༄༅། །ཕྱི་ལོ་ ༡༩༥༡ ལོར་རྒྱ་ནག་དམར་ཤོག་གཞུང་གིས་བཙན་དབང་གིས་བོད་ཀྱི་སྐུ་ཚབ་རྣམས་ལ་གྲོས་མཐུན་དོན་ཚན་བཅུ་བདུན་ཟེར་བའི་ཐོག་མིང་རྟགས་འགོད་བཅུག་སྟེ་ད་ཆ་ལོ་ངོ་ ༧༡ འཁོར་བའི་ཉིན་མོ་དང་བསྟུན། ཕྱི་ལོ་ ༢༠༢༢ ཟླ་བ་ ༥ ཚེས་ ༢༣ ཉིན་ཇི་ནི་ཝའི་ཚོགས་ཆུང་གི་གོ་སྒྲིག་འོག་སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་མདུན་ཐང་དུ་ས་གནས་བོད་མི་ཚོས་ཉིན་མོ་དེ་བཙན་དབང་གི་ཉིན་མོ་ཞིག་ཡིན་པ་དྲན་གསོ་གནང་བ་དང་འབྲེལ་ཞི་བའི་ངོ་རྒོལ་སྐད་འབོད་ཤུགས་ཆེ་གནང་ཡོད།
དེ་ཡང་ཇི་ནི་ཝ་ས་གནས་བོད་མི་རྣམས་ཀྱིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐང་ལྷན་ཁང་གི་མདུན་ཐང་དུ་ལག་ཏུ་འཕྲེད་དར་བཟུང་ནས་རྒྱ་ནག་གཞུང་གིས་ཁྲིམས་འགལ་ཐོག་བོད་ས་དབང་བསྒྱུར་བྱས་པ་དང་། བོད་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་དང་གཏོང་བཞིན་པར་ཞི་བའི་ངོ་རྒོལ་སྐད་འབོད་ཤུགས་ཆེ་གནང་ཡོད།
སུད་སུའི་གྲོས་ཚོགས་འཐུས་མི་ཟུར་པ་དང་སུད་བོད་མཛའ་འབྲེལ་ཚོགས་པའི་སྐུ་ཚབ་སྐུ་ཞབས་རེ་ནེ་ (René Longet) ལགས་ཀྱིས། རྒྱ་ནག་གཞུང་གིས་འདས་པའི་ལོ་ངོ་ ༧༡ ལྷག་གི་རིང་བོད་མིའི་ཆབ་སྲིད་ལས་འགུལ་ཐོག་དམ་བསྒྲགས་དང་། བོད་ཀྱི་རིག་གཞུང་དང་ངོ་བོ་རྩ་གཏོར་གཏོང་བཞིན་ཡོད་པས། བོད་ཀྱི་ལོ་རྒྱུས་དྲན་གསོ་ཞུས་ཏེ་བོད་ནང་གི་བོད་མིའི་རང་དབང་དང་། འགྲོ་བ་མིའི་ཐོབ་ཐང་། ཆེ་མཐོང་བཅས་ཀྱི་སླད་དུ་རྒྱབ་སྐྱོར་བྱེད་དགོས་པ་སོགས་ཀྱི་སྐོར་གསུངས་ཡོད།
སུད་སི་སྐུ་ཚབ་དོན་གཅོད་ཁང་གི་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་ཀྱིས་མི་མང་འདུ་འཛོམས་ཐོག་ཕྱི་ལོ་ ༡༩༥༡ ལོར་རྒྱ་ནག་དམར་ཤོག་གཞུང་གིས་བཙན་དབང་གིས་བོད་ཀྱི་སྐུ་ཚབ་རྣམས་ལ་གྲོས་མཐུན་དོན་ཚན་བཅུ་བདུན་ཟེར་བའི་ཐོག་མིང་རྟགས་འགོད་བཅུག་ཡོད་པ་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༥༩ ཟླ་ ༤ ཚེས་ ༡༨ ཉིན་ཏེཛ་པུར་དུ་རྒྱལ་སྤྱིའི་གསར་འགོད་ལྷན་ཚོགས་ཤིག་བསྐོང་ཚོགས་ཀྱིས་རྒྱ་ནག་གི་བཙན་ཤེད་འོག་བཞག་པའི་གྲོས་མཐུན་དོན་ཚན་བཅུ་བདུན་ཟེར་བ་དེ་ངོས་ལེན་མེད་པའི་གཞུང་འབྲེལ་གསལ་བསྒྲགས་བསྐྱངས་ཡོད་པ། ཕྱི་ལོ་ ༡༩༥༡ ནས་ ༡༩༥༩ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་སྐབས་དེ་དུས་བོད་གཞུང་གིས་རྒྱ་ནག་གཞུང་དང་མཉམ་དུ་བོད་རྒྱའི་དཀའ་རྙོག་ཞི་བའི་སྒོ་ནས་སེལ་ཐབས་གནང་ཡོད་ཀྱང་སེལ་ཐུབ་མེད། ཅེས་གསུངས།
གཞན་ཡང་ཁོང་གིས་ད་བར་རྒྱ་ནག་གཞུང་གིས་རྒྱ་སྐྱེད་རིང་ལུགས་ཀྱི་སྲིད་བྱུས་སྤེལ་དང་སྤེལ་བཞིན་ཡོད་སྟབས། བོད་པའི་གཞོན་སྐྱེས་རྣམས་ཀྱིས་བོད་ཀྱི་ལོ་རྒྱུས་ལ་དོ་སྣང་བྱས་ཏེ་བོད་མིའི་བདེན་པའི་ལས་འགུལ་ཁག་གི་ནང་མཉམ་ཞུགས་གང་མང་གནང་དགོས་པའི་འབོད་སྐུལ་གནང་ཡོད། ཇི་ནི་ཝའི་བོད་རིགས་ཚོགས་པའི་ཚོགས་གཙོས་རྒྱ་ནག་གཞུང་གི་བཙན་ཤེད་འོག་གྲོས་མཐུན་དོན་ཚན་བཅུ་བདུན་ཟེར་བ་བཞག་ནས་ལོ་ངོ་ ༧༡ འཁོར་བར་དྲན་གསོའི་གསུང་བཤད་སྒྲོགས་སྦྱང་གནང་ཡོད།
མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་མི་ཤེལེ་བྷཤེ་ལེཌི་ (Michelle Bachelet) མཆོག་ཉིན་གྲངས་དྲུག་རིང་རྒྱ་ནག་ནང་གཟིགས་སྐོར་དུ་ཕེབས་ཡོད་པ་དང་བསྟུན། ཇི་ནི་ཝ་ས་གནས་བོད་མི་རྣམས་ཀྱིས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་སྐུ་མི་ཤེལེ་བྷཤེ་ལེཌི་མཆོག་ལ་རྒྱ་ནག་གཞུང་གིས་བོད་མི་རྣམས་ལ་དྲག་གནོན་དང་བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་མཚམས་འཇོག་བྱེད་དགོས་པའི་འབོད་སྐུལ་ཞུས་གནང་ཡོད།།
