༄༅། །ཕྱི་ལོ་ ༢༠༢༢ ཟླ་ ༠༥ ཚེས་ ༠༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཕུན་ཚོགས་སྡེ་བཞི་ཚོགས་ཁང་དུ་བོད་རིགས་མང་ཚོགས་དང་ཐུག་འཕྲད་ཀྱིས་གསུང་བཤད་གནང་ཡོད། 

དེ་ཡང་མཛད་སྒོའི་ཐོག་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས།  ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས། ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་བགྲེས་གཞོན་རྣམ་གཉིས་ཀྱིས་གཙོས་རྒྱུན་ལས་རྣམ་པ། སྲི་ཞུའི་ལས་བྱེད་ཟུར་པ་རྣམ་པ། ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཁྱབ་ཁོངས་སུ་གཏོགས་པའི་ཚོགས་པ་སྐྱིད་སྡུག་ཁག་གི་ཚོགས་གཙོ་དང་རྒྱུན་ལས་རྣམ་པ། ཆོལ་གསུམ་ཟློས་གར་ཚོགས་པའི་ཚོགས་མི་རྣམ་པ། གཟའ་མཇུག་སློབ་གྲྭའི་སློབ་སྤྱི་དང་དགེ་ལས་རྣམ་པ། ཕ་མ་ཚོགས་ཆུང་གི་ཚོགས་མི་རྣམ་པ། དེ་བཞིན་མི་མང་བཅས་ལྷན་འཛོམས་ཀྱིས་ཐོག་མར་གཟའ་མཇུག་སློབ་གྲྭའི་སློབ་ཕྲུག་རྣམས་ཀྱིས་རྔ་རོལ་དང་བཅས་ཚང་མས་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་བོད་དང་བོད་མིའི་རྩ་དོན་ཆེད་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་བའི་རྒྱལ་གཅེས་པ་ཕོ་མོ་རྣམས་ཀྱི་བཀའ་དྲིན་རྗེས་དྲན་དང་། མྱ་ངན་གུས་འདུད་སླད་ངག་བཅད་སྐར་མ་གཅིག་རིང་ཞུས་གྲུབ་མཚམས་ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོས་ལས་བསྡོམས་སྙན་སྒྲོན་གནང་རྗེས་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཕེབས་བསུའི་གསུང་བཤད་གནང་།དེ་ནས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་བསྟན་བདག་བླ་ཆེན་རྣམ་པར་གུས་ཕྱག་སྔོན་དུ་ཕུལ་བའི་ཐོག་དེ་རིང་གི་ཚོགས་འདུར་བཅར་མཁན་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཟུར་པ་རྣམ་པ་དང་། བྱང་ཨ་རིའི་སྐུ་ཚབ་དོན་གཅོད། ཨ་རིའི་ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་གཙོས་པའི་རྒྱུན་ལས་རྣམ་པ་ཡོངས་ལ་ངས་བཀའ་ཤག་སྐབས་བཅུ་དྲུག་པ་དང་ང་རང་སྒེར་གྱི་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། 

ང་ཚོ་ཚང་མས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་སྐོར་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་ཡིན་ཞིང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་སྐོར་ཤེས་པ་ཡིན་ན་ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་རྗེས་སུ་དྲན་ངེས་ཡིན། ང་ཚོ་མང་གཙོ་དང་རང་དབང་ལུང་པའི་ནང་སྡོད་བཞིན་ཡོད་སྟབས་དགོངས་ཚུལ་དང་སྐད་ཆ་བཤད་སྟངས་འགྲིག་མ་འགྲིག་ཕྲན་བུ་ཡོང་གི་ཡོད། འོན་ཀྱང་བོད་སྤྱི་པའི་རྩ་དོན་ལ་ཐུག་དུས་བོད་མི་ཚང་མས་མཐུན་སྒྲིལ་གོང་བུ་གཅིག་གྱུར་གྱིས་འཐབ་རྩོད་བྱེད་ཐུབ་པའི་རེ་བ་རྒྱག་གི་ཡོད། དེ་བཞིན་ང་ཚོ་ནི་བོད་མི་རིགས་ཀྱི་བདེན་པའི་འཐབ་རྩོད་པ་ཞིག་ཡིན་པའི་ཆ་ནས་བོད་ཀྱི་ལོ་རྒྱུས་ཀྱི་གནས་བབ་སྐོར་ཤེས་རྟོགས་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། བོད་ཀྱི་ལོ་རྒྱུས་ཐོག་ནས་བོད་ནི་འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན་ཞིང་། འཕགས་པ་སྤྱན་རས་གཟིགས་དང་བོད་མིའི་དབར་འཛམ་གླིང་གི་ལུང་པ་སུ་གང་ལ་མེད་པའི་ཐུན་མོང་མིན་པའི་དམིགས་བསལ་ཀྱི་འབྲེལ་བ་ཡོད། བོད་བཙན་པོའི་རྒྱལ་རབས་ནས་བོད་སིལ་བུར་ཐོར་བ་དང་། དེ་ནས་ཕག་མོ་གྲུ་པ་དང་། རིན་སྤུངས་པ། སྡེ་པ་གཙང་པ། དགའ་ལྡན་ཕོ་བྲང་བཅས་ཀྱི་བྱུང་རིམ་དང་། རྒྱ་ནག་གིས་བོད་ཀྱི་ལོ་རྒྱུས་སྐོར་འགྲེལ་བཤད་ག་རེ་རྒྱག་གི་འདུག བོད་པས་རང་གི་ལོ་རྒྱུས་སྐོར་འགྲེལ་བཤད་ག་རེ་རྒྱག་གི་འདུག རྒྱལ་སྤྱིའི་ཐོག་ནས་བོད་པའི་ལོ་རྒྱུས་སྐོར་འགྲེལ་བཤད་ག་རེ་རྒྱག་གི་འདུག  དེ་བཞིན་ང་རང་ཚོ་བཙན་བྱོལ་ལ་སླེབས་སྟངས་སོགས་གང་ལྟར་བོད་ཀྱི་ལོ་རྒྱུས་ཀྱི་གནས་བབ་སྐོར་ཤེས་དགོས་པ་ཧ་ཅང་གལ་ཆེན་པོ་ཆགས་ཡོད། ང་ཚོ་བཙན་བྱོལ་ལ་འབྱོར་རྗེས་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་ཆོལ་ཁ་གསུམ་གཅིག་ཏུ་སྒྲིལ་ནས་བོད་ཀྱི་ངོ་བོ་ཞེས་པ་དེ་བསྐྲུན་གནང་མཛད་ཡོད། ཅེས་དང་།གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་ཀྱི་བསྟན་བདག་བླ་ཆེན་རྣམ་པ་དང་། མི་རབས་རྒན་པ་རྣམས་ཀྱིས་ད་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དབུ་འོག་དཔུང་འདེགས་ཞུས་པ་ལ་བརྟེན་ནས་ང་ཚོ་བཙན་བྱོལ་བ་འདྲ་འདྲའི་ནང་ནས་མ་འདྲ་བ་ཆགས་ཡོད། དེར་བརྟེན་དེ་རིང་གི་གོ་སྐབས་འདི་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་བསྟན་བདག་བླ་ཆེན་རྣམ་པ་དང་མི་རབས་རྒན་པ་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། 

ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་རྒྱ་ནག་གི་འགོ་ཁྲིད་ཞི་ཅིང་ཕིང་གི་འོག་རྒྱ་ནག་གཞུང་གིས་བོད་ཀྱི་རིག་གཞུང་དང་སྐད་ཡིག་རྩ་བརླག་ཏུ་གཏོང་གི་ཡོད་པས། བཙན་བྱོལ་དུ་ཡོད་པའི་བོད་མི་རྣམས་ཀྱིས་བོད་ཀྱི་རིག་གཞུང་དང་སྐད་ཡིག་མི་ཉམས་རྒྱུན་འཛིན་བྱེད་རྒྱུ་ཧ་ཅང་གལ་ཆེན་པོ་ཡིན་པ། ཁྲིམས་ལུགས་དབང་འཛིན་དང་། ཁྲིམས་བཟོ་ལྷན་ཚོགས། འཛིན་སྐྱོང་བཀའ་ཤག་དབར་ལྗིད་མཉམ་སྟངས་འཛིན་དགོས་པ། བོད་མིའི་སྒྲིག་འཛུགས་ཀྱི་རང་དབང་ཅན་གྱི་སྡེ་ཚན་ཁག་གིས་རང་དབང་གི་སྒོ་ནས་ལས་དོན་གནང་དགོས་པ། བཀའ་ཤག་སྐབས་བཅུ་དྲུག་པས་བོད་རྒྱའི་དཀའ་རྙོག་སེལ་ཐབས་སུ་གཏན་འཇགས་འཐབ་ཇུས་ཚོགས་ཆུང་གསར་འཛུགས་དང་། བདེ་སྲུང་ལས་ཁུངས་ནས་བོད་ནང་གི་གནས་ཚུལ་མཁོ་སྒྲུབ་གནང་དགོས་པ། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྣམས་ཀྱིས་བོད་ནང་གི་གནས་ཚུལ་ལ་ཉམས་ཞིབ་གནང་དགོས་པ། ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་པ་རྣམས་ཀྱིས་རྒྱལ་ཁབ་སོ་སོའི་གཞུང་དང་། གྲོས་ཚོགས། བསམ་མཛོད་བསྟི་གནས་ཁང་སོགས་ཀྱི་ནང་བོད་ཀྱི་གནས་ཚུལ་མཁོ་སྤྲོད་དང་ཞུ་གཏུག་གནང་དགོས་པ། མ་འོངས་པར་བཀའ་བློན་ཆ་ཚང་བྱུང་བ་ཡིན་ན། འཛིན་སྐྱོང་བཀའ་ཤག་གི་ངོས་ནས་བོད་རྒྱའི་དཀའ་རྙོག་སེལ་རྒྱུ་དང་། རྒྱལ་ཁབ་ཁག་གི་དཔོན་རིགས་རྣམས་ལ་འབྲེལ་བ་འཛུགས་རྒྱུ། བོད་མིའི་སྒྲིག་འཛུགས་དང་མི་མང་གི་དབར་འབྲེལ་བ་དམ་ཟབ་གཏོང་རྒྱུའི་འགན་གཙོ་བོ་འཁུར་རྒྱུ་ཡིན། ཞེས་སོགས་ཀྱི་གསུང་བཤད་གནང་གྲུབ་མཚམས་མང་ཚོགས་ཀྱི་དྲི་བ་ཁག་ལ་ལན་འདེབས་ཁ་གསལ་གནང་ཡོད་པ་བཅས།།