༄༅། ། ཕྱི་ལོ་ ༢༠༢༢ ཟླ་ ༥ ཚེས་ ༣ ཉིན་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པས་ཁེ་ན་ཌའི་རྒྱལ་ས་ཨོ་ཊ་ཝར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། སྐབས་དེར་ཁེ་ན་ཌའི་ཁང་ཁྱིམ་དང་སྣ་མང་རིག་གཞུང་གི་བློན་ཆེན་ཨེ་མན་ཧུ་སེན་ (Ahmed Hussen) མཆོག་དང་། ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་ (Arif Virani) མཆོག ཁེ་ན་ཌའི་གྲོས་ཚོགས་འཐུས་མི་རན་ཌལ་གྷ་རི་སན་ ( Randall Garrison) མཆོག གྲོས་ཚོགས་འཐུས་མི་ཨེ་ལི་ཛེ་བྷི་ཐི་མཱེ་ (Elizabeth May) མཆོག གྲོས་ཚོགས་འཐུས་མི་གྷར་ནེ་ཊི་ (Garnett Genius) མཆོག གྲོས་ཚོགས་འཐུས་མི་ཇམ་སི་མེ་ལོན་ནེ་ (James Maloney) མཆོག་དང་། གཞན་ཡང་ཡུ་གུར་མི་རིགས་ཀྱི་འགྲོ་བ་མིའི་ཐོབ་ཐང་ཞུ་གཏུག་ལས་འཆར་འགན་འཛིན་ཊོ་ཊི་ (Mehmet Tohti) ལགས་དང་། ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་སློབ་སྟོན་པ་ཧར་པི་ཌེ་ཝི་སི་ (Herb Davis) ལགས། བྷི་རོག་གཙུག་ལག་སློབ་གཉེར་ཁང་ (Brock University) ཁང་གི་སློབ་དཔོན་ཆེན་མོའི་ཕྱག་རོགས་ཆར་ལེ་སི་བྷར་ཊོན་ (Charles Burton) ལགས་སོགས་ཆེད་ཕེབས་གནང་ཡོད།དེ་ཡང་སྣེ་ལེན་མཛད་སྒོར་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་མཆོག་གིས་སྐུ་མགྲོན་རྣམ་པ་ངོ་སྤྲོད་དང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་ཕེབས་བསུའི་གསུང་བཤད་གནང་ཡོད། དེ་རྗེས་གདན་ས་བཀྲ་ཤིས་ལྷུན་པོའི་མཁན་རིན་པོ་ཆེ་གཟིག་རྒྱབ་རིན་པོ་ཆེ་མཆོག་གིས་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་༸པཎ་ཆེན་ཆུང་སྲིད་རིན་པོ་ཆེ་མཆོག་འཛིན་བཟུང་བཙན་འཕྲོག་བྱས་རྗེས་ད་བར་གར་སོང་ཆ་མེད་དུ་གྱུར་ཡོད་པའི་སྐོར་ངོ་སྤྲོད་གནང་ཡོད།

དཔལ་ལྡན་སྲིད་སྐྱོང་མཆོག་གིས་ཁེ་ན་ཌའི་གྲོས་ཚོགས་འཐུས་མི་རྣམ་པས་བོད་དོན་སླད་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞེས་དང་། ཁེ་ན་ཌའི་གཞུང་མང་གཉིས་ནས་ཁེ་ན་ཌར་ཡོད་པའི་བཙན་བྱོལ་བོད་མི་རྣམས་ལ་གཟིགས་རྟོག་དང་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུས་གནང་ཡོད་པ་བཅས།།