༄༅། །ཕྱི་ལོ་ ༢༠༢༢ ཟླ་ ༠༥ ཚེས་ ༠༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཌ་གངས་ལྗོངས་ཆོས་ལྡན་གླིང་གི་ཚོགས་ཁང་དུ་ཊོ་རོན་ཊོ་ས་གནས་བོད་རིགས་གཞོན་སྐྱེས་རྣམས་དང་ཐུག་འཕྲད་ཀྱིས་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་ཀྱི་ལོ་རྒྱུས་དང་། འཕགས་བོད་གཉིས་ཀྱི་གནའ་དེང་གི་འབྲེལ་བ། བོད་ལ་འཛམ་གླིང་གི་ཡང་རྩེ་དང་། འཛམ་གླིང་གི་སྣེ་གསུམ་པ། ཨ་ཤི་ཡའི་ཆུ་མཛོད་ཅེས་འགྲེལ་བཤད་རྒྱག་གི་ཡོད་པ་སོགས་ཀྱི་སྐོར་གསུངས་པ་མ་ཟད། བོད་རིགས་གཞོན་སྐྱེས་རྣམས་ཀྱིས་བོད་ཀྱི་བདེན་པའི་འཐབ་རྩོད་རྒྱུན་སྐྱོང་དང་། བོད་ཀྱི་རིག་གཞུང་མི་ཉམས་རྒྱུན་འཛིན་གནང་དགོས་པའི་གལ་གནད་སྐོར་གསུངས་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས། ངའི་མི་རབས་འདི་ཟམ་པ་ལྟ་བུའི་མི་རབས་ཤིག་ཡིན་པས། བོད་པའི་མི་རབས་གསར་པའི་གཞོན་སྐྱེས་དང་མི་རབས་རྒན་པ་རྣམས་ཀྱི་དབར་འབྲེལ་བ་བཟོ་དགོས་པ་ང་ཚོའི་འོས་འགན་རེད། དེར་བརྟེན་ང་ས་ཕྱོགས་གང་དུ་ཕྱིན་ཡང་བོད་པའི་མི་རབས་གསར་པའི་གཞོན་སྐྱེས་རྣམས་དང་ཐུག་འཕྲད་བྱེད་རྒྱུ་དེ་གཙོ་འདོན་བྱེད་ཀྱི་ཡོད་ལ། དེ་ནི་བཀའ་ཤག་སྐབས་བཅུ་དྲུག་པའི་ལས་དོན་གཙོ་བོ་ནང་གི་གཅིག་ཡིན། ཞེས་དང་། གཞིས་ལུས་བོད་མིའི་རང་དབང་གི་མགྲིན་ཚབ་པ་ཡིན་པའི་ཆ་ནས་ང་ཚོས་ད་བར་འགན་འཁུར་ཞུས་དང་ཞུ་མུས་ཡིན། རིམ་པས་རྣམ་པ་ཚོས་འགན་འཁུར་གནང་དགོས། རྣམ་པ་ཚོས་འགན་འཁུར་གནང་མ་ཐུབ་ཚེ་བོད་མིའི་བདེན་པའི་འཐབ་རྩོད་དེ་ཡལ་འགྲོ་ཡི་རེད། ཅེས་གསུངས།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས། འདི་ལོ་ཕྱི་ཟླ་ ༤ ནས་བཟུང་བཀའ་ཤག་སྐབས་བཅུ་དྲུག་པའི་ངོས་ནས་དང་བླངས་བོད་དོན་ཞུ་གཏུག་ལས་འགུལ་འགོ་བརྩམས་ཡོད་པ་དང་། བོད་མི་རྣམས་ཀྱིས་ས་གནས་སུ་བོད་ཀྱི་ས་ཁྲ་ཆེན་པོ་ཞིག་ཉར་བ་ཡིན་ན་བོད་སྐོར་ཤེས་རྟོགས་ཡོང་བར་ཕན་ཐོགས་ཡོད་སྐོར་དང་། དེ་བཞིན་བོད་ཀྱི་ལོ་རྒྱུས་སྐོར་སློབ་སྦྱོང་གནང་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་ཡོད།
དེ་རྗེས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་དང་བླངས་བོད་དོན་ཞུ་གཏུག་ལས་འགུལ་སྐོར་ངོ་སྤྲོད་དང་། བོད་པའི་གཞོན་སྐྱེས་རྣམས་དང་བླངས་བོད་དོན་ཞུ་གཏུག་ལས་འགུལ་ནང་གང་མང་མཉམ་ཞུགས་གནང་དགོས་པའི་གལ་གནད་སྐོར་གསུངས་པ་མ་ཟད། དོགས་འདྲི་ཁག་ལ་ལན་འདེབས་གནང་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་ཊོ་རོན་ཊོ་ཁུལ་གྱི་རྒྱ་རིགས་མང་གཙོ་དོན་གཉེར་བ་དང་། ཡུ་གུར། ཐའེ་ཝན། ཧོང་ཀོང་བཅས་ཀྱི་སྐུ་ཚབ་རྣམས་དང་ཐུག་འཕྲད་གནང་ཡོད་པ་མ་ཟད། ཕྱི་ཚེས་ ༧ ཉིན་ཊོ་རོན་ཊོ་ས་གནས་ཀྱི་ཆོས་ཚོགས་ཁག་ ༡༢ དང་། ས་གནས་ཀྱི་ཚོགས་པ་སྐྱིད་སྡུག་ཁག་ ༡༤ བཅས་ཀྱི་སྐུ་ཚབ་དང་ལྷན་ཐུག་འཕྲད་གནང་ཡོད་པ་བཅས།།
