༄༅། །ཨིན་ཡུལ་གྱི་ས་གནས་མིལ་ཊོན་ཀི་ནེས་ (Milton Keynes) སུ་ཡོད་པའི་ནི་པོན་ཛན་མོ་ཧོ་ཇི་ནང་པའི་ལྷ་ཁང་དུ་ཕྱི་ལོ་ ༢༠༢༢ ཟླ་བ་ ༠༤ ཚེས་ ༢༤ ཉིན་བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོ་ཞིག་ཚོགས་ཡོད།

དེ་ཡང་ས་གནས་ཡུལ་མི་ལྕམ་ཀེ་ཐི་རིན་ཨིས་ཀོཊ་ (Catherine Mostyn Scott) ལགས་དང་ཁོང་གི་ཕྱག་རོགས་དང་བླངས་པ་རྣམས་ཀྱི་གོ་སྒྲིག་འོག་ས་གནས་སུ་ལོ་དགུ་བསྟུད་མར་བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོ་གོ་སྒྲིག་གནང་བཞིན་པ་ལྟར། འདི་ལོར་ཡང་གོང་ཚེས་ཉིན་མཛད་སྒོ་གོ་སྒྲིག་གནང་ཡོད་པ་རེད། མཛད་སྒོའི་ཐོག་མིལ་ཊོན་ཀི་ནེས་ས་གནས་ཀྱི་གྲོང་སྡེའི་སྤྱི་ཁྱབ་སྐུ་ཞབས་མོ་ཧཱ་མཊ་ཁཱན་ལགས་དང་། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས། དོན་ཁང་གི་ལས་བྱེད་བསྟན་འཛིན་མཛེས་ལྡན་ལགས། བཙུན་མ་མ་རུ་ཏ་ལགས་སོགས་ཁྱོན་མི་གྲངས་ ༨༠ ལྷག་ལྷན་བཅར་ཞུས་ཡོད་པ་དང་། སྐབས་དེར་ལྕམ་ཀེ་ཐི་རིན་ལགས་ཀྱིས་རྒྱལ་དར་སྒྲེང་འཛུགས་ཀྱི་གལ་གནད་དང་། ཕྱི་ལོ་ ༢༠༢༢ ལོའི་རང་དབང་ཁང་པའི་སྙན་ཐོའི་ནང་བོད་ནི་འཛམ་གླིང་ནང་ནས་རང་དབང་གནས་བབ་ཆེས་དམའ་བའི་རྒྱལ་ཁབ་ཏུ་ངོས་འཛིན་བྱས་ཡོད་སྐོར་འགྲེལ་བརྗོད་སྐྱོན་ཡོད། སྐབས་དེར་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་གྲོང་སྡེའི་སྤྱི་ཁྱབ་མཆོག་དང་། ཀེ་ཐི་རིན་ཁྱིམ་ཚང་། བཙུན་མ་མ་རུ་ཏ་ལགས་ཀྱིས་གཙོས་ཚོགས་བཅར་བ་ཡོངས་ལ་ཐུགས་རྗེ་ལེགས་འབུལ་ཞུས་པ་དང་འབྲེལ་སླད་མར་ཡང་མུ་མཐུད་དེ་ལྟར་གནང་སྐྱོང་ཡོང་བའི་འབོད་སྐུལ་ཞུས། དེ་བཞིན་ཁོང་གིས་ད་ལྟའི་ཡུག་རེན་གྱི་གནས་སྟངས་དང་ཕྱི་ལོ་ ༡༩༥༠ ལོའི་བོད་ཀྱི་གནས་སྟངས་གཅིག་མཚུངས་ཆགས་ཡོད་སྐོར་འགྲེལ་བརྗོད་དང་། བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོ་འདི་ལྟ་བུ་ཚོགས་པ་ནི་བོད་ཕྱི་ནང་གཉིས་ཀྱི་བོད་མིར་སེམས་འགུལ་ཐེབས་རྒྱུ་ཙམ་མ་ཟད། ཡོང་འགྱུར་མི་རབས་མང་པོའི་རིང་བོད་མིའི་ངོ་བོ་གསོན་གནས་ཐུབ་ཐབས་སུ་ཕན་ཐོགས་ཆེ་ཞེས་སོགས་གསུངས།

དེ་རྗེས་གྲོང་སྡེའི་སྤྱི་ཁྱབ་མཆོག་གིས་མཛད་སྒོར་བཅར་རྒྱུ་བྱུང་བར་སྐལ་བ་བཟང་པོ་བྱུང་ཞེས་གསུངས་པ་དང་ལྷན་ཁོང་རང་ཉིད་བཱངྒ་ལ་དེཤི་ཡིན་པའི་ཆ་ཤས་ཁོང་གི་མི་རིགས་ཀྱིས་རང་དབང་འཐབ་རྩོད་ཆེད་དཀའ་ངལ་ཇི་ཙམ་བརྒྱབ་ཡོད་སྐོར་འགྲེལ་བརྗོད་སྐྱོན་བཞིན། རང་དབང་འཐབ་རྩོད་བྱ་རྒྱུ་དང་རང་གི་རྒྱལ་དར་མཁའ་དབྱིངས་སུ་གཡོ་བ་མཐོང་བ་གཉིས་ནི་འཛམ་གླིང་སྟེང་གི་ཚོར་སྣང་ཁྱད་དུ་འཕགས་པ་དེ་ཡིན་ཞེས་སོགས་གསུངས། 

བོད་རང་བཙན་ཚོགས་པའི་ཚོགས་མི་བསྟན་འཛིན་ཀུན་དགའ་ལགས་ཀྱིས་ཚོགས་བཅར་བ་རྣམས་ལ་བོད་ནང་གི་ད་ལྟའི་གནས་སྟངས་སྤྱི་དང་། ལྷག་པར་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མའི་འཁྲུངས་སྐར་དང་རྒྱ་ནག་གཞུང་གིས་ཁོང་དགུང་ལོ་དྲུག་ནས་བཟུང་གར་སོང་ཆ་མེད་དུ་བཏང་བའི་གནས་ཚུལ་གསལ་སྟོན་གནང་ཞིང་། དེ་ནས་བཙུན་མ་མ་རུ་ཏ་ལགས་ཀྱིས་མིའི་དཔལ་ཡོན་ཞེས་པ་ནི་གློག་དང་གནམ་གྲུ འབར་རྫས་གསར་བཟོ་བྱ་རྒྱུ་དང་། མི་གསད་རྒྱུ། ཅ་དངོས་གཏོར་རྒྱུ། དམག་འགྱེད་རྒྱུ་མ་ཡིན་ཞིང་། དཔལ་ཡོན་དངོས་ནི་ཕན་ཚུན་བར་བརྩེ་བ་དང་གུས་ཞབས་བྱ་རྒྱུ་དེ་ཡིན་པ་རེད། དེ་རིང་ང་ཚོས་མཉམ་རུབ་ཀྱིས་བོད་ཀྱི་དཔལ་ཡོན་རིག་གནས་དང་། ངོ་བོར་ཆེ་བསྟོད་བྱེད་ཀྱི་ཡོད་ཅེས་གསུངས་རྗེས་མཐར་ཨིན་ཡུལ་སྐུ་ཚབ་དོན་ཁང་ནས་གྲོང་སྡེའི་སྤྱི་ཁྱབ་དང་། ཀེ་ཐི་རིན་ཁྱིམ་ཚང་བཅས་ལ་པཎ་ཆེན་རིན་པོ་ཆེའི་སྐོར་གོ་རྟོགས་སྤེལ་ཆེད་པཎ་ཆེན་རིན་པོ་ཆེའི་སྐོར་གྱི་དཔེ་དེབ་ ༼རྐུ་ལ་ཤོར་བའི་བོད་ཀྱི་བྱིས་པ།༽ ཞེས་པ་ཕུལ་ཡོད་པ་བཅས།།