༄༅། །ཕྱི་ལོ་ ༢༠༢༢ ཟླ་བ་ ༠༤ ཚེས་ ༢༨ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ཇོས་རེ་མོས་ཧོར་ཊ་མཆོག་ཊི་མོར་ལེས་ཊིའི་སྲིད་འཛིན་དུ་བདམས་ཐོན་བྱུང་བར་དགའ་བསུའི་འཚམས་འཕྲིན་སྩལ་གནང་ཡོད།

དེ་ཡང་འཚམས་འཕྲིན་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། སྐུ་ཉིད་ཐོག་མར་ཕྱི་ལོ་ ༡༩༩༠ ཙམ་ལ་རྡ་སར་ཕེབས་པའི་སྐབས་ནས་བཟུང་ངོས་ཀྱིས་སྐུ་ཉིད་རྒྱུན་རིང་ངོ་ཤེས་གྲོགས་འདྲིས་བྱུང་བར་དགའ་སྤྲོ་ཆེ།

ད་ཆ་སྐུ་ཉིད་ལ་སླར་ཡང་འགན་ཁུར་ཆེན་པོ་ཞིག་ཡོད་པ་དང་། སྐུ་ཉིད་ཀྱི་དབུ་ཁྲིད་འོག་ཊི་མོར་ལེས་སིའི་འབངས་མི་སེར་ཚོས་མུ་མཐུད་ཞི་བདེ་དང་། འབྱོར་བ། ཡར་རྒྱས་ལོངས་སུ་སྤྱོད་ཐུབ་ངེས་རེད། ལྷག་པར་སྐུ་ཉིད་ཀྱིས་སྤྱི་ཚོགས་ནང་གི་ཁོས་ཞན་ཚོའི་བདེ་སྡུག་ལ་གཟིགས་སྐྱོང་གནང་ཐུབ་པའི་རེ་བ་བྱེད་ཀྱི་ཡོད་ཅེས་དང་།  

ཊི་མོར་ལེས་ཊིའི་མི་མང་གི་རེ་བ་དང་མངོན་འདོད་གྲུབ་ཆེད་སྐུ་ཉིད་ཀྱིས་ཡོང་འགྱུར་གདོང་ལེན་བྱ་དགོས་རིགས་ལ་གདོང་ལེན་བྱ་ཐུབ་པའི་སྨོན་འདུན་ཞུ། ཞེས་གསུངས་འདུག །