༄༅། །ཉི་ཧོང་སྐུ་ཚབ་དོན་ཁང་གིས་ཕྱི་ལོ་ ༢༠༢༢ ཟླ་བ་ ༠༥ ཚེས་ ༠༡ ནས་ ༠༧ བར་ཉི་ཧོང་གི་ (Golden Week) ཞེས་པའི་གུང་སེང་དང་སྟབས་བསྟུན་དྲ་ཐོག་བོད་ཀྱི་དུས་སྟོན་ཞིག་གོ་སྒྲིག་གནང་ཡོད།

དེ་ཡང་དུས་སྟོན་གྱི་དབུ་འབྱེད་མཛད་སྒོར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་དུས་སྟོན་འདི་བོད་ཀྱི་ཆོས་དང་རིག་གཞུང་སྐོར་གོ་རྟོགས་སྤེལ་རྒྱུ་དང་། ཉི་ཧོང་གཞུང་དམངས་གཉིས་ནས་བོད་དོན་ལ་རྒྱབ་སྐྱོར་གཡོ་བ་མེད་པར་གནང་བར་བཀའ་དྲིན་རྗེས་དྲན་མཚོན་ཆེད་གོ་སྒྲིག་གནང་བ་ཡིན་སྐོར་དང་། དུས་སྟོན་འདི་ལ་བརྟེན་ནས་བོད་མི་དང་ཉི་ཧོང་བ་ཕན་ཚུན་རིག་གཞུང་བརྗེ་ལེན་བྱ་རྒྱུའི་གོ་སྐབས་ཐོབ་པ་མ་ཟད། ཆོས་ཕྱོགས་དང་རིག་གཞུང་གི་འབྲེལ་ལམ་ཟབ་ཏུ་འགྲོ་ངེས་ཡིན་ཞེས་གསུངས། 

དུས་སྟོན་གྱི་ཉིན་དང་པོར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བོད་ཀྱི་ལོ་རྒྱུས་དང་རིག་གཞུང་ཞེས་པའི་བརྗོད་གཞིའི་ཐོག་གསུང་བཤད་གནང་ཞིང་། སྐབས་དེར་ཁོང་གིས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་གལ་གནད་སྐོར་རྩལ་བཏོན་གནང་སྟེ་གསུངས། དེ་རྗེས་ཉིན་གསུམ་རིང་ལྡི་ལི་བོད་ཁང་གི་འགན་འཛིན་དགེ་བཤེས་རྡོ་རྗེ་དགྲ་འདུལ་ལགས་ཀྱིས་ནང་ཆོས་ངོ་སྤྲོད་གནང་ཞིང། ཁོང་གིས་ཉིན་གསུམ་ནང་། ལས་དང་པོ་བས་སྒོམ་ཉམས་ལེན་དང་ཚོར་སྣང་སྟངས་འཛིན་བྱེད་ཕྱོགས། འཕགས་པའི་བདེན་པ་བཞི་དང་སེམས་ངལ་སྟངས་འཛིན་བྱེད་ཕྱོགས། ལམ་གཙོ་རྣམ་གསུམ་བཅས་ཀྱི་བརྗོད་གཞིའི་ཐོག་གསུང་བཤད་གནང་ཡོད། 

ཉིན་མཐའ་མར་བོད་ཇ་དང་། པག འཐེན་ཐུག་སོགས་བཟོ་སྟངས་མིག་སྟོན་གསལ་བཤད་གནང་ཞིང་། དེ་བཞིན་བོད་དང་ཉི་ཧོང་གི་གཞས་པ་ཁག་གཅིག་གིས་བཏང་བའི་གླུ་གཞས་མཉམ་ཞུགས་པ་རྣམས་ལ་བསྟན། གཞས་པའི་ཁོངས་སུ་ཚེ་རིང་འབའ་བ་ལགས་དང་། བློ་ལྡན་རྣམ་གླིང་ལགས། བསྟན་འཛིན་ཆོས་རྒྱལ་ལགས། ནོ་ད་མེ་གུ་མི་ལགས། ཁ་རག་སྤེན་པ་ལགས་སོགས་ཡོད། 

མཐའ་དོན་སྐུ་ཚབ་དོན་གཅོད་ཨ་རྱ་ཚེ་དབང་རྒྱལ་པོ་ལགས་ཀྱིས་མཉམ་ཞུགས་པ་དང་། དང་བླངས་པ་རྣམས་ནས་ཐེངས་འདིའི་དྲ་ཐོག་དུས་སྟོན་ཚགས་ཚུད་གྲུབ་འབྲས་ལྡན་པ་ཡོང་བར་ཕྱག་རོགས་གནང་བར་ཐུགས་རྗེ་ལེགས་འབུལ་ཞུས་པ་དང་འབྲེལ། སྐུ་ཚབ་དོན་ཁང་ནས་མཉམ་ཞུགས་པ་རྣམས་ཀྱི་རེ་སྐུལ་ལྟར་སླད་ཆར་ཡང་དེ་ལྟ་བུའི་དུས་སྟོན་གོ་སྒྲིག་གནང་རྒྱུའི་ཞལ་བཞེས་གནང་། ཐེངས་འདིའི་དྲ་ཐོག་དུས་སྟོན་གྱི་སྟངས་འཛིན་པ་ཧ་སི་གྷ་བ་ལགས་དང་བསོད་ནམས་སྒྲོལ་དཀར་ལགས་གཉིས་ཀྱིས་གནང་ཡོད་པ་བཅས།།