༄༅། །ཕྱི་ལོ་ ༢༠༢༢ ཟླ་བ་ ༤ ཚེས་ ༢༥ ཉིན་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཀྲས་མཐོང་བསྟན་འཛིན་དབང་པོ་ལགས་ཀྱིས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་ལས་བྱེད་རྣམས་ལ་ཞུ་གཏུག་འཐབ་བྱུས་སྐོར་གོ་རྟོགས་སྤེལ་ཡོད།
དེ་ཡང་བཀྲས་མཐོང་བསྟན་འཛིན་དབང་པོ་ལགས་ཀྱིས་བོད་ཀྱི་ཁོར་ཡུག་དང་། ཤེས་ཡོན། འབྲེལ་ལམ། བོད་དོན་ཞུ་གཏུག་སོགས་ཀྱི་སྐོར་ཕྱག་ལས་གནང་བའི་ཉམས་མྱོང་གཞིར་བཞག་ཐོག་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་ལས་བྱེད་རྣམས་ལ་བོད་དོན་ཞུ་གཏུག་འཐབ་བྱུས་སྐོར་དང་། དེ་བཞིན་བཀའ་ཤག་སྐབས་བཅུ་དྲུག་པའི་ལས་འཆར་གསར་པ་དང་བླངས་བོད་དོན་ཞུ་གཏུག་ལས་འགུལ་གྱི་ཆ་ཤས་སུ་ཡུ་རོབ་རྒྱལ་ཁབ་ཁག་གི་ཆབ་སྲིད་ཀྱི་འགྲོ་སྟངས་དང་། བོད་དོན་ཞུ་གཏུག་ལས་འགུལ་ཕན་ནུས་ལྡན་པ་ཞིག་ཡོང་སླད་འཐབ་བྱུས་རག་ཟིན་འབྲི་སྟངས་སོགས་ཀྱི་སྐོར་གོ་རྟོགས་རྒྱ་ཆེ་སྤེལ་གནང་ཡོད་པ་བཅས།།
