༄༅། །༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གིས་བཙན་ཁྲིད་གར་སོང་ཆ་མེད་བཏང་ནས་ལོ་ངོ་ ༢༧ འཁོར་བ་དང་བསྟུན་ཉི་ཧོང་སྐུ་ཚབ་དོན་ཁང་གིས་ཉི་ཧོང་གྲོས་ཚོགས་ཁང་ཆེན་གྱི་ཚོགས་ཁང་དུ་ཟབ་སྦྱོང་དང་གསར་འགོད་གསལ་བསྒྲགས་ཤིག་སྤེལ་ཡོད། 

ཟབ་སྦྱོང་གི་བགྲོ་གླེང་པའི་ནང་དུ་ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཨི་ཤཱི་ཀ་ཝ་ཨ་ཀི་མ་ས་ (Ishikawa Akimasa) ལགས་དང་། ཝ་སེ་ཊ་གཙུག་ལག་སློབ་གཉེར་ཁང་གི་སློབ་དཔོན་ཨི་ཤི་ཧ་མ་ཡུ་མི་ཀོ་ (Ishihama Yumiko) ལགས། དགེ་འདུན་ལྷན་ཚོགས་ཀྱི་ཚོགས་གཞོན་རབ་བྱུང་བ་ཀོ་བ་ཡ་ཤི་ཤུ་ཡི་ (Kobayashi Shuei) ལགས་བཅས་ཡོད་པ་རེད། 

དེ་ཡང་ཐོག་མར་སྐུ་ཞབས་ཨི་ཤཱི་ཀ་ཝ་ལགས་ཀྱིས་ཚོགས་འདུ་གཙོ་སྐྱོང་གནང་སྟེ་མཉམ་ཞུགས་པ་རྣམས་ལ་ཕེབས་བསུ་དང་སྦྲགས། ༸པཎ་ཆེན་རིན་པོ་ཆེའི་གནད་དོན་ངོ་སྤྲོད་དང་། ཇི་ལྟར་རྒྱ་ནག་གཞུང་གིས་ལོ་ངོ་ ༢༧ སྔོན་༸པཎ་ཆེན་ཆུང་སྲིད་རིན་པོ་ཆེ་དང་ཁོང་གི་སྐུ་འཁོར་ནང་མི་བཙན་ཁྲིད་བྱས་ཚུལ་འགྲེལ་བརྗོད་གནང་། དེ་རྗེས་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཁ་སང་གི་བོད། དེ་རིང་གི་ཡུ་ཀེ་རེན། སང་ཉིན་སུ། ཞེས་པའི་བརྗོད་གཞིའི་ཐོག་གསུང་བཤད་གནང་ཞིང་། ཁོང་གིས་ལོ་ངོ་  ༧༠ སྔོན་འཛམ་གླིང་གིས་བོད་ཀྱི་ཛ་དྲག་གནས་ཚུལ་ལ་ཡ་ལན་བྱས་མེད་ཚུལ་དང་། དེ་ལ་བརྟེན་ནས་རྒྱ་ནག་གཙོས་པའི་སྲིད་དབང་སྒེར་འཛིན་པའི་རྒྱལ་ཁབ་སྟོབས་ཆེ་རུ་ཕྱིན་ནས་དེ་དག་རྒྱལ་ཁབ་གཞན་གྱི་ས་ཁོངས་བཙན་བཟུང་བྱེད་མཁན་དུ་འགྱུར་ཚུལ་གསུངས་པ་མ་ཟད། བོད་དང་ད་ལྟའི་ཡུ་ཀེ་རེན་གྱི་གནས་སྟངས་མཚུངས་བསྡུར་གྱིས་གལ་ཏེ་རྒྱལ་སྤྱི་མི་མང་གིས་རྒྱ་ནག་གིས་བོད་བཙན་བཟུང་བྱས་པར་མུ་མཐུད་ཡ་ལན་མ་བྱས་པར་བསྡད་ན། མ་འོངས་པར་ཡུ་གུར་དང་། ལྷོ་སོག ཡུ་ཀེ་རེན་སོགས་ཀྱི་གནས་སྟངས་ཡང་དེ་ལྟར་གྱུར་ངེས་ཡིན་སྐོར་གསུངས། གཞན་ཡང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་སྐུ་འཁོར་ནང་མི་འཕྲལ་དུ་གློད་བཀྲོལ་གཏོང་དགོས་པ་མ་ཟད། བོད་ནང་ཆོས་དད་རང་དབང་དང་། བོད་ཀྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་ལ་རྒྱ་གཞུང་ནས་ཐེ་བྱུས་མི་ཆོག་པའི་དགོས་འདུན་བཏོན་འདུག 

གཙུག་ལག་སློབ་དཔོན་ཨི་ཤི་ཧ་མ་ཡོ་མི་ཀོ་ལགས་ཀྱིས་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་སྟངས་ངོ་སྤྲོད་དང་། རྒྱ་ནག་གཞུང་ནས་དེར་ཐེ་གཏོགས་མི་བྱེད་པའི་འབོད་སྐུལ་དང་སྦྲགས། རྒྱ་ནག་གིས་ངོས་འཛིན་བྱས་པའི་བླ་སྤྲུལ་ལ་བོད་མིས་ངོས་ལེན་ནམ་ཡང་བྱེད་ཀྱི་མ་རེད་ཅེས་གསུངས། དེ་བཞིན་རབ་བྱུང་བ་ཀོ་བ་ཡ་ཤི་ལགས་ཀྱིས་རྒྱ་ནག་དམར་ཤོག་གཞུང་ནས་བོད་བཙན་བཟུང་དང་བོད་ནང་དྲག་གནོན་མུ་མཐུད་བྱེད་པར་སྐྱོན་བརྗོད་དང་། བོད་ནང་རང་ལུས་མེར་བསྲེག་གི་ངོ་རྒོལ་དང་། བོད་མི་རྣམས་ཀྱིས་བོད་ཀྱི་ངོ་བོ་རྒྱ་སྒྱུར་གྱི་སྲིད་བྱུས་ལ་ངོ་རྒོལ་བྱེད་བཞིན་པ་སོགས་ཀྱི་སྐོར་འགྲེལ་བརྗོད་སྐྱོན་ཡོད། ཉི་ཧོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ཟུར་པ་སྐུ་ཞབས་ན་ག་ཧོ་ཏ་ཀ་ཤི་ (Nagao Takashi) ལགས་ཀྱིས་བོད་དོན་ལ་མུ་མཐུད་རྒྱབ་སྐྱོར་གནང་རྒྱུ་ཡིན་པ་དང་། ད་ལྟའི་ཆར་བོད་ནི་ཆེས་དམ་བསྒྲགས་ཆེ་བའི་ས་གནས་ཤིག་ཏུ་གྱུར་ཡོད་ཚུལ་གསུངས། 

གསུང་བཤད་ལས་རིམ་རྗེས་དྲི་བ་དྲིས་ལན་སྐབས་གསུང་བཤད་པ་རྣམས་ནས་དོགས་དྲི་ཁག་ལ་ལན་འདེབས་གསལ་བཤད་གནང་ཞིང་། སྐབས་དེར་ཉི་ཧོང་སྐུ་ཚབ་དོན་གཅོད་ཀྱིས་ཚོགས་འདུར་འགྲེམས་སྤེལ་ཞུས་པའི་དཔེ་དེབ་བཞིའི་ངོ་སྤྲོད་གནང་། དཔེ་དེབ་བཞི་ནི། རྐུ་ལ་ཤོར་བའི་བོད་ཀྱི་བྱིས་པ་དང་། བོད་ནང་རྒྱ་ནག་དམར་གཞུང་གི་བཙན་གནོན་བཏང་བའི་ལོ་རྒྱུས། དབུ་མའི་ལམ་གྱི་སྲིད་བྱུས་སྐོར། ཉི་ཧོང་བོད་ཁང་གི་ངོ་སྤྲོད་དེབ་ཆུང་བཅས་ཡིན། 

ཚོགས་འདུར་ཉི་ཧོང་གྲོས་ཚོགས་འཐུས་མི་དང་། ལས་བྱེད། གསར་འགོད་པ། བོད་དོན་རྒྱབ་སྐྱོར་བ། བོད་མི་སོགས་ཁྱོན་མི་གྲངས་ ༣༠ ཙམ་མཉམ་ཞུགས་གནང་ཡོད་པ་བཅས།།