༄༅། །ཕྱི་ལོ་ ༢༠༢༢ ཟླ་བ་ ༠༤ ཚེས་ ༡༣ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་གསར་རྙིང་བར་རྩིས་སྤྲོད་རྩིས་ལེན་ལེགས་པར་ཟིན་རྗེས་ཟུང་དྲུང་ལྷག་པ་སྒྲོལ་མ་ལགས་ཀྱིས་ས་གནས་འགོ་འཛིན་གྱི་ལས་ཁུར་དབུ་འཛུགས་གནང་ཡོད། 

དེ་ཡང་ས་འགོ་གསར་རྙིང་བར་གྱི་རྩིས་སྤྲོད་རྩིས་ལེན་ཕྱི་ལོ་ ༢༠༢༢ ཟླ་བ་ ༠༤ ཚེས་ ༡༢ དང་ ༡༣ བཅས་ཉིན་གྲངས་གཉིས་རིང་གནང་ཡོད་ཅིང་། སྐབས་དེར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་ལྷོ་སྤྱི་འཇིགས་མེད་ཚུལ་ཁྲིམས་ལགས་ངོ་ཕེབས་ཀྱིས་སྤྲོད་དཔང་གནང་། ཕྱི་ཚེས་ ༡༣ ཉིན་ཐོག་མར་སྐུ་མགྲོན་རྣམས་ལ་རྟེན་འབྲེལ་གསོལ་ཇ་འབྲས་སིལ་འདེགས་འབུལ་དང་། དེ་རྗེས་ས་གནས་འགོ་འཛིན་རྙིང་པར་ཐུགས་རྗེ་ལེགས་འབུལ་དང་གསར་པར་འཚམས་འདྲིའི་དཀར་གཙང་མཇལ་དར་ཕུལ་གྲུབ་མཚམས་ས་གནས་འགོ་འཛིན་གསར་རྙིང་དང་སྤྲོད་དཔང་བཅས་ནས་མང་ཚོགས་ལ་གསུང་བཤད་དང་། དེ་ནས་སློབ་གྲྭ་ཁག་དང་། རྒས་གསོ་ཁང་། ས་གནས་འཕྲོད་བསྟེན་སྨན་ཁང་བཅས་སུ་འཚམས་གཟིགས་ལ་ཕེབས་ཤིང་། ཉིན་རྒྱབ་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་། ས་གནས་འགོ་འཛིན་གསར་རྙིང་བཅས་ནས་ཀར་ཝར་རྫོང་གི་རྫོང་དཔོན་གཞོན་པ་དང་། ཉེན་རྟོག་སྤྱི་ཁྱབ་ལ་འཚམས་འདྲིའི་མཇལ་འཕྲད་ཞུ་བར་ཕེབས་ཡོད་པ་རེད། 

མོན་གྷོ་འདོད་རྒུ་གླིང་གི་ས་གནས་འགོ་འཛིན་ལྷག་པ་ཚེ་རིང་ལགས་སྒང་ཏོག་ས་གནས་འགོ་འཛིན་དུ་གནས་སྤོས་གནང་ཡོད་པ་བཅས།།