༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ལོ་ ༢༠༢༢ ཟླ་བ་ ༠༥ ཚེས་ ༠༩ ཉིན་ཁེ་ན་ཊ་ཁུལ་གྱི་གཞུང་འབྲེལ་འཚམས་གཟིགས་ཀྱི་མཐའ་མཇུག་ཏུ་ཨོན་ཊོ་རིའོ་ས་གནས་གྲོས་ཚོགས་འཐུས་མི་དང་ཨོན་ཊོ་རིའོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དབུ་ཁྲིད་ལ་དཀར་པོ་ཆེ་ལགས་དང་མཇལ་མོལ་གནང་ཡོད། 

མཇལ་མོལ་གྲུབ་རྗེས་བུ་ཁྲིད་ལ་དཀར་པོ་ཆེ་ལགས་ཀྱིས་ཊི་ཝི་ཊར་དྲ་ལམ་སྟེང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་མཇལ་བར་དགའ་སྤོབས་ཆེ། ཁོང་ཨོན་ཊོ་རིའོ་བོད་རིགས་གནས་སྡོད་ས་གནས་པག་ཊེལ་དུ་ཕེབས་བསུ་ཞུ་རྒྱུ་བྱུང་བས་དགའ་པོ་བྱུང་ཞེས་བཀོད་གནང་འདུག ཐེངས་འདིའི་མཇལ་མོལ་ཐད་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཀྱང་སྤྱི་ཚོགས་དྲ་ལམ་སྟེང་དུ་བུ་ཁྲིད་ལ་དཀར་པོ་ཆེ་ལགས་ཀྱིས་མིག་དཔེ་བཟང་པོས་བཙན་བྱོལ་བོད་མི་གཞོན་སྐྱེས་ཚོར་མུ་མཐུད་སེམས་འགུལ་དང་འགོ་སྣེ་ཁྲིད་པར་དགའ་སྤོབས་ཆེ་ཞིང་། ཁོང་མོས་བོད་ཀྱི་རིག་གཞུང་ཟླ་བ་སྲུང་བརྩི་ཞུ་ཐད་ཀྱི་ཁྲིམས་འཆར་གཏན་འབེབས་གནང་རྒྱུ་གཙོས་པའི་ལས་འཆར་དེ་དག་ལས་བོད་མི་ཞིག་གིས་ཤུགས་རྐྱེན་ཇི་ཚོད་སྤྲོད་ཐུབ་མིན་གསལ་སྟོན་བྱེད། དེ་རིང་ཁོང་མོ་དང་མཇལ་འཕྲད་བྱུང་བར་དགའ་སྤྲོ་ཆེ་ཞེས་གསུངས་འདུག 

གཞན་ཡང་ས་གནས་གྲོས་ཚོགས་འཐུས་མི་བུ་ཁྲིད་ལ་དཀར་པོ་ཆེ་ལགས་ཀྱིས་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས། བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་ཆུང་བཅས་དང་མཇལ་འཕྲད་གནང་འདུག 

དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་ཐེངས་འདིའི་རྒྱལ་ཁབ་གསུམ་གྱི་གཞུང་འབྲེལ་འཚམས་གཟིགས་དང་མཛད་འཆར་ཁག་ཟླ་འདིའི་ཕྱི་ཚེས་ ༡༠ ཉིན་ཡོངས་སུ་མཇུག་སྒྲིལ་ཡོད་པ་རེད།།