༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་
དེ་ནས་སྐུ་ཚབ་དོན་གཅོད་ལགས་ནས་ན་ནིང་ཕྱི་ཟླ་ ༤ པར་བློན་ཆེན་མཆོག་དང་མཇལ་འཕྲད་བྱུང་སྟེ་ཡུན་ཙམ་རིང་ལོ་གཅིག་ཕྱིན་ཚར་སོང། གུས་པའང་སྐུ་ཚབ་དོན་གཅོད་ཀྱི་འགན་བླངས་ནས་ལོ་གཅིག་ལྷག་རིང་ཐའེ་ཝན་གྱི་ཕྱི་སྲིད་གནས་སྟངས་དང། རྒྱལ་ནང་གི་དཔལ་འབྱོར་འཕེལ་ཕྱོགས། དམིགས་བསལ་ནད་ཡམས་བཀག་འགོག་སོགས་སྐོར་དཀའ་ངལ་མང་པོར་གདོང་ལེན་གནང་སྟེ་གྲུབ་འབྲས་རྨད་དུ་བྱུང་བར་འཚམས་འདྲི་ཞུ་རྒྱུ་དང། ཐའེ་ཝན་གཞུང་དང་མི་མང་ནས་༸གོང་ས་མཆོག་ལ་ཆེ་མཐོང་དང་དད་མོས། བོད་མི་ཚོར་མཛའ་བཤེས་ཀྱི་འབྲེལ་བ་སྐྱོང་བཞིན་པར་ཐུགས་རྗེ་ཆེ་ཞུས་པ་དང་ཆབས་ཅིག་དེ་རིང་དངོས་སུ་ཐུག་འཕྲད་དགོས་པའི་གནད་དོན་སྐོར་གསུངས་དོན།
༡༽ བཙན་བྱོལ་བོད་མིའི་ཕྱིར་བསྐྱོད་ལག་དེབ་སེར་པོའི་ཐོངས་མཆན་ཞུ་ཕྱོགས་སྐོར་དཀའ་ངལ་ཆེན་པོ་ཞིག་འཕྲད་བཞིན་པར་བར་ལམ་སྲིད་བློན་ལས་ཁུངས་ནས་འབྲེལ་ཡོད་བློན་ཆེན་ལས་ཁུངས་ཁག་བར་གོ་བསྡུར་གནང་སྟེ་ད་ལྟའི་ཆར་གུ་ཡང་གང་འཚམས་གཏོང་རྒྱུའི་ཁྲིམས་འཆར་གྲོས་ཚོགས་སུ་ཕུལ་ཟིན་པའི་སྐོར་ཕྱི་མི་གནས་སྤོས་ལས་ཁུངས་ནས་འགྲེལ་བརྗོད་གནང་བཞིན་འདུག་ན་དམིགས་བསལ་ཐུགས་རྗེ་ཆེ་ཞུ་རྒྱུ་དང། ང་ཚོ་བོད་མི་ཚོར་རྒྱ་ཡིག་མཁྱེན་མཁན་གྱི་ཆོས་དགེ་དང་གཞུང་གི་ལས་བྱེད་མང་པོ་ཞིག་དགོས་སྟབས། དཀའ་ངལ་དེ་སེལ་རྗེས་ཐའེ་ཝན་དེ་བཞིན་རྒྱ་ཡིག་སློབ་སྦྱོང་གི་བསྟི་གནས་སུ་འགྱུར་ཐུབ་རྒྱུར་མཐུན་སྦྱོར་ཡོང་བའི་རེ་བ་ཞུས།
༢༽ ཞུ་དོན་གཉིས་པ་ནི་ད་ལྟའི་ཆར་ཐའེ་ཝན་གྱི་དཔལ་འབྱོར་ལྷོ་ཕྱོགས་སུ་རྒྱ་བསྐྱེད་གཏོང་རྒྱུའི་འཐབ་བྱུས་འོག བོད་མི་ཚོ་རྒྱ་གར་ལ་འཚར་ལོངས་བྱུང་བ་དང་སློབ་སྦྱོང་བྱས་པ། རྒྱ་གར་སྤྱི་ཚོགས་ལ་གོམས་འདྲི་དང་རྒྱུས་མངའ་ཆེན་པོ་ཡོད་སྟབས། བོད་པ་གཞོན་སྐྱེས་ཚོས་ཐའེ་ཝན་དུ་ཟབ་སྦྱོང་སྤྲད་དེ་མཐའ་མ་ཐའེ་ཝན་གྱི་བཟོ་གྲྭ་དང་ཚོང་ལས་ཁང་གི་ངོ་ཚབ་ཐོག་རྒྱ་གར་དུ་ཕྱག་ལས་བྱེད་དུ་འཇུག་ན་ཕྱོགས་ཕན་ཚུན་ལ་གཉིས་ཕན་གྱི་དགེ་མཚན་ཆེན་པོ་ཡོད་ངེས་སྐོར་སོགས་ཞུས་སྐབས། བློན་ཆེན་མཆོག་ནས་ ༢༠༠༣ ལོར་ཁོང་ཐའེ་བོད་འབྲེལ་བ་ཐེབས་རྩའི་དྲུང་ཆེའི་འགན་བཞེས་སྐབས་ཐའེ་བོད་གཉིས་དབར་གྱི་འབྲེལ་ལམ་རྒྱ་ཆེ་བཏང་རྒྱུར་ཤུགས་ཆེན་པོ་བརྒྱབ་མྱོང་ཡོད་པ་དང། བོད་མིའི་གནས་སྟངས་ལ་རྒྱུས་མངའ་ཆེན་པོ་ཡོད་སྟབས་མ་འོངས་པར་མུ་མཐུད་དེའི་ཐད་ཤུགས་སྣོན་བརྒྱབ་རྒྱུའི་དགོང་ཚུལ་གསུངས།
༣༽ ཞུ་དོན་གསུམ་པའི་སྐོར་སྐུ་ཚབ་དོན་གཅོད་ལགས་ནས་དེང་སང་ཐའེ་ཝན་དུ་མི་སུ་དང་ཐུག་ནའང་ཚང་མས་ཁ་གཅིག་གྲགས་༸གོང་ས་༸སྐྱབས་མགོན་ཆེན་པོ་མཆོག་ཐའེ་ཝན་དུ་ཆིབས་སྒྱུར་གནང་ཐུབ་རེ་ཡོད་མེད་ཀྱི་སྐད་ཆ་འདྲི་ཡི་འདུག་ལ། ཐའེ་ཝན་གྱི་དད་ལྡན་མང་ཚོགས་དང་གཞུང་འབྲེལ་མིན་པའི་ཚོགས་པ། ཆོས་ཚོགས་ཁག་བཅས་ནས་འདི་ག་དོན་ཁང་བརྒྱུད་ཐའེ་ཝན་གཞུང་ལ་སྙན་ཞུ་འབུལ་རོགས་ཞེས་གསུང་གི་འདུག་ན། དེ་རིང་སྙན་ཞུ་ཡིག་ཐོག་ཏུ་ཡོད་པ་ཁག་ཕྱོགས་སྒྲིག་ཞུས་ཏེ་འདིར་བསྣམས་ཡོད་སྟབས་གོང་རིམ་སྲིད་འཛིན་གྱི་མདུན་ཅོག་ཏུ་འབུལ་ཐུབ་པ་གནང་རོགས་ཞེས་ཞུས་སྐབས། བློན་ཆེན་མཆོག་ནས་དེ་དོན་བསྒྲུབ་ཆོག་པའི་ཁས་ལེན་དང། ཕྱི་ལོ་ ༢༠༠༩ ལོར་༸གོང་ས་མཆོག་ཐའེ་ཝན་དུ་ཆིབས་སྒྱུར་བསྐྱངས་སྐབས་ཐའེ་ཝན་སྤྱི་ཚོགས་ཁྱོན་ཡོངས་ལ་སེམས་འགུལ་ཐེབས་སྟངས་དང། ༢༠༢༠ ལོར་སྲིད་འཛིན་ཟུར་པ་སྐུ་ཞབས་ལི་ཏིང་ཧུའེ་ལགས་དགོངས་པ་རྫོགས་སྐབས་༸གོང་ས་༸སྐྱབས་མགོན་ཆེན་པོ་མཆོག་ནས་ཐུགས་གསོའི་འཚམས་འཕྲིན་གནང་བར་མྱ་ངན་ཞུས་མཁན་ཚང་མ་སེམས་གསོ་ཆེན་པོ་ཐེབས་པའི་སྐོར་སོགས་གསུངས་རྗེས། དེའི་སྐོར་གནས་ཚུལ་ཇི་ཆགས་དོན་ཁང་ལ་ལྗགས་ལན་ཡོད་པ་ཞུ་རྒྱུ་ཡི་ཞེས་གསུངས།
གཞན་ཡང་ཕྱི་ཚེས་ ༢༤ ཉིན་གྱི་སྔ་དྲོ་ཚོུད་ ༩ ཐོག་ཐའེ་ཀྲུང་ཏུང་ཧྭའེ་མཐོ་སློབ་ཀྱི་སྤྱི་ཚོགས་རིག་པ་སྡེ་ཚན་གྱི་གདན་འདྲེན་ཞུས་པ་ལྟར། སྐུ་ཚབ་དོན་ལགས་ནས་སློབ་ཕྲུག་གྲངས་ ༦༠ ལྷག་ལ་བོད་ཀྱི་འདས་མ་འོང་ད་ལྟའི་གནས་བབ་སྐོར་ཚོུད་གཅིག་ཙམ་རིང་གསུང་བཤད་གནང་གྲུབ་མཚམས། སློབ་ཕྲུག་ཚོས་རྒྱ་དམར་གྱི་གྲངས་ཉུང་མི་རིགས་སྲིད་བྱུས་དང་ཤེས་ཡོན་སྲིད་བྱུས། ད་ལྟའི་བོད་ནང་གི་ཛ་དྲག་གནས་སྟངས། དབུ་མའི་ལམ་གྱི་དགོངས་དོན། ༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་ཡང་སྲིད་ཕེབས་ཕྱོགས། བཙན་བྱོལ་ནང་གི་མང་གཙོའི་ཕེབས་རིམ་སོགས་སྐོར་དྲི་བ་ཕེབས་པར་ལན་འདེབས་ཞུས་པ་དང།
དེ་སྔོན་ཐའེ་ཝན་དགེ་རྒན་འོས་སྦྱོང་མཐོ་སློབ་ཀྱི་གདན་འདྲེན་ཞུས་པ་ལྟར། སློབ་ཕྲུག་ཚོར་བོད་ཀྱི་ས་ཁམས་ཆགས་ཚུལ་དང་ཁོར་ཡུག་རིག་གཞུང་སྐོར་ངོ་སྤྲོད་གནང་སྟེ། ཐའེ་ཝན་གཞོན་སྐྱེས་ཚོར་བོད་དོན་ངོ་སྤྲོད་ཀྱི་ལས་འགུལ་སྤེལ་བཞིན་ཡོད་པ་བཅས།།
