༄༅། །ཕྱི་ལོ་ ༢༠༢༢ ཟླ་ ༠༤ ཚེས་ ༢༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༢ ལོའི་གོ་ལའི་ཉིན་མོར་གསུང་འཕྲིན་སྩལ་བའི་ནང་འཁོད་དོན། ཕྱི་ལོ་ ༢༠༢༢ ལོའི་གོ་ལའི་ཉིན་མོར་ང་ཚོས་སེམས་ཅན་ཐམས་ཅད་ཀྱིས་མི་ཚེ་བདེ་སྐྱིད་ངང་འཚོ་འདོད་ཡོད་པ་དེ་དྲན་གསོ་བྱེད་དགོས། འགྲོ་བ་མི་ཙམ་མིན་པར་སེམས་ཅན་དུད་འགྲོ་དང་། བྱ་བྱིའུ། འབུ་སྲིན་ཕྲ་མོ་ཚང་མས་མི་ཚེ་བདེ་སྐྱིད་ངང་འཚོ་འདོད་ཡོད། ང་ཚོ་ཚང་མས་ཐུན་མོང་གི་འཚོ་གནས་ཆེད་དུ་སེམས་ཁུར་བྱེད་དགོས། ང་ཚོ་འགྲོ་བ་མི་ལ་ཁྱད་དུ་འཕགས་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཡོད་པ་དེས་ང་ཚོར་བྱ་བ་བཟང་པོ་ཞིག་བསྒྲུབ་པར་དམིགས་བསལ་གྱི་གོ་སྐབས་མང་པོ་སྐྲུན་གྱི་ཡོད། ང་ཚོས་དེ་རིང་ཁ་སང་འཛམ་གླིང་གི་གནས་བབ་ཇི་འདྲ་ཞིག་ཡིན་མིན་སྐོར་བལྟས་ཚེ། ང་ཚོས་ངེས་པར་ཤུགས་སྣོན་རྒྱག་དགོས་པ་ཆགས་ཡོད།
ང་ཚོར་ཁྱོན་ཡོངས་ཀྱི་ཤེས་ཡོན་སློབ་གསོ་ཞིག་དགོས། དཔེར་ན་ནང་སེམས་ཀྱི་རིན་ཐང་ཚུད་པའི་གཞན་གྱི་བདེ་སྡུག་ལ་སྙིང་རྗེའི་ཀུན་ནས་བསླངས་ཏེ་སེམས་ཁུར་བྱེད་ཐུབ་མཁན་གྱི་ཤེས་ཡོན་སློབ་གསོ་ཞིག་དགོས། ང་ཚོ་ཚང་མ་ཕན་ཚུན་གཅིག་ལ་གཅིག་བརྟེན་ཤུགས་ཆེ་ཆགས་ཡོད། ང་ཚོས་གདོང་ལེན་གསར་པ་བྱེད་དགོས་པ་དཔེར་ན་གནམ་གཤིས་འགྱུར་ལྡོག་གི་དཀའ་ངལ་གྱིས་ང་ཚོ་ཚང་མར་ཤུགས་རྐྱེན་ཐེབས་ཀྱི་ཡོད། དེ་བཞིན་གོ་ལའི་དཔལ་འབྱོར་གོང་འཕེལ་སླད་འགྲོ་བ་མི་ཚང་མས་ངེས་པར་འགན་མཉམ་འཁུར་གྱིས་མཉམ་ཞུགས་བྱེད་དགོས།
ང་ཚོས་ངེས་པར་འཛམ་གླིང་གི་ཁེ་ཕན་དང་པོར་འཇོག་དགོས། ང་ཚོས་ངེས་པར་འགྱུར་རྡོའི་བུད་རྫས་ལ་བརྟེན་རྒྱུ་ཉུང་དུ་གཏོང་དགོས་པའི་ཛ་དྲག་གི་གོམ་པ་སྤོ་དགོས་ལ། གསོ་རུང་ཐོན་ཁུངས། དཔེར་ན། ཉི་མ་དང་ལྷགས་རླུང་གི་ནུས་ཤུགས་ལྟ་བུར་གང་ཐུབ་བརྟེན་དགོས། ང་ཚོས་ངེས་པར་ཤིང་ནགས་རྩ་གཏོར་བྱེད་བཞིན་པའི་སྐོར་དང་ཁོར་ཡུག་སྲུང་སྐྱོབ་ཀྱི་ཆེད་དུ་དོ་སྣང་བྱེད་དགོས། ང་ཚོས་ངེས་པར་ལྗོན་ཤིང་འདེབས་འཛུགས་དང་ལྗོན་ཤིང་ལ་ལྟ་རྟོག་བྱེད་དགོས།
ངོས་རང་སྒེར་གྱི་མི་ཚེའི་རིང་ལའང་ངོས་ཀྱིས་དང་པོ་བོད་ནང་གངས་འབབ་ཚད་ཉུང་དུ་འགྲོ་བཞིན་པ་མཐོང་མྱོང་ལ། ཕྱིས་སུ་རྡ་སར་གངས་འབབ་ཚད་ཉུང་དུ་འགྲོ་བཞིན་ཡོད་པ་མཐོང་མྱོང་། དོན་དམ་པར་ཚན་རིག་པ་ཁག་གཅིག་གིས་ངོས་ལ་བོད་ལྟ་བུ་ཚུད་པའི་ས་ཆ་ཁག་གཅིག་རིམ་པས་བྱེ་ཐང་དུ་འགྱུར་རྒྱུའི་ཉེན་ཁ་ཡོད་པའི་སྐོར་བཤད་བྱུང་། དེར་བརྟེན་ངོས་ཀྱིས་གས་ཆག་སླ་བའི་བོད་མཐོ་སྒང་གི་ཁོར་ཡུག་སྲུང་སྐྱོབ་སྐོར་ཆོད་སེམས་བརྟན་པོའི་སྒོ་ནས་གླེང་སློང་བྱེད་ཀྱི་ཡོད། ང་ཚོའི་མི་ཚེ་ནི་རེ་བ་བཟང་ས་ཞིག་ལ་གཞི་བཅོལ་ཡོད། རེ་བ་ནི་མ་འོངས་པ་དང་འབྲེལ་བ་ཡོད། མ་འོངས་པའི་སྐོར་ཁག་ཐེག་གང་ཡང་བྱེད་མི་ཐུབ་ཀྱང་ང་ཚོས་རེ་བ་བཟང་ས་ཞིག་ལ་རྒྱག་གི་ཡོད། གང་ལྟར་དོགས་པ་བྱེད་པ་ལས་རེ་བ་བརྒྱབ་ན་ཡག་པ་ཡོད།
གོ་ལའི་ཚ་དྲོད་ཤུགས་ཆེ་འཕེལ་བཞིན་པའི་སྐབས་འདིར་ལྷག་པར་གཞོན་སྐྱེས་ཚོས་མཉམ་རུབ་ཀྱིས་ཐབས་ལམ་འཚོལ་ཐབས་དང་སྤེལ་རེས་བྱེད་དགོས། གཞོན་སྐྱེས་རྣམས་ནི་ང་ཚོའི་རེ་བ་ཡིན། དེང་སང་གནམ་གཤིས་འགྱུར་ལྡོག་གི་རྐྱེན་པས་ང་ཚོར་དཀའ་ངལ་འཕྲད་བཞིན་པའི་སྐབས་འདིར། ང་ཚོས་དུས་ཚོད་རེའུ་མིག་བཟོས་ཏེ་བསྒྱུར་བཅོས་ཀྱི་ཆེད་དུ་ཕན་ཚུན་རམ་འདེགས་བྱེད་དགོས། གོ་ལ་གཅིག་པུ་འདིའི་སྒང་དུ་འཚོ་སྡོད་བྱེད་མཁན་གྱི་འགྲོ་བ་མི་ཡིན་པའི་ཆ་ནས་ང་ཚོས་ངེས་པར་བདེ་སྐྱིད་ངང་མཉམ་གནས་བྱེད་རྒྱུར་འབད་བརྩོན་བྱེད་དགོས། གནམ་གཤས་འགྱུར་ལྡོག་གི་ཉེན་ཁས་རྒྱལ་ཁབ་ཀྱི་ས་མཚམས་ཡོད་པའི་ལུང་པ་གཅིག་ཙམ་མིན་པར་ང་ཚོ་ཚང་མར་ཤུགས་རྐྱེན་ཐེབས་ཀྱི་ཡོད། ང་ཚོས་ངེས་པར་རང་བྱུང་ཁམས་དང་། ང་ཚོའི་ཁྱིམ་གཞི་གཅིག་པུ་སྟེ་གོ་ལ་འདི་ཉིད་སྲུང་སྐྱོབ་བྱེད་དགོས། ཞེས་འཁོད་ཡོད།།
