༄༅། །ཕྱི་ལོ་ ༢༠༢༢ ཟླ་ ༤ ཚེས་ ༡༥ ནས་ ༡༨ བར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཆུ་དང་གཙང་འཕྲོད་ཚན་པ་དང་། རྡ་ས་བོད་མིའི་ས་གནས་འགོ་འཛིན་ལས་ཁུངས་གཉིས་ནས་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཁུལ་གྱི་ཁོར་ཡུག་གཙང་མ་ཡོང་སླད་སྲི་ཞུའི་ལས་བྱེད་རྣམས་ལ་གད་སྙིགས་སྐམ་རློན་དབྱེ་བ་འབྱེད་སྟངས་དང་གད་སྙིགས་དུས་ཐོག་དོས་འཁོར་ནང་སྐྱེལ་འདྲེན་བྱེད་སྟངས་སྐོར་གོ་རྟོགས་རྒྱ་ཆེ་སྤེལ་གནང་ཡོད།
དེ་ཡང་འདས་པའི་ལོ་ཤས་ནང་གངས་སྐྱིད་རྒྱལ་སྒོའི་གཡས་གཡོན་དུ་གད་སྙིགས་འབག་བཙོག་གི་དཀའ་ངལ་བྱུང་དང་འབྱུང་བཞིན་ཡོད་སྟབས། འཕྲོད་བསྟེན་ལས་ཁུངས་ཀྱི་ཟུང་དྲུང་བསྟན་འཛིན་ཀུན་བཟང་ལགས་དང་། རྡ་ས་བོད་མིའི་ས་གནས་འགོ་འཛིན་ཀུན་དགའ་ཚེ་རིང་ལགས། འཕྲོད་བསྟེན་ལས་ཁུངས་ཀྱི་ཆུ་དང་གཙང་འཕྲོད་ཚན་པའི་ལས་བྱེད་བསོད་ནམས་སྒྲོལ་མ་ལགས་དང་བསྟན་འཛིན་ཆོས་འཕེལ་ལགས་བཅས་ནས་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་། རང་དབང་ཅན་གྱི་སྡེ་ཚན། བོད་ཀྱི་དཔེ་མཛོད་ཁང་བཅས་ཀྱི་ལས་བྱེད་རྣམ་པ་དང་། དེ་བཞིན་གངས་སྐྱིད་ཁུལ་གྱི་ཟ་ཁང་དང་ཚོང་ཁང་གི་བདག་པོ་རྣམས་ལ་གད་སྙིགས་སྐམ་རློན་དབྱེ་བ་འབྱེད་སྟངས་དང་གད་སྙིགས་དུས་ཐོག་དོས་འཁོར་ནང་སྐྱེལ་འདྲེན་བྱེད་སྟངས་སོགས་ཀྱི་སྐོར་གོ་རྟོགས་རྒྱ་ཆེ་སྤེལ་གནང་ཡོད། གཙང་སྦྲ་འཕྲོད་བསྟེན་གོ་རྟོགས་ཀྱི་ལས་གཞིའི་ཆེད་དུ་ཨ་རིའི་རོགས་ཚོགས་ (PRM) ཞེས་པས་མཐུན་འགྱུར་རོགས་རམ་གནང་ཡོད་པ་བཅས།།
