༄༅། །ཨ་རིའི་རྒྱལ་སྤྱིའི་ཆོས་ལུགས་རང་དབང་སྲུང་སྐྱོབ་ཚན་པས་ཕྱི་ལོ་ ༢༠༢༢ ལོའི་ལོ་འཁོར་སྙན་ཐོ་ཕྱི་ལོ་ ༢༠༢༢ ཟླ་བ་ ༠༤ ཚེས་ ༢༥ ཉིན་བཏོན་ཡོད་པ་དང་། སྙན་ཐོའི་རྒྱ་ནག་ཐེ་བའི་རྒྱལ་ཁབ་ཨཕ་ག་ནིསྟཱན་དང་། བྱང་ཀོ་རི་ཡཱ། པཱ་ཀིསྟཱན། ཨུ་རུ་སུ། འབར་མ་སོགས་དམིགས་བསལ་བློ་འཚབ་བྱ་ཡུལ་དུ་གྱུར་བའི་རྒྱལ་ཁབ་ཏུ་ངོས་འཛིན་གནང་ཡོད། 

སྙན་ཐོའི་རྒྱ་ནག་གི་ཚན་པའི་ནང་ཕྱི་ལོ་ ༢༠༢༡ ལོར་རྒྱ་ནག་ཏུ་ཆོས་དད་རང་དབང་གནས་བབ་ཇེ་སྡུག་ཏུ་ཕྱིན་ཡོད། རྒྱ་གཞུང་གིས་མུ་མཐུད་ཆོས་ལུགས་རྒྱ་སྒྱུར་གྱི་སྲིད་བྱུས་ལག་བསྟར་བཙན་པོ་བྱེད་པ་མ་ཟད། ཆོས་ལུགས་ཚོགས་སྡེ་ཁག་དང་རྗེས་འབྲང་པ་ཚོས་རྒྱ་ནག་དམར་ཤོག་ཚོགས་པའི་དབང་བསྒྱུར་དང་ལྟ་བར་རྒྱབ་སྐྱོར་བྱེད་དགོས་པའི་དགོས་འདུན་བཏོན་ཡོད་ཅེས་འཁོད། 

མུ་མཐུད་སྙན་ཐོའི་ནང་ཕྱི་ལོ་ ༢༠༢༡ ལོར་རྒྱ་ནག་དམར་ཤོག་ཚོགས་པའི་འཐབ་ཕྱོགས་གཅིག་འགྱུར་མངའ་འོག་ཆོས་ལུགས་འཛིན་སྐྱོང་ཚོགས་པ་སོགས་ངོ་ཚབ་ཁང་གིས་དགེ་འདུན་པ་དང་། ཆོས་སྡེ། དྲ་ཐོག་ཆོས་དང་འབྲེལ་བའི་གནས་ཚུལ་སྤེལ་ཕྱོགས་དམ་བསྒྲགས་བྱ་ཆེད་བཙན་ཁྲིམས་གསར་པ་བཀོད་ཁྱབ་བཏང་ཡོད་ཅེས་གསལ། 

ལྷག་པར་བོད་ནང་གི་ཆོས་དད་རང་དབང་དང་འབྲེལ་ནས་སྙན་ཐོའི་ནང་རྒྱ་ནག་གཞུང་གིས་བོད་བརྒྱུད་ནང་བསྟན་ལ་དྲག་གནོན་མུ་མཐུད་བྱེད་ཀྱི་ཡོད་པ་གསལ་སྟོན་གནང་ཡོད། དེ་ཡང་སྙན་ཐོའི་ནང་། ཕྱི་ཟླ་ ༠༥ པར་རྒྱ་ནག་གཞུང་གིས་བོད་དང་འབྲེལ་བའི་རྒྱབ་ཤ་དཀར་པོའི་སྙན་ཐོ་བཏོན་པའི་ནང་དུ་ནང་བསྟན་རྒྱ་སྒྱུར་གྱི་སྲིད་བྱུས་ལ་ནན་ཏན་གསལ་བཤད་བྱས་ཡོད་པ་དང་། ཕྱི་ཟླ་ ༠༧ ནང་རྒྱ་ནག་གི་སྲིད་འཛིན་ཞི་ཅིན་ཕིང་བོད་དུ་བསྐྱོད་དེ་དམར་ཤོག་ཚོགས་པའི་ཆོས་ལུགས་སྲིད་བྱུས་ཆ་ཚང་བ་ལག་བསྟར་བྱ་རྒྱུའི་གལ་གནད་སྐོར་ནན་བཤད་བྱས། ཕྱོགས་མཚུངས་ས་གནས་སྲིད་གཞུང་གིས་བོད་ཀྱི་དགོན་སྡེ་ཁག་གི་གྲྭ་བཙུན་རྣམས་ཀྱི་ལྟ་བ་བརྗེ་སྒྱུར་ཆེད་ཚོགས་འདུ་བསྐོང་ཚོགས་བྱེད་པ་མ་ཟད། བོད་མི་རྣམས་དགོན་སྡེ་ཁག་ཏུ་མཆོད་མཇལ་འགྲོ་རྒྱུར་བཀག་སྡོམ་དང་། ཆོས་ལུགས་ཀྱི་གནས་དང་མཚོན་དོན་རྣམས་གཏོར་བཅོམ། ༧གོང་ས་ཏཱ་ལའི་བླ་མའི་གསུང་ཆོས་ཉན་མཁན་དང་ཁོང་གི་སྐུ་པར་ཉར་མཁན་རྣམས་འཛིན་བཟུང་ཉེས་ཆད་གཏོང་གི་ཡོད་ཅེས་བཀོད་ཡོད་པ་རེད། 

ལྷན་ཚོགས་ཀྱི་རྒྱབ་གཉེར་ནང་རྒྱ་གཞུང་གིས་གོ་རིམ་ལྡན་ཞིང་མུ་མཐུད་ཆོས་དད་རང་དབང་རྡོག་རོལ་བརྩིས་མེད་གཏོང་བཞིན་པར་ཨ་རི་གཞུང་ངོས་ནས་སླར་ཡང་རྒྱ་ནག་དེ་བཞིན་དམིགས་བསལ་བློ་འཚབ་ཡོད་པའི་རྒྱལ་ཁབ་ཁོངས་སུ་ངོས་འཛིན་གནང་དགོས་ཞེས་དང་། ཨ་རི་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེ་བའི་རྒྱལ་སྤྱིའི་བློ་མཐུན་རྒྱལ་ཁབ་དང་ལྷན་མཉམ་རུབ་ཀྱིས་རྒྱ་ནག་གཞུང་གིས་ཆོས་དད་རང་དབང་རྡོག་རོལ་ཚབས་ཆེ་གཏོང་བཞིན་པར་དེ་འབྲེལ་འགན་ཁུར་གསལ་བཤད་བྱེད་འཇུག་དགོས་པའི་བགྲོས་ཀྱང་བཏོན་ཡོད།

ཕྱོགས་མཚུངས་ལྷན་ཚོགས་གིས་རྒྱ་ནག་ནང་འགྲོ་བའི་མིའི་ཐོབ་ཐང་གནས་བབ་ཡར་རྒྱས་གཏང་རྒྱུར་ཨ་རིའི་གྲོས་ཚོགས་ངོས་ནས་འཛིན་སྐྱོང་ལ་རྒྱ་ནག་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་ཁྲིམས་ཡིག་ཡུ་གུར་ངལ་རྩོལ་སྔོན་འགོག་ཁྲིམས་ཡིག་དང་། བོད་དོན་སྲིད་བྱུས་དང་རྒྱབ་སྐྱོར་ཁྲིམས་ཡིག་ལྟ་བུ་རྣམས་ལག་བསྟར་ཚགས་ཚུད་བྱེད་འཇུག་དགོས་པའི་ནན་སྐུལ་ཞུས་ཡོད། །