༄༅། །ཕྱི་ལོ་ ༢༠༢༢ ཟླ་ ༠༥ ཚེས་ ༢༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ལྷོ་ཕྱོགས་བྷེང་ལོར་གྲོང་ཁྱེར་དུ་རྟེན་གཞི་བྱས་པའི་༸ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་གཞུང་འབྲེལ་འཚམས་གཟིགས་སུ་ཕེབས་སྐབས་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། ༸ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་ཟླ་བ་ཚེ་རིང་ལགས་ཀྱིས་གཙོས་དགེ་ལས་སློབ་ཕྲུག་དང་། སྨན་རྩིས་གསོ་རིག་མཐོ་སློབ་ཁང་གི་དགེ་ལས་སློབ་ཕྲུག་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དཔལ་ལྡན་སྲིད་སྐྱོང་མཆོག་གིས་༸ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ཚོགས་ཁང་དུ་༸ཏཱ་ལའི་བླ་མ་མཐོ་རིམ་སློབ་གཉེར་ཁང་གི་དགེ་ལས་སློབ་ཕྲུག་དང་སྨན་རྩིས་གསོ་རིག་མཐོ་སློབ་ཁང་གི་དགེ་ལས་སློབ་ཕྲུག་ཡོངས་ལ་གསུང་བཤད་གནང་ཡོད་པ་དང་། གསུང་བཤད་ཀྱི་མཛད་སྒོར་ཕྱོགས་བཞུགས་བོད་མི་མང་སྤྱི་འཐུས་རིག་འཛིན་ལྷུན་གྲུབ་ལགས་དང་། ལྷོ་སྤྱི་འཇིགས་མེད་ཚུལ་ཁྲིམས་ལགས། ༸ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་ཟླ་བ་ཚེ་རིང་ལགས་ཀྱིས་གཙོས་དགེ་ལས་སློབ་ཕྲུག་དང་། སྨན་རྩིས་གསོ་རིག་མཐོ་སློབ་ཁང་གི་དགེ་ལས་སློབ་ཕྲུག་སོགས་ཕེབས་ཡོད།
དེ་ཡང་མཛད་སྒོའི་ཐོག་མར་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་ཐེངས་འདིའི་དཔལ་ལྡན་སྲིད་སྐྱོང་མཆོག་གི་རྒྱ་གར་ལྷོ་ཕྱོགས་ཁུལ་དུ་གཞུང་འབྲེལ་འཚམས་གཟིགས་སྐོར་ངོ་སྤྲོད་གནང་གྲུབ་མཚམས་༸ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་སྤྱི་ཟླ་བ་ཚེ་རིང་ལགས་ཀྱིས་༸ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སྐོར་ངོ་སྤྲོད་གསུང་བཤད་གནང་ཡོད།
དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། རྒྱ་གར་གཞུང་གི་ཐུགས་རྗེ་བཀའ་དྲིན་ལ་བརྟེན་ནས་བཙན་བྱོལ་བོད་མི་རྣམས་ཀྱིས་རང་གི་ཆོས་དང་། རིག་གཞུང་། སྐད་ཡིག་མི་ཉམས་རྒྱུན་འཛིན་བྱས་ཐུབ་ཡོད་པས་རྒྱ་གར་གཞུང་མང་གཉིས་ནི། བཙན་བྱོལ་བོད་མི་རྣམས་ལ་མཚོན་ན་བཀའ་དྲིན་ཤིན་ཏུ་ཆེན་པོ་ཡིན་པའི་སྐོར་དང་། ན་ནིང་ཕྱི་ཟླ་ ༥ ནང་སྲིད་སྐྱོང་གི་ཐུགས་འགན་བཞེས་པ་ནས་བཟུང་ད་བར་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ ༢༥ ལ་གཞུང་འབྲེལ་འཚམས་གཟིགས་སུ་ཕེབས་ཏེ་བཀའ་ཤག་སྐབས་བཅུ་དྲུག་གི་དམིགས་ཡུལ་དང་ལས་དོན་གནང་ཕྱོགས། དེ་བཞིན་མང་ཚོགས་ཀྱི་དཀའ་ངལ་དང་དགོས་མཁོའི་སྐོར་རྒྱུས་ལོན་གནང་འགོ་བཙུགས་ཟིན་པའི་སྐོར་གསུངས་ཡོད།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་བཀའ་ཤག་གསར་པའི་ངོས་ནས་གཏན་འཇགས་ཐབས་བྱུས་ཚོགས་ཆུང་གསར་འཛུགས་གནང་སྟེ་བོད་རྒྱའི་དཀའ་རྙོག་སེལ་ཐབས་གནང་བཞིན་པའི་སྐོར་དང་། མ་འོངས་པར་བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་ནང་འཛིན་སྐྱོང་གནང་ཕྱོགས་མཐའ་དག་ཤོག་བུའི་སྟེང་ནས་མིན་པར་དྲ་ཐོག་ནས་འཛིན་སྐྱོང་གནང་རྒྱུ་ཡིན་པ། མི་འབོར་ཞིབ་བཤེར་གནང་རྒྱུ་ཡིན་པ། བོད་པའི་གཞོན་སྐྱེས་རྣམས་ཀྱིས་བོད་ཀྱི་དངོས་ཡོད་ལོ་རྒྱུས་སྐོར་ཤེས་རྟོགས་བྱེད་དགོས་པ། བཀའ་ཤག་སྐབས་བཅུ་དྲུག་པས་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱའི་དཀའ་རྙོག་སེལ་ཐབས་གནང་རྒྱུའི་ཆོད་སེམས་བརྟན་པོ་ཡོད་པ་མ་ཟད། ལས་དོན་ཇི་ཞིག་བརྩམས་ཀྱང་ཕྱི་གསལ་ནང་གསལ་གནང་རྒྱུ་ཡིན་པ། དེ་བཞིན་བོད་མི་རྣམས་ཀྱིས་བོད་སྤྱི་པའི་རྩ་དོན་སླད་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལྟར་ནུས་པ་མཉམ་སྤུངས་གནང་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་ཡོད་པ་བཅས།།
