གསུང་བཤད་གནང་ཡོད། དེ་རྗེས་བྷེང་ལོར་ལྷོ་སྤྱི་ལས་ཁུངས་དང་བོད་ཁྱིམ་སྡོད་ཁང་དུ་ཕེབས་སྐབས་ཁུལ་དེར་གནས་སྡོད་བོད་མི་རྣམས་ནས་ཕེབས་བསུ་གཟབ་རྒྱས་ཞུས་ཤིང་། སྐབས་དེར་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་བཅུ་དྲུག་པའི་དམ་བཅའ་ལྟར་བཙན་བྱོལ་བོད་མི་རྣམས་ཀྱི་དགོས་མཁོ་རྟོག་ཞིབ་ཆེད་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ཏུ་གཟིགས་སྐོར་ལ་ཕེབས་རྒྱུ་དང་། འཛིན་སྐྱོང་གསར་པའི་དམིགས་ཡུལ། ལས་དོན་བྱེད་ཕྱོགས་སོགས་ཀྱི་སྐོར་ངོ་སྤྲོད་གནང་ཡོད། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྲིད་སྐྱོང་གི་མཛད་འགན་བཞེས་ཏེ་ལོ་གཅིག་ནང་ལ་དྭགས་དང་། ཀ་རྡོར་སྒང་གསུམ། ཨོ་ཊི་ཤ། ཆ་ཏྟཱིས་གར། མཧཱ་རཱཥཊྲ། ཨུཏྟརཱ་ཁནྜ་གཙོས་པའི་བཙན་བྱོལ་བོད་མི་གནས་སྡོད་གཞིས་ཆགས་ཁག་མང་པོའི་ནང་འཚམས་གཟིགས་སུ་ཕེབས་ཡོད་པ་རེད། གཞུང་འབྲེལ་འཚམས་གཟིགས་དེ་དག་ཏུ་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་བཅུ་དྲུག་པས་གྲོས་མོལ་གྱི་ལམ་ནས་བོད་རྒྱའི་དཀའ་རྙོག་སེལ་ཐབས་འབད་རྩོལ་གནང་རྒྱུའི་ནན་བརྗོད་དང་འབྲེལ། དེའི་ཆེད་བོད་མི་སྤྱི་ཡོངས་ཀྱིས་ནུས་པ་མཉམ་སྤུངས་དགོས་རྒྱུ་གལ་འགངས་ཆེན་པོ་ཡིན་པའི་སྐོར་གསུངས། དེ་བཞིན་དཔལ་ལྡན་སྲིད་སྐྱོང་མཆོག་གིས་འཛིན་སྐྱོང་གསར་པས་ཕྱི་གསལ་ནང་གསལ་དང་། ལས་འགན་རང་ཁུར་གྱི་ཐོག་ནས་ལས་དོན་བརྩམ་རྒྱུ་ཡིན་སྐོར་འགྲེལ་བརྗོད་གནང་ཡོད། རྒྱ་ནག་གཞུང་གིས་བོད་ཐོག་མུ་མཐུད་མཁྲེགས་བཟུང་གི་སྲིད་བྱུས་ལག་བསྟར་བྱེད་བཞིན་པའི་སྐབས་བོད་རྒྱའི་དཀའ་རྙོག་སེལ་ཐབས་སུ་བོད་རྒྱ་འབྲེལ་མོལ་ལས་དོན་ཚོགས་ཆུང་ཕྱིར་བསྡུ་དང་འབྲེལ་གཏན་འཇགས་འཐབ་བྱུས་ཚོགས་ཆུང་གསར་འཛུགས་དགོས་གལ་ལྟར་སྔ་ལོའི་ཕྱི་ཟླ་ ༠༨ ནང་གསར་འཛུགས་གནང་ཡོད་སྐོར་དང་། དེའི་ཚོགས་མིར་འབྲེལ་ཡོད་ལྷན་ཁང་ཁག་གི་དྲུང་ཆེ་བསྐོ་བཞག་གིས་ཚོགས་མི་སོ་སོས་ལས་དོན་བརྩམས་ཏེ་དེ་འབྲེལ་སྲིད་སྐྱོང་ལ་སྙན་སེང་དང་བོད་དོན་ཞུ་གཏུག་སླད་ནང་དོན་གྲ་སྒྲིག་གནང་དགོས་སྐོར་འགྲེལ་བརྗོད་གནང་། སྐབས་བཅུ་དྲུག་པའི་བཀའ་ཤག་གི་ལས་གཞི་ཆེ་གྲས་ཤིག་ནི་བོད་དོན་ཞུ་གཏུག་ལས་འགུལ་ཡིན་ཞིང་། དེའི་དམིགས་ཡུལ་གཙོ་བོ་ནི་འཛམ་གླིང་གང་སར་གནས་པའི་བོད་རིགས་གཞོན་སྐྱེས་གཙོ་བོར་གྱུར་བའི་བོད་མི་རྣམས་ནས་བོད་ཀྱི་རང་དབང་འཐབ་རྩོད་རྒྱུན་གནས་ཆེད་རྒྱལ་སྤྱིའི་སྲིད་གཞུང་དང་། གྲོས་ཚོགས། གཞུང་ཁོངས་མིན་པའི་ཚོགས་སྡེ་ཆེ་གྲས་སོགས་ལ་བོད་དོན་ཞུ་གཏུག་བྱེད་རྒྱུ་དེ་ཡིན། 

གཞན་ཡང་དཔལ་ལྡན་སྲིད་སྐྱོང་མཆོག་གིས་དཔལ་ལྡན་བཀའ་ཤག་ནས་མི་འབོར་ཞིབ་བཤེར་དང་། གཞིས་ཆགས་ཁག་ཏུ་ཡུལ་སྐོར་སྤྲོ་འཆམ་པ་མང་དུ་གཏོང་རྒྱུ། བོད་མི་སྡོད་ཁང་མེད་པ་རྣམས་ལ་སྡོད་ཁང་གི་མཐུན་རྐྱེན་སྦྱོར་འཆར་བཅས་ཀྱི་འཆར་གཞི་ཁག་ངོ་སྤྲོད་གནང་ཡོད་པ་བཅས།།