༄༅། །༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼དགེ་འདུན་ཆོས་ཀྱི་ཉི་མ། ༽ མཆོག་རྒྱ་ནག་གཞུང་གིས་གར་སོང་ཆ་མེད་བཏང་ནས་ལོ་ངོ་ ༢༧ ཧྲིལ་པོ་འཁོར་བའི་ཉིན་མོར་ཅི་ལཱིའི་གྲོས་ཚོགས་འཐུས་མི་ཝ་ལ་ཊོ་མི་རོ་སི་ཝིག་ (Vlado Mirosevic) ལགས་དང་། ལུ་ཧི་སི་མལ་ལ་ (Luis Malla) ལགས། ས་བེ་སི་ཊེན་ཝི་ཊི་ལ་ (Sebastian Videla) ལགས། ཀ་ལི་ཇན་ཊོ་བྷར་ན་ལི་ (Alejandro Bernales) ལགས། ཨ་ན་གྷ་ཛ་མུ་རི་ (Ana Gazmurri) ལགས་བཅས་ནས་པཎ་ཆེན་རིན་པོ་ཆེ་འཕྲལ་དུ་གློད་བཀྲོལ་གཏོང་དགོས་པའི་འབོད་སྐུལ་ཕྱག་བྲིས་ཤིག་བཏོན་གནང་ཡོད། 

དེ་ཡང་འབོད་སྐུལ་ཕྱག་བྲིས་ནང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་གནང་བའི་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼དགེ་འདུན་ཆོས་ཀྱི་ཉི་མ། ༽ མཆོག་གར་སོང་ཆ་མེད་དུ་གྱུར་བའི་ཉིན་མོར་ང་ཚོས་རྒྱལ་སྤྱིའི་མི་མང་ལྷན་མགྲིན་གཅིག་ཏུ་ཁོང་གང་དུ་ཡོད་མེད་དང་སྐུའི་འཕྲོད་བཞེས་གནས་སྟངས་ཤེས་འདོད་ཡོད་པ་མ་ཟད། ཁོང་འཕྲལ་དུ་གློད་བཀྲོལ་གཏོང་དགོས་པའི་འབོད་སྐུལ་ཞུ། 

ཕྱི་ལོ་ ༡༩༩༥ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགེ་འདུན་ཆོས་ཀྱི་ཉི་མ་མཆོག་༸པཎ་ཆེན་སྐུ་ཕྲེང་བཅུ་པའི་ཡང་སྲིད་དུ་ངོས་འཛིན་གནང་མ་ཐག་དགུང་ལོ་དྲུག་ལ་སོན་པའི་ཡང་སྲིད་རིན་པོ་ཆེ་དང་ཁོང་གི་སྐུ་འཁོར་ནང་མི་རྣམས་གར་སོང་ཆ་མེད་དུ་གྱུར། རྒྱ་ནག་གཞུང་གིས་ཁོང་འཛིན་བཟུང་བཀག་ཉར་བྱས་ཡོད་སྐོར་བཤད་ནའང་ཁོང་གི་གསང་རྒྱ་ལ་ཁག་དཀྲིས་ནས་ཁོང་གང་དུ་ཡོད་མེད་ད་བར་ཕྱིར་བསྒྲགས་བྱས་མེད། 

འཛམ་གླིང་མཉམ་འབྲེལ་རྒྱལ་ཚོགས་དང་། རྒྱལ་སྤྱིའི་གཞུང་དང་གཞུང་ཁོངས་མིན་པའི་ཚོགས་པ། དེ་བཞིན་མང་ཚོགས་སོགས་ནས་ད་ཆ་དགུང་གྲངས་སུམ་ཅུ་སོ་གསུམ་ལ་ཕེབས་པའི་༸པཎ་ཆེན་རིན་པོ་ཆེའི་གནས་ཚུལ་ཤེས་རྟོགས་ཡོང་ཐབས་ནན་སྐུལ་བྱས་ནའང་ད་བར་གྲུབ་འབྲས་ལག་སོན་བྱུང་མེད། ང་ཚོས་གལ་འགངས་ཆེ་བའི་གནད་དོན་དེའི་གསལ་བཤད་ལ་དོ་སྣང་ཆེན་པོ་བྱས་ཏེ་བསྡད་ཡོད་ལ། ཁོང་མྱུར་དུ་གློད་བཀྲོལ་ཡོང་བའི་རེ་བ་བྱེད་ཀྱི་ཡོད། ཅེས་འཁོད་འདུག །