༄༅། །འདི་གར་སྦིར་བོད་ཚོགས་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཇར་མན་རོགས་ཚོགས་ཀྱི་ཚོགས་གཙོ་ལྕམ་ཧེ་ཊི་མེ་ཡར་ (Heide Meyer) ལགས་དང་། འཛིན་སྐྱོང་འགན་འཛིན་སེ་ཝན་ཇ་ཨིལ་ཧོས་ (Svenja Elchhorst) ལགས། སློབ་ཡོན་འགན་འཛིན་འཆི་མེད་བླ་མ་ལགས། འགན་འཛིན་ལྷན་ཚོགས་ཀྱི་ཚོགས་མི་ལྕམ་ཀི་རིས་ཀྲིན་ (Christine Czerlitzki) ལགས་བཅས་སྦིར་སྡེ་ནང་གསུམ་ཁུལ་དུ་འཚམས་གཟིགས་གནང་ཡོད།དེ་ཡང་ཕྱི་ལོོ་ ༢༠༢༢ ཟླ་ ༠༥ ཚེས་ ༢༡ ཉིན་ཇར་མན་གྷ་ཊ་རོགས་ཚོགས་ཀྱི་སྐུ་ཚབ་ཚོགས་ཆུང་ནས་གྷོ་པལ་སྤུར་བོད་ཁྱིམ་སློབ་གྲྭར་འཚམས་གཟིགས་དང་འབྲེལ་ཉིན་རྒྱབ་ཆུ་ཚོད་ ༡ ཐོག་སྡེ་དགེ་ས་གནས་འགོ་འཛིན་མདུན་ཐང་དུ་སྦིར་སྡེ་ནང་གསུམ་གྱི་ས་གནས་འགོ་འཛིན་དང་ཚོགས་སྡེ་ཁག་ནས་ཕེབས་བསུའི་སྣེ་ལེན་ཞུས་རྗེས་སྡེ་དགེ་ལས་ཁུངས་སུ་འཚམས་གཟིགས་གནང་ཡོད། 

ཕྱི་ཚེས་ ༢༢ ཉིན་རྒྱབ་ཆུ་ཚོད་ ༣ ཐོག་རྙིང་དགོན་མགྲོན་ཁང་དུ་རོགས་ཚོགས་ནས་རྒན་གཞོན་འབྲིང་གསུམ་དང་ལས་གཞི་ཁག་ལ་ལོ་མང་རིང་དཔལ་འབྱོར་གྱི་མཐུན་འགྱུར་རོགས་སྐྱོར་གནང་བར་ས་གནས་མི་མང་གི་ངོ་ཚབ་ཞུས་ཏེ་བཀའ་དྲིན་རྗེས་དྲན་སླད་སྦིར་སྡེ་ནང་གསུམ་གྱི་ས་གནས་འགོ་འཛིན་ཐུན་མོང་ནས་སྟོན་པའི་སྐུ་ཐང་ཞིག་ཕྱག་རྟགས་སུ་ཕུལ།  ཕྱི་ཚེས་ ༢༣ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་སྦིར་བོད་ཚོགས་ས་གནས་འགོ་འཛིན་མདུན་ཐང་དུ་ས་གནས་འཐུས་ཚོགས་དང་། ས་གནས་རང་བདེན་ཚོགས་ཆུང་། ཚོགས་པའི་ཚོགས་གཙོ་དང་འཐུས་མི། ས་གནས་གཞོན་ནུ་དང་བུད་མེད་ཀྱི་ལས་བྱེད་བཅས་ནས་ཕེབས་བསུའི་སྣེ་ལེན་ཞུས། དེ་རྗེས་ལས་ཁུངས་སུ་གདན་ཞུས་ཀྱིས་ལས་གཞི་ཁག་ལ་གོ་བསྡུར་དང་སྡེ་ཚན་སོ་སོར་འཚམས་གཟིགས་གནང་། ཆུ་ཚོད་ ༡༠ ཐོག་སྦིར་བོད་ཚོགས་ས་གནས་འགོ་འཛིན་ཁྱབ་ཁོངས་སུ་ཛ་བོད་ཁྱིམ་སློབ་གྲྭར་འཚམས་གཟིགས་གནང་གྲུབ་མཚམས་ཅོན་ཏ་རར་ཕེབས་ཐོན་གྱི་ས་གནས་འགོ་འཛིན་ཁྱབ་ཁོངས་སྡེ་ཚན་ཁག་དང་ཡན་ལག་སྨན་རྩིས་ཁང་། རྒས་གསོ་ཁང་། ཅོན་ཏ་ར་བོད་ཁྱིམ་སློབ་གྲྭ་བཅས་སུ་འཚམས་གཟིགས་གནང་ཡོད་པ་བཅས།།