༄༅། །ཕྱི་ལོ་ ༢༠༢༢ ཟླ་ ༠༤ ཚེས་ ༢༣ ཉིན་གདན་ས་ཆེན་པོ་བཀྲ་ཤིས་ལྷུན་པོས་ཨ་རིའི་གྲོང་ཁྱེར་ནིའུ་ཡོག་ཏུ་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༣ ལ་ཕེབས་པའི་འཁྲུངས་སྐར་སྲུང་བརྩིའི་མཛད་སྒོ་ཞིག་གོ་སྒྲིག་ཞུས་གནང་ཡོད་པ་དང་། མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་སྩལ་བའི་ནང་འཁོད་དོན། གདན་ས་ཆེན་པོ་བཀྲ་ཤིས་ལྷུན་པོ་ནས་ཨ་རིའི་གྲོང་ཁྱེར་ནིའུ་ཡོག་ཏུ་པཎ་ཆེན་སྐུ་ཕྲེང་བཅུ་གཅིག་པའི་འཁྲུངས་སྐར་སྲུང་བརྩི་ཞུས་པར་ཡིད་སྤྲོ་དང་བཅས་བཀའ་དྲིན་ཆེ་ཞུ། རྒྱལ་པཎ་རིམ་བྱོན་བླ་སློབ་ཀྱི་འབྲེལ་བ་ཐུན་མོང་མིན་པ་ཞིག་ཏུ་མ་ཟད། ༸རྒྱལ་མཆོག་དགེ་འདུན་གྲུབ་ཀྱིས་བླ་ལྷའི་ལུང་བཞིན་གདན་ས་བཀྲ་ཤིས་ལྷུན་པོ་ཕྱག་བཏབ་པ་པཎ་ཆེན་རིན་བྱོན་གྱིས་བསྐྱངས་པ་དང་། པཎ་ཆེན་སྐུ་ཕྲེང་བཅུ་པ་སྐུ་ན་ཆུང་དུས་ནས་ངོས་དང་འབྲེལ་འདྲིས་ཟབ་པས་དམིགས་བསལ་གྱི་འབྲེལ་བ་ཡོད། གངས་ལྗོངས་བསྟན་འགྲོར་ཐུགས་བསྐྱེད་དུས་སུ་སྨིན་པའི་པཎ་ཆེན་སྐུ་ཕྲེང་བཅུ་པ་དགོངས་པ་གཞན་དོན་དུ་གཤེགས་པ་ནས་ཡང་སྲིད་རྩད་གཅོད་སོགས་ངོས་ལ་དམ་ཚིག་དང་ལོ་རྒྱུས་ཀྱིས་དཀྲིས་པའི་ལས་འགན་རྣམས་ཧུར་ཐག་གིས་བསྒྲུབས་ཀྱང་། ཆབ་སྲིད་གེགས་བར་གྱི་གཞན་དབང་དུ་སོང་བ་ཕངས་པ་ལྟར་སྣང་ཡང་། སྒོ་གསུམ་གཞན་དོན་དུ་བསྔོས་པའི་རྒྱལ་སྲས་བྱང་ཆུབ་སེམས་དཔའི་མཛད་པ་དཔག་པར་དཀས་བས་ཅི་མཛད་གཞན་དོན་དུ་མ་གྱུར་པ་ག་ལ་མངའ། ད་ལན་ཡང་སྲིད་རིན་པོ་ཆེ་དགུང་གྲངས་སོ་གསུམ་དུ་ཕེབས་པའི་སྐུའི་འཁྲུངས་སྐར་གང་རྒྱས་ཤིག་འབྲེལ་ཡོད་ཁྱེད་རྣམས་ནས་ཨ་རིའི་ནིའུ་ཡོག་ཏུ་ཚོགས་པར་བཀྲ་ཤིས་བདེ་ལེགས་དང་། མཆོག་སྤྲུལ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཀྱི་ཞལ་མཇལ་གསུང་ཐོས་མྱུར་དུ་ཡོང་བའི་སྨོན་ལམ་དང་བཅས། ཤཱཀྱའི་དགེ་སྦྱོང་ཆོས་སྨྲ་བ། ཏཱ་ལའི་བླ་མས། བོད་རབ་བྱུང་བཅུ་བདུན་པའི་ཆུ་སྟག་ཟླ་ ༢ ཚེས་ ༢༠ ཕྱི་ལོ་ ༢༠༢༢ ཟླ་ ༤ ཚེས་ ༢༡ ལ།།