༄༅། །༸ཀུན་གཟིགས་༸ཆེན་སྐུ་ཕྲེང་བཅུ་གཅིག་པ་མཆོག་དགུང་གྲངས་ ༣༣ ལ་ཕེབས་པའི་འཁྲུངས་སྐར་དང་བསྟུན། ཨ་རིའི་ཕྱི་སྲིད་ལྷན་ཁང་གིས་ཕྱི་ལོ་ ༢༠༢༢ ཟླ་ ༤ ཚེས་ ༢༥ ཉིན་གསར་འགོད་གསལ་བསྒྲགས་ཤིག་སྤེལ་ཏེ་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་༸པཎ་ཆེན་ཆུང་སྲིད་རིན་པོ་ཆེ་འཛིན་བཟུང་བཙན་འཕྲོག་བྱས་རྗེས་ད་བར་པཎ་ཆེན་ཆུང་སྲིད་རིན་པོ་ཆེ་གང་དུ་ཡོད་མེད་དང་སྐུ་གཟུགས་བདེ་ཐང་ཡིན་མིན་སྐོར་གནས་ཚུལ་ཁ་གསལ་དགོས་པའི་རྒྱ་ནག་གཞུང་ལ་དགོས་འདུན་བཏོན་གནང་འདུག
དེ་ཡང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་སྐུ་ཞབས་ནེ་ཌི་པི་ར་ཡི་སི་ (Ned Price) ལགས་ཀྱིས། དེ་རིང་ནི་༸ཀུན་གཟིགས་༸ཆེན་སྐུ་ཕྲེང་བཅུ་གཅིག་པ་མཆོག་དགུང་གྲངས་ ༣༣ ལ་ཕེབས་པའི་འཁྲུངས་སྐར་དུས་ཆེན་སྲུང་བརྩི་ཞུ་བཞིན་ཡོད། ༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་མཆོག་ནི་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་འཛིན་བཟུང་བཙན་འཕྲོག་བྱས་རྗེས་གར་སོང་ཆ་མེད་དུ་གྱུར་ཡོད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་མི་ཚོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༸ཀུན་གཟིགས་༸པཎ་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་བྲལ་དུ་ངོས་འཛིན་གནང་བའི་དགེ་འདུན་ཆོས་ཀྱི་ཉི་མ་མཆོག་དང་ཐུག་འཕྲད་ཞུ་འཇུག་རྒྱུའི་ཚབ་ཏུ་རྒྱ་ནག་གཞུང་གིས་འདེམས་སྒྲུག་བྱས་པའི་པཎ་ཆེན་རིན་པོ་ཆེའི་སྐོར་མུ་མཐུད་ཁྱབ་བསྒྲགས་སྤེལ་བཞིན་ཡོད། ཅེས་དང་། རྒྱ་ནག་གཞུང་གིས་༸ཀུན་གཟིགས་༸ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼དགེ་འདུན་ཆོས་ཀྱི་ཉི་མ།༽ མཆོག་ལ་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ཡོངས་སུ་རྫོགས་པ་སྤྲོད་དགོས་ཞེས་གསུངས་ཡོད།
གཞན་ཡང་ཁོང་གིས་ཨ་རིའི་གཞུང་གི་ངོས་ནས་རྒྱ་ནག་གཞུང་གི་ཐེ་བྱུས་མེད་པའི་ཐོག་བོད་མི་རྣམས་ཀྱིས་ཡང་སྲིད་ངོས་འཛིན་དང་། ཤེས་ཡོན་སྤྲོད་རྒྱུ། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ ༼དགེ་འདུན་ཆོས་ཀྱི་ཉི་མ། ༽ མཆོག་གི་མཚོན་པའི་ཆོས་ལུགས་ཀྱི་དབུ་ཁྲིད་ཁག་ལ་བརྩི་བཀུར་ཞུ་རྒྱུའི་ཐོབ་ཐང་ཡོད་པ་དེར་རྒྱབ་སྐྱོར་གནང་གི་ཡོད། ཅེས་གསུངས་ཡོད།།
