༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁྱད་མཁས་མི་སྣ་དྲུག་ལས་གྲུབ་པའི་ཚོགས་པས་ཕྱི་ལོ་ ༢༠༢༢ ཟླ་བ་ ༠༢ ནང་རྒྱ་ནག་གཞུང་ལ་བཏང་བའི་ཡིག་འབྲེལ་ནང་རྒྱ་ནག་གཞུང་གིས་བོད་ཀྱི་རྩོམ་པ་པོ་བློ་བཟང་ལྷུན་གྲུབ་ལགས་དང་། གཞས་པ་ལྷུན་གྲུབ་གྲགས་པ་ལགས། དགེ་རྒན་རིན་ཆེན་སྐྱིད་ལགས་བཅས་བཙན་བཟུང་བཀག་ཉར་དང་གར་སོང་ཆ་མེད་བཏང་བར་བློ་འཚབ་དང་རྒྱ་གཞུང་ནས་རྒྱུ་མཚན་གསལ་བཤད་དགོས་པའི་རེ་འདུན་བཏོན་ཡོད་ཅིང་། ཡིག་ཆ་དེ་ཉིད་ཉེ་ལམ་མ་གཏོགས་ཕྱིར་བསྒྲགས་གནང་མེད།  འཛམ་གླིང་མཉམ་འབྲེལ་རྒྱལ་ཚོགས་ཀྱི་མཁས་པ་རྣམས་ཀྱིས་བོད་ནང་རྒྱ་ནག་གཞུང་གིས་འགྲོ་བ་མིིའི་ཐོབ་ཐང་རྡོག་རོལ་རྩིས་མེད་བཏང་བའི་གནས་ཚུལ་གསུམ་ཞིབ་ཕྲ་བཀོད་པ་དང་འབྲེལ་བོད་མི་རྣམས་ཀྱིས་རང་གི་ཆོས་དང་རིག་གཞུང་སྲུང་སྐྱོབ་བྱེད་པ་དང་། རྒྱ་གཞུང་གི་དབང་བསྒྱུར་ལ་སྐྱོན་བརྗོད་བྱེད་པར་ཉེས་འཛུགས་ཁྲིམས་གཅོད་བྱེད་པར་བློ་འཚབ་ཡོད་སྐོར་བཀོད་ཡོད། 

དེ་བཞིན་མཉམ་འབྲེལ་རྒྱལ་ཚོགས་ཀྱི་མཁས་པ་དྲུག་ཐུན་མོང་གི་ཡིག་འབྲེལ་ནང་རྒྱ་ནག་གཞུང་གིས་བོད་མི་རྩོམ་པ་པོ་བློ་བཟང་ལྷུན་གྲུབ་ལགས་དང་། གཞས་པ་ལྷུན་གྲུབ་གྲགས་པ་ལགས། དགེ་རྒན་རིན་ཆེན་སྐྱིད་ལགས་བཅས་ཀྱི་འཕྲོད་བསྟེན་གནས་བབ་དང་། ད་ལྟ་གང་དུ་ཡོད་མེད་གསལ་སྟོན་བྱེད་དགོས་པ་གསུངས་པ་མ་ཟད། བློ་བཟང་ལྷུན་གྲུབ་ལགས་དང་ལྷུན་གྲུབ་གྲགས་པ་ལགས་རྣམ་གཉིས་ཁྲིམས་ཀྱི་གཞི་རྩ་གང་ལ་བརྟེན་ནས་འཛིན་བཟུང་བྱས་ཡོད་པ་དང་། དེ་ཉིད་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་དང་འོས་མིན་སྐོར་འདྲི་རྩད་གནང་ཡོད། རིན་ཆེན་སྐྱིད་ལགས་ཀྱི་གནས་ཚུལ་དང་འབྲེལ་ནས་མཁས་པ་རྣམས་ནས་ཁོ་མོ་འཛིན་བཟུང་བཀག་ཉར་བྱ་རྒྱུའི་ཁྲིམས་ཀྱི་གཞི་རྟེན་གང་ཡིན་དང་། ཇི་ལྟར་ཁ་བྲལ་བརྒྱུད་སྐུལ་བྱེད་པའི་ཉེས་འཛུགས་དེ་ཉིད་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་དང་མཐུན་ཚུལ་རྒྱ་གཞུང་ནས་འགྲེལ་བརྗོད་བྱེད་དགོས་པར་གསུངས། 

བོད་མི་རྩོམ་པ་པོ་བློ་བཟང་ལྷུན་གྲུབ་ལགས་ནི། ཕྱི་ལོ་ ༢༠༡༩ ཟླ་བ་ ༠༦ ནང་སི་ཁྲོན་ཞིང་ཆེན་གྱི་ཁྲིན་ཏུ་གྲོང་ཁྱེར་ནང་གི་ཤེས་རིག་བསྟི་གནས་ཁང་ཞིག་ཏུ་ལས་ཀ་གཉེར་བཞིན་པའི་སྐབས་འཛིན་བཟུང་བྱས་ཡོད་པ་དང་། ཐོག་མའི་ཟླ་བ་བཅོ་བརྒྱད་རིང་ཉན་ཞིབ་མེད་པར་བཀག་ཉར་བྱས་པ་མ་ཟད་ནང་མི་ཉེ་འབྲེལ་ཡང་ཐུག་འཕྲད་བྱེད་འཇུག་མེད། ཕྱི་ལོ་ ༢༠༢༡ ལོར་རྒྱ་ནག་གི་ཁྲིམས་ཁང་ནས་གསང་བའི་ཉན་ཞིབ་བྱས་ཏེ་བློ་བཟང་ལྷུན་གྲུབ་ལགས་ལ་སྤྱི་ཚོགས་བདེ་འཇགས་དཀྲུགས་པ་ཞེས་པའི་ཉེས་འཛུགས་འོག་ལོ་བཞི་རིང་བཙོན་འཇུག་ཁྲིམས་ཐག་བཅད། མཉམ་འབྲེལ་རྒྱལ་ཚོགས་ཀྱི་མཁས་པ་རྣམས་ཀྱིས་རྒྱ་གཞུང་ལ་སྙན་ཐོ་ལྟར་ན། བོད་ཀྱི་རྩོམ་པ་པོ་བློ་བཟང་ལྷུན་གྲུབ་ལགས་འཛིན་བཟུང་བཙོན་འཇུག་བྱས་པ་དེ་ནི་ཁོང་གིས་བོད་ནང་རྒྱ་གཞུང་གི་དབང་བསྒྱུར་ལ་སྐྱོན་བརྗོད་ཀྱི་རྩོམ་ཡིག་བྲིས་པ་དང་། བོད་ཀྱི་ལོ་རྒྱུས་བསླབས་པ་དང་འབྲེལ་བ་ཡོད་སྐོར་གསུངས། བློ་བཟང་དོན་གྲུབ་ལགས་ནི་ཨ་མདོ་མགོ་ལོག་པདྨ་རྫོང་ནས་ཡིན་ཞིང་། བོད་ཀྱི་སྐད་ཡིག་དང་ལོ་རྒྱུས། ནང་ཆོས་སློབ་ཁྲིད་གནང་གི་ཡོད་པ་དང་། ཁོང་གིས་རྒྱུན་དུ་ནས་རྩོམ་ཡིག་འབྲི་གི་ཡོད་པ་མ་ཟད། ཚེ་སྲོག་ལས་སྐྲུན་པའི་སྐད་ཆ་དང་། བསྟུན་རྒོལ་ཁྲིམས་གཏུགས་ཞེས་པའི་དཔེ་དེབ་གཉིས་བརྩམས་གནང་འདུག 

བོད་ཀྱི་གཞས་པ་དོན་གྲུབ་གྲགས་པ་ལགས་ནི། བོད་ཀྱི་རྩ་དོན་དང་འབྲེལ་ནས་གཞས་རྩོམ་མཁན་ཞིག་ཡིན་ཞིང་། ཁོང་གིས་ཞྭ་མོ་ནག་པོ་ཞེས་པའི་གཞས་འགྲེམས་སྤེལ་གནང་རྗེས་ཕྱི་ལོ་ ༢༠༡༩ ཟླ་བ་ ༠༥ ནང་བོད་རང་སྐྱོང་ལྗོངས་ནག་ཆུ་གྲོང་ཁྱེར་འབྲི་རུ་རྫོང་གི་སྲིད་གཞུང་གིས་འཛིན་བཟུང་བྱས། ཁོང་གིས་བརྩམས་པའི་ཞྭ་མོ་ནག་པོ་ཞེས་པའི་གཞས་ནང་རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་གདུབ་རྩུབ་ཅན་གྱི་སྲིད་བྱུས་ལ་སྐྱོན་བརྗོད་གནང་ཡོད། ཁོང་འཛིན་བཟུང་བྱས་རྗེས་རྒྱུན་རིང་གཞན་ལ་འབྲེལ་ལམ་བྱ་རྒྱུ་མེད་པའི་བཀག་བསྐྱིལ་དང་། ཕྱི་ལོ་ ༢༠༢༠ ཟླ་བ་༠༦ ནང་ལོ་དྲུག་གི་དུས་བཀག་བཙོན་འཇུག་བྱས་ཡོད། 

རིན་ཆེན་སྐྱིད་ལགས་ཀྱིས་ཕྱི་ལོ་ ༢༠༢༡ ཟླ་བ་ ༠༧ ནང་ཨ་མདོ་མགོ་ལོག་དར་ལོག་རྫོང་ནང་ཡོད་པའི་སེང་འབྲུག་སྟག་རྩེ་འབྲིང་རིམ་སློབ་གྲྭ་བཙན་པོས་སྒོ་བརྒྱབ་པར་ཟས་བཅད་ངོ་རྒོལ་གནང་བར་བརྟེན་ཕྱི་ལོ་ ༢༠༢༡ ཟླ་བ་ ༠༨ ནང་ཁོ་མོར་ཁ་བྲལ་བརྒྱུད་སྐུལ་བྱས་པའི་ཉེས་འཛུགས་འོག་འཛིན་བཟུང་བྱས་ཡོད། དེ་རྗེས་ཁོ་མོ་མཚོ་སྔོན་ཞིང་ཆེན་གྱི་རྒྱལ་ས་ཤི་ནིང་ནང་གི་སྨན་ཁང་དུ་བསྐྱལ་ནས་བཞག་ཀྱང་ནད་རྟགས་གང་ཡང་ཐོན་མེད། ཁོ་མོའི་ནང་མིས་གནས་ཚུལ་ཐོས་འཕྲལ་སྨན་ཁང་དུ་འགྲོ་དུས་ཁོ་མོ་ཆ་རྒྱུས་མེད་པའི་ས་གནས་གཞན་ལ་སྤོས་ཟིན་ཞིང་། དེ་ནས་བཟུང་ཁོ་མོའི་འཕྲོད་བསྟེན་གནས་བབ་དང་གང་དུ་ཡོད་མེད་སོགས་ཤེས་རྟོགས་བྱུང་མེད། 

འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་མཁས་པ་དྲུག་ཐུན་མོང་གིས་བཏོན་པའི་ཡིག་ཆའི་ནང་བོད་མིའི་གནས་སྟངས་ནི་གཞིས་ལུས་བོད་མི་སྤྱི་དང་སྒོས་སུ་བོད་ཀྱི་སྐད་ཡིག་རིག་གཞུང་སྲུང་སྐྱོབ་ཆེད་ལས་འགུལ་སྤེལ་མཁན་དང་། རྒྱ་ནག་གཞུང་གི་བོད་ནང་གི་སྲིད་བྱུས་ལ་སྐྱོན་བརྗོད་བྱེད་མཁན་རྣམས་ཀྱིས་རྒྱུན་ལྡན་ནས་འཕྲད་བཞིན་པའི་དཀའ་ངལ་ཞིག་ཡིན། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་མཁས་པའི་དབང་ལྡན་བཀའ་ཁྱབ་ཡོད་པ་དྲུག་ནི་རིག་གཞུང་ཐོབ་ཐང་ཐོག་དམིགས་བསལ་སྙན་སེང་བ་དང་། ཁྲིམས་འགལ་བཀག་བསྐྱིལ་ཐོག་གི་མཐུན་ཚོགས། བཙན་བཀས་གར་སོང་ཆ་མེད་བཏང་བར་ཞིབ་འཇུག་མཐུན་ཚོགས། བསམ་ཚུལ་དང་སྨྲ་འདོད་རང་དབང་གོང་འཕེལ་དང་སྲུང་སྐྱོབ་ཐོག་དམིགས་བསལ་སྙན་སེང་བ། གྲངས་ཉུང་མི་རིགས་ཀྱི་གནད་དོན་ཐོག་དམིགས་བསལ་སྙན་སེང་བ་སོགས་ཡིན།།