༄༅། །ཨ་རིའི་རྒྱལ་ཡོངས་སིལ་སྤོལ་རྩེད་འགྲན་པ་གྲགས་ཅན་སྐུ་ཞབས་ཨེ་ནེ་སི་ཀེན་ཊར་ (Enes Kanter) ལགས་ཀྱིས་འགྲོ་བ་མིའི་ཐང་ལ་རྒྱབ་སྐྱོར་དང་། ལྷག་པར་ཁོང་གིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་ཐེར་འདོན་དང་གླེང་སློང་ཤུགས་ཆེ་གནང་བར་ངོས་འཛིན་དུ་ཇི་ནི་ཝ་འགྲོ་བ་མིའི་ཐོབ་ཐང་དང་མང་གཙོ་ལྷན་ཚོགས་ཞེས་པའི་ཚོགས་འདུ་ཐེངས་ ༡༤ སྟེང་ཕྱི་ལོ་ ༢༠༢༢ ལོའི་ཇི་ནི་ཝ་ཆེས་མཐོའི་ལྷན་ཚོགས་ཀྱི་སྙིང་སྟོབས་གཟེངས་རྟགས་དེ་བཞིན་སྐུ་ཞབས་ཨེ་ནེ་སི་ཀེན་ཊར་ལགས་ལ་ཕུལ་འདུག

དེ་ཡང་སྐུ་ཞབས་ཨེ་ནེ་སི་ཀེན་ཊར་ལགས་ཀྱིས་འཛམ་བུ་གླིང་གི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་ཡོངས་ཀྱི་ཚབ་ཞུས་ཏེ་ཕྱི་ལོ་ ༢༠༢༢ ལོའི་ཇི་ནི་ཝའི་ཆེས་མཐོའི་ལྷན་ཚོགས་ཀྱི་སྙིང་སྟོབས་གཟེངས་རྟགས་(2022 Geneva summit Courage Award) བཞེས་གནང་རྗེས་གསར་འགོད་པའི་དྲི་བ་ཁག་ལ་ལན་འདེབས་གནང་སྐབས་གསུང་དོན། རྒྱ་ནག་གཞུང་གིས་བོད་ནང་རིག་གཞུང་རྩ་གཏོར་བྱེད་བཞིན་ཡོད་པ་དང་། བོད་ཀྱི་བདག་པོ་བོད་མི་ཡིན་པ་དེ་རྒྱ་ནག་གཞུང་གིས་ངེས་པར་ཤེས་དགོས། ཞེས་དང་།
འཛམ་གླིང་གི་དབུ་ཁྲིད་རྣམ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡིད་དུ་འོང་བའི་བཀའ་སློབ་ལམ་སྟོན་ཁག་གསན་པ་ཡིན་ན་གོ་ལ་ཧྲིལ་པོ་འདི་ཉིད་དམག་འཁྲུག་ལས་རང་དབང་འཐོབ་ངེས་རེད། ཅེས་གསུངས།

གཞན་ཡང་ཁོང་གིས་འགྲོ་བ་མིའི་ཐོབ་ཐང་དང་། བདེན་པ། རང་དབང་བཅས་ལ་རྒྱབ་སྐྱོར་བྱེད་ཀྱི་ཡོད་པ་དང་། འདི་ལྟར་བྱེད་དགོས་དོན་ནི། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རང་ཉིད་ལ་སེམས་ཤུགས་བསྐྱེད་དུ་བཅུག་སོང་། ཞེས་གསུངས། སྐུ་ཞབས་ཨེ་ནེ་སི་ཀེན་ཊར་ལགས་ནི། རྒྱུན་དུ་ཁ་ཞེ་གཉིས་མེད་ཀྱི་སྒོ་ནས་བོད་དོན་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་ལ། གོ་སྐབས་ནམ་བྱུང་སྐབས་ཁོང་གིས་བོད་དོན་སྐོར་གླེང་སློང་དང་རྒྱབ་སྐྱོར་ཤུགས་ཆེ་གནང་ཡོད། སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་སྐུ་ཞབས་ཨེ་ནེ་སི་ཀེན་ཊར་ལགས་ལ་ཁ་བཏགས་ཕུལ་ཏེ་བོད་དོན་ཆེད་དུ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་ཡོད།

སྤྱིར་ཇི་ནི་ཝའི་འགྲོ་བ་མིའི་ཐོབ་ཐང་དང་མང་གཙོ་ལྷན་ཚོགས་ནི། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་ཁོངས་མིན་པའི་ཚོགས་པ་གྲངས་ ༢༥ ལས་གྲུབ་པ་ཞིག་ཡིན་ཞིང་། ལྷན་ཚོགས་འདིའི་སྟེང་རྒྱལ་སྤྱིའི་འགྲོ་བ་མིའི་ཐོབ་ཐང་དང་རང་དབང་སྲུང་སྐྱོབ་གནང་མཁན་ཡོངས་ཀྱི་མཛད་རྗེས་ལ་ཆེ་བསྟོད་ཀྱི་ཚུལ་དུ་སྙིང་སྟོབས་གཟེངས་རྟགས་ཞེས་པ་ཞིག་འབུལ་སྲོལ་ཡོད་པ་བཅས།།