༄༅། །ཕྱི་ལོ་ ༢༠༢༢ ཟླ་བ་ ༠༥ ཚེས་ ༡༩ ཉིན་ཤི་ལོང་ས་གནས་འགོ་འཛིན་པདྨ་དོན་གྲུབ་ལགས་དང་། ཕྱོགས་བཞུགས་སྤྱི་འཐུས་ཚེ་རིང་སྒྲོལ་མ་ལགས། མཁན་པོ་ངག་དབང་དཔལ་ལྡན་ལགས་གཙོས་པའི་སྐུ་ཚབ་ཚོགས་ཆུང་ཞིག་ནས་མེ་གྷཱ་ལཡ་མངའ་སྡེའི་སྲིད་སྐྱོང་སྐུ་ཞབས་སཏྱ་པལ་མ་ལིག་མཆོག་གི་དྲུང་དུ་ཆེད་བཅར་ཞུས་གནང་ཡོད། 

སྐབས་དེར་སྐུ་ཚབ་ཚོགས་ཆུང་གིས་བོད་མིའི་སྒྲིག་འཛུགས་དང་། བོད་དགོན། ས་འགོ་ལས་ཁུངས་ཀྱི་ཚབ་ཞུས་ཏེ་མངའ་སྡེའི་སྲིད་སྐྱོང་མཆོག་གིས་བོད་ཀྱི་རིག་གཞུང་བསྟི་གནས་ཁང་གསར་རྒྱག་ཆེད་ཧིན་སྒོར་འབུམ་ལྔ་གསོལ་སྩལ་གནང་བར་ཐུགས་རྗེ་ཆེ་ཞུས་གནང་ཡོད། བོད་ཀྱི་རིག་གཞུང་བསྟི་གནས་ཁང་གི་དམིགས་ཡུལ་གཙོ་བོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་ལྟར་དཔལ་ནཱ་ལནྡཱའི་ཆོས་བརྒྱུད་དར་འཕེལ་གཏང་རྒྱུ་ཡིན་པ་རེད། སྐུ་ཚབ་ཚོགས་ཆུང་ནས་མངའ་སྡེའི་སྲིད་སྐྱོང་མཆོག་ལ་དཀར་གཙང་མཇལ་དར་དང་བཅས་ཐུགས་རྗེ་ལེགས་འབུལ་ཞུས་པ་དང་འབྲེལ་བཀའ་དྲིན་རྗེས་དྲན་གྱི་དྲན་རྟེན་ཞིག་ཕུལ་ཞིང་། མངའ་སྡེའི་སྲིད་སྐྱོང་མཆོག་གིས་ཀྱང་ཡང་དག་པའི་འཆར་སྣང་ལ་བསྔགས་བརྗོད་དང་ལས་གཞི་དེ་ཉིད་ལམ་ལྷོངས་ཡོང་བའི་སྨོན་འདུན་གནང་ཡོད་པ་བཅས།།