༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༢༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཊལ་ཧོར་ཕུན་ཚོགས་གླིང་བོད་མིའི་གཞིས་ཆགས་ནས་བཞུགས་སྒར་རྡ་སར་ཆེད་མངགས་གནས་མཇལ་དུ་ཕེབས་པའི་རྒན་རྒོན་དང་གཞོན་སྐྱེས་བརྒྱད་ཅུ་ཙམ་ལ་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས། ཁྱེད་རང་ཚོ་སྐལ་པ་བཟང་པོ་བྱུང་བ་རེད། ནད་ཡམས་ཀྱི་རྐྱེན་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མི་མང་ལ་མཇལ་ཁ་སྩལ་མ་ཐུབ་ནས་ལོ་གཉིས་ཙམ་ཕྱིན་པ་རེད། ད་ལྟ་མཇལ་འཕྲད་གནང་རྒྱུ་འགོ་བཙུགས་ནས་ཟླ་བ་འགའ་ཤས་མ་གཏོགས་ཕྱིན་མེད། དེ་རིང་ཁྱེད་ཚོར་གོ་སྐབས་བཟང་པོ་ཐོབ་པ་འདི་དཔལ་ས་སྐྱ་པའི་བརྟན་བཞུགས་བསྟར་འབུལ་གནང་བ་བརྒྱུད་ཐོབ་པ་རེད། དེ་ཡང་དཔལ་ས་སྐྱའི་༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་མཆོག་གིས་དབུས་པའི་༸སྐྱབས་མགོན་༸གོང་མ་ཁྲི་འཛིན་ཞེ་གཉིས་པ་དང་ཞེ་གསུམ། མ་འོངས་ས་སྐྱ་ཁྲི་འཛིན་རྣམ་པ་ཚང་མ་ས་གནས་གཅིག་ཏུ་ལྷན་འཛོམས་གནང་རྒྱུ་དཀོན་པོ་རེད། ད་ལན་དཔལ་ས་སྐྱའི་༸སྐྱབས་མགོན་༸གོང་མ་ཁྲི་ཆེན་རིན་པོ་ཆེ་མཆོག་གིས་དབུས་པའི་ས་སྐྱའི་ཕུན་ཚོགས་ཕོ་བྲང་དང་། སྒྲོལ་མ་ཕོ་བྲང་གི་གདུང་སྲས་རྣམ་པ་ཚང་མ་མཇལ་རྒྱུ་བྱུང་བ་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུ་རྒྱུ་བྱུང་བ་ནི་དཔེ་མི་སྲིད་པའི་གོ་སྐབས་བཟང་པོ་རེད་ཅེས་དང་།མིའི་མི་ཚེའི་ནང་ལ་དཀའ་ངལ་འཕྲད་པའི་དུས་ཚོད་གཉིས་རེད། གཅིག་ནི་ནད་ན་ཚ་བྱུང་བའི་སྐབས་དཀའ་ངལ་ཆེན་པོ་རེད། དེ་དུས་མི་མང་གི་བདེ་བ་སྡུག་བསྔལ་ལྟ་དགོས་པ་ང་ཚོའི་ལས་འགན་རེད། གཞན་ཞིག་ནི་དགུང་ལོ་བགྲེས་པོ་ཆགས་རྗེས་ལྟ་རྟོག་བྱེད་མཁན་བུ་ཕྲུག་མེད་པའི་སྐབས་རེད། དེ་དག་མིའི་མི་ཚེ་ནང་དཀའ་ངལ་ཆེ་ཤོས་ཤིག་རེད། དཀའ་ངལ་དེ་གཉིས་བོད་མིའི་སྒྲིག་འཛུགས་ནས་ལྟ་རྟོག་ཐུབ་པ་བྱེད་དགོས། དེ་ལྟར་བྱེད་མ་ཐུབ་ན་ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཇི་ཙམ་སྒྲུབ་ཀྱི་ཡོད་ཅེས་བཤད་ནའང་། དོན་དངོས་སུ་བཀའ་སྒྲུབ་ཀྱི་མེད་པ་གསལ་པོ་ཆགས་ཀྱི་ཡོད་ཅེས་གསུངས་སོང་། 

གཞན་ཡང་དཔལ་ལྡན་སྲིད་སྐྱོང་མཆོག་གིས་དེང་སྐབས་འཛམ་གླིང་གི་ཆབ་སྲིད་དང་སྤྱི་ཚོགས་ཀྱི་འགྱུར་བ་མྱུར་པོ་འགྲོ་བཞིན་པའི་སྐབས་ང་ཚོའི་གནས་སྟངས་ལ་ཞིབ་འཇུག་ལེགས་པོ་བྱས་ཏེ་གོ་སྐབས་དམ་འཛིན་བྱེད་རྒྱུ་གལ་གནད་ཆེན་པོ་ཡིན་པ་དང་། བོད་མིའི་སྒྲིག་འཛུགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་ལས་དོན་བརྩམ་རྒྱུ་ཡིན་སྐོར། དེ་བཞིན་ཕྱི་ལོ་ ༢༠༠༨ ནས་བཟུང་བོད་ནས་གསར་དུ་ཕེབས་མཁན་བོད་མི་ཉུང་དུ་ཕྱིན་པ་དང་། དེ་ལ་བརྟེན་ནས་བཙན་བྱོལ་བོད་མིའི་སློབ་གྲྭ་ཁག་གི་ནང་སློབ་ཕྲུག་ཉུང་དུ་འགྲོ་བཞིན་པའི་དཀའ་ངལ་ཐད་དཔལ་ལྡན་སྲིད་སྐྱོང་མཆོག་གིས་དེ་དག་དུས་ཀྱི་འགྱུར་བ་ཞིག་ཡིན་པས་དེ་ལ་སུས་ཀྱང་བཀག་ཐུབ་ཐབས་མེད་ཀྱང་། འགྱུར་བ་འགྲོ་ཚུལ་ལ་ཚོད་དཔག་བྱ་ཕྱིར་གྲངས་ཐོ་གལ་གནད་ཆེན་པོ་ཡིན་པ་དང་། དེ་ལ་བརྟེན་ནས་མ་འོངས་འཆར་གཞི་སྒྲིག་སྟེ་དུས་ཀྱི་འགྱུར་བ་ལ་གདོང་ལེན་བྱ་དགོས་པའི་ལམ་སྟོན་གནང་ཡོད། ཕྱོགས་མཚུངས་བོད་མི་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ཞུ་དགོས་པ་ཧ་ཅང་གལ་གནད་ཆེན་པོ་ཡིན་པའི་སྐོར་ལ་དཔལ་ལྡན་སྲིད་སྐྱོང་མཆོག་གིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ལ་བརྟེན་ནས་ད་ལྟ་ང་ཚོའི་སྤྱི་ཚོགས་ཚགས་ཚུད་གནས་ཏེ་མུ་མཐུད་བོད་ཀྱི་འཐབ་རྩོད་གསོན་པོ་གནས་ཐུབ་པ་བྱུང་ཡོད། འཛམ་གླིང་གཞན་དང་བསྡུར་ན་མི་འབོར་འབུམ་གཅིག་དང་ཁྲི་གསུམ་ལས་མང་བའི་སྐྱབས་བཅོལ་བ་མང་པོ་ཡོད། ང་ཚོར་མི་འབོར་འབུམ་གཅིག་དང་ཁྲི་གསུམ་ལས་མེད་ཀྱང་ལོ་དྲུག་བཅུའི་རིང་ང་ཚོའི་མུ་མཐུད་འཐབ་རྩོད་གནས་ཐུབ་ཡོད།  དེ་ཚོ་ཚང་མ་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་རིས་སུ་མ་ཆད་པའི་བསྟན་བདག་བླ་ཆེན་རྣམ་པའི་ཐུགས་རྗེ་བཀའ་དྲིན་དང་། མི་རབས་རྒན་པ་རྣམས་ཀྱིས་སྐུ་ངལ་སྐྱོན་པ་ལ་བརྟེན་ནས་བྱུང་བ་རེད། དེ་བཞིན་བོད་ནང་ཡོད་པའི་བོད་མི་རྣམས་ཀྱིས་སྙིང་སྟོབས་ཞུམ་མེད་ཀྱིས་རང་གི་སྲོག་ཡན་ཆད་བློས་བཏང་གིས་སྐུ་ལས་སྐྱོན་གྱི་ཡོད་པས། ང་ཚོ་བཙན་བྱོལ་རང་དབང་ལུང་པའི་ནང་ཡོད་པའི་བོད་མི་རྣམས་ཀྱིས་དཀའ་ལས་ཕྲན་བུ་བརྒྱབ་མ་ཐུབ་ན་༸རྒྱལ་བ་རིན་པོ་ཆེའི་བཀའ་དགོངས་བརྩི་རྒྱུ་དང་དབུ་འོག་དཔུང་འདེགས་ཞེས་པ་ཁ་སྟོང་པའི་སྐད་ཆ་རེད་ཅེས་གསུངས། 

གཞན་ཡང་དཔལ་ལྡན་སྲིད་སྐྱོང་མཆོག་གིས་རྒན་རྒོན་རྣམས་ད་ཆ་ལོ་ན་བགྲེས་པོ་ཡིན་སྟབས་ཐུགས་བག་ཕེབས་པོ་གནང་ནས་བཞུགས་དགོས་པ་དང། གཞོན་སྐྱེས་རྣམས་ནས་ཕ་མའི་བཀའ་དྲིན་དྲན་བསམ་པའི་སྒོ་ནས་དྲིན་གསབ་དགོས་པ། དེ་བཞིན་བོད་མི་ནང་ཁུལ་སྐབས་རེ་བསམ་བློ་མཐུན་མིན་ཡོང་སྲིད་ནའང་དགོས་སྙིང་བོད་སྤྱི་པའི་ཐོག་ལ་ནུས་པ་སྤུང་རྒྱུ་གལ་གནད་ཆེན་པོ་ཡིན་པ་སོགས་ཀྱི་སྐོར་གསུང་བཤད་གནང་ཡོད། 

ད་ཐེངས་ཊལ་ཧོར་ཕུན་ཚོགས་གླིང་བོད་མིའི་གཞིས་ཆགས་ཀྱི་རྒན་རྒོན་དང་གཞོན་སྐྱེས་བསྡོམས་མི་གྲངས་བརྒྱད་ཅུ་ཙམ་ཞིག་བཞུགས་སྒར་རྡ་སར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་། གནས་མཇལ་དུ་བཅར་ཡོད་པ་དང་། གནས་མཇལ་གོ་སྒྲིག་པས་འགྲེལ་བརྗོད་གནང་བ་ལྟར་ན་ཐེངས་འདིའི་གནས་མཇལ་དེར་ཨ་རིར་གནས་སྡོད་ཊལ་ཧོར་གཞིས་མི་བསྟན་འཛིན་རྒྱལ་པོ་ལགས་དང་ཁོང་གི་གྲོགས་འཁོར་འགས་དཔལ་འབྱོར་མཐུན་རྐྱེན་སྦྱར་འདུག་པ་དང་། གནས་མཇལ་བ་རྣམས་ལ་ཟླ་འདིའི་ཕྱི་ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཟིམ་ཆུང་མཇལ་ཁ་སྩལ་རྒྱུ་ཡིན་འདུག་པ་བཅས།།