༄༅། །ལྷོ་སྤྱི་ལས་ཁུངས་དང་རྒྱ་གར་བོད་དོན་རྒྱབ་སྐྱོར་ཚོགས་པ། བྷེང་ལོར་བོད་ཁྱིམ་སྡོད་ཁང་གི་སློབ་ཕྲུག་ཚོགས་པ། ས་གནས་གཞོན་ནུ་ལྷན་ཚོགས་བཅས་ནས་ཕྱི་ལོ་ ༢༠༢༢ ཟླ་བ་ ༠༤ ཚེས་ ༢༥ ཉིན་བྷེང་ལོར་བོད་ཁྱིམ་སྡོད་ཁང་དུ་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་ཞུས་ཡོད། 

མཛད་སྒོའི་སྐུ་མགྲོན་གཙོ་བོར་ཨ་ཧིམ་ས་ཞེས་པའི་ཚོགས་པ་གསར་འཛུགས་གནང་མཁན་གྲས་སྐུ་ཞབས་ཧརྵ་བརྡྷན་ལགས་དང་། དམིགས་བསལ་སྐུ་མགྲོན་དུ་རྒྱ་གར་གཞུང་གི་ཕྱི་འབྲེལ་མི་སྣ་ཟུར་པ་སྐུ་ཞབས་ཀི་ཤན་སིངྒ་སུ་ག་ར་ལགས་དང་། གསུང་བཤད་པར་ཀོ་རི་ཡ་ཚོང་འབྲེལ་ལྷན་ཚོགས་ཀྱི་འགན་འཛིན་ཟུར་པ་སྐུ་ཞབས་ཅནྡྲ་ཤེ་ཁར་ལགས་བཅས་གདན་དྲངས་ཡོད་པ་རེད། སྐུ་མགྲོན་དང་གསུང་བཤད་པ་རྣམས་ཀྱིས་མགྲིན་གཅིག་ཏུ་བོད་མིའི་ངོ་བོ་དང་རིག་གཞུང་བདག་གཅེས་བྱ་རྒྱུའི་གལ་གནད་དང་། བོད་མི་རྣམས་ཀྱིས་དཀའ་སྡུག་ཆེ་བའི་དུས་སུ་རེ་བ་བཟང་པོ་བརྒྱབ་ནས་བསྡད་ན་བོད་ཀྱི་བདེན་མཐའ་སེལ་ངེས་པའི་སྐོར་གསུངས་ཤིང་། སྐུ་མགྲོན་གཙོ་བོས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་རྒྱལ་བ་པཎ་ཆེན་རྣམ་གཉིས་ཀྱི་སྒྲིག་འཛུགས་ཀྱི་གལ་གནད་དང་། རྒྱ་གཞུང་གིས་བླ་ཆེན་རྣམ་པ་གཉིས་ཀྱི་ཡང་སྲིད་ལ་ཐེ་གཏོགས་བྱ་ཐབས་རྩོམ་གྱི་ཡོད་ཅེས་སོགས་གསུངས་རྗེས་ལྷོ་སྤྱི་ལས་ཁུངས་ཀྱི་དྲུང་ལས་བསྟན་འཛིན་ཟླ་མཛེས་ལགས་ཀྱིས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་སྐུའི་འཁྲུངས་སྐར་ངོ་སྤྲོད་དང་འབྲེལ། ཕྱི་ལོ་༡༩༩༥ལོར་ཇི་ལྟར་རྒྱ་གཞུང་གིས་ལོ་ན་དྲུག་ལ་སོན་པའི་པཎ་ཆེན་རིན་པོ་ཆེ་གར་སོང་ཆ་མེད་བཏང་བའི་གནས་ཚུལ་ངོ་སྤྲོད་གནང་། 

མཐར་སྐུ་མགྲོན་རྣམ་པ་གསུམ་ལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཞི་བཀོད་པའི་ཐང་ཀ་རེ་ཕུལ་རྗེས་བོད་ཁྱིམ་སྡོད་ཁང་གི་སློབ་ཕྲུག་རྣམས་ཀྱིས་གཞས་སྣ་འཁྲབ་སྟོན་གཟིགས་འབུལ་ཞུས་ཡོད་པ་བཅས།།