༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༢༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསར་དུ་བདམས་ཐོན་བྱུང་བའི་ཨོསྟྲེ་ལི་ཡཱའི་སྲིད་བློན་ཨན་ཊོ་ནི་ཨལ་བྷ་ན་ས་མཆོག་ལ་དགའ་བསུའི་འཚམས་འཕྲིན་ནང་ཡོད།

དེ་ཡང་འཚམས་འཕྲིན་ནང་དུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ཨོསྟྲེ་ལི་ཡཱའི་སྲིད་བློན་དུ་མང་མོས་འོས་འདེམས་བྱུང་བར་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་སྦྲགས།  ཨོསྟྲེ་ལི་ཡཱའི་མི་མང་གིས་འོས་ཤོག་ལམ་ནས་སྐུ་ཉིད་ཀྱི་དབུ་ཁྲིད་ལམ་སྟོན་ལ་ཡིད་ཆེས་བློ་འགེལ་དང་རེ་བ་བཅོལ་ཡོད། 

ངས་གོ་སྐབས་འདི་བརྒྱུད་ཨོསྟྲེ་ལི་ཡཱ་གཞུང་དམངས་གཉིས་ནས་བོད་ཀྱི་ཆབ་སྲིད་བཙོན་པ་དང་ཁོ་ཅག་གི་ནང་མི་གཙོ་བོར་གྱུར་པའི་བོད་མི་རྣམས་ལ་ཨོསྟྲེ་ལི་ཡར་འགྲོ་བ་མིའི་བདེ་རྩ་དང་གཞིས་ཆགས་བསྐྱར་འཛུགས་ཀྱི་རོགས་སྐྱོར་གནང་བར་བཀའ་དྲིན་རྗེས་དྲན་ཞུ་རྒྱུ་དང་། གཞན་ཡང་ཨོསྟྲེ་ལི་ཡཱ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་བོད་དོན་ཤུགས་ཆེ་གླེང་སློང་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། 

རྒྱ་ནག་གཞུང་གིས་གདུག་རྩུབ་ཆེ་བའི་དབང་བསྒྱུར་འོག་བོད་ནང་གི་བོད་མི་རྣམས་མུ་མཐུད་བཙན་གནོན་སྡུག་སྦྱོང་མྱོང་བཞིན་ཡོད་པ་དང་། དེས་རྐྱེན་པས་རིམ་བཞིན་རིག་གཞུང་རྩ་གཏོར་འགྲོ་ཉེན་ཆེ་ནའང་དེང་སྐབས་ཨོསྟྲེ་ལི་ཡཱ་ཐེ་བའི་མང་གཙོ་དང་ཁྲིམས་ཀྱི་དབང་བསྒྱུར་ལ་དགའ་བའི་རྒྱལ་ཁབ་མང་པོས་རྒྱ་ནག་གི་སྲིད་དབང་སྒེར་འཛིན་གྱི་སྲིད་གཞུང་གདོང་ལེན་བྱེད་ཀྱི་ཡོད། ཅེས་དང་། མཐར་དཔལ་ལྡན་སྲིད་སྐྱོང་མཆོག་གིས་སྲིད་བློན་ཨལ་བྷ་ན་ས་མཆོག་གི་དབུ་ཁྲིད་འོག་ཡོང་འགྱུར་གྱི་དཀའ་སྡུག་ཁག་ལ་གདོང་ལེན་བྱེད་ཐུབ་པ་དང་། ཁོང་གི་ཕྱི་འབྲེལ་སྲིད་བྱུས་ནང་འགྲོ་བ་མིའི་ཐོབ་ཐང་དང་ཆེ་མཐོང་གཙོ་བོ་འཛིན་པའི་ཡིད་ཆེས་ཡོད་ཅེས་གསུངས་ཏེ་འཚམས་འཕྲིན་མཇུག་བསྡུས་གནང་འདུག །