༄༅། །ཕྱི་ལོ་ ༢༠༢༢ ཟླ་ ༤ ཚེས་ ༢༥  ནས་ ༢༦ བར་ཉིན་གྲངས་གཉིས་རིང་སྒང་ཏོག་ས་གནས་འགོ་འཛིན་ལས་ཚབ་ལས་དྲུང་ཀརྨ་རྣམ་རྒྱལ་ལགས་དང་ས་འགོ་གསར་པ་ལྷག་པ་ཚེ་རིང་ལགས་རྣམ་གཉིས་དབར་རྩིས་སྤྲོད་རྩིས་ལེན་གནང་ཡོད་པ་དང་། རྩིས་སྤྲོད་རྩིས་ལེན་གྱི་ལས་དོན་ལ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་ཏུ་རྡོར་གླིང་ས་གནས་འགོ་འཛིན་ཚེ་དབང་ཕུན་ཚོགས་ལགས་སྤྲོད་དཔང་གིས་འགན་འཁུར་བཞེས་ཡོད།དེ་ཡང་ཕྱི་ཚེས་ ༢༥ ཉིན་ས་གནས་འགོ་འཛིན་གྱི་བདག་དབང་དུ་ཡོད་པའི་རྩ་འཛིན་གྱིས་གཙོས། ལས་ཁུངས་ཀྱི་ཡིག་སྣོད་སོགས་རྩིས་ལེན་རྩིས་སྤྲོད་གནང་། ཕྱི་ཚེས་ ༢༦ ཉིན་གྱི་སྔ་དྲོར་ཕྱོགས་བཞུགས་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་། ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་གཞོན། དགོན་སྡེ་ཁག་གི་སྐུ་ཚབ། དེ་བཞིན་གཞུང་ཁོངས་མིན་པའི་ཚོགས་པ་ཁག་དྲུག་གི་སྐུ་ཚབ་དང་། མི་འཐུས་བཅས་ལྷན་འཛོམས་ཐོག་ས་གནས་འགོ་འཛིན་གསར་པ་ལྷག་པ་ཚེ་རིང་ལགས་དང་། སྤྲོད་དཔང་རྡོར་གླིང་ས་གནས་འགོ་འཛིན་ཚེ་དབང་ཕུན་ཚོགས་ལགས་ཀྱིས་གསུང་བཤད་གནང་ཡོད། ཉིན་རྒྱབ་ས་གནས་ཀྱི་དགོན་སྡེ་ཁག་ཏུ་ཕེབས་ཡོད་པ་བཅས། །