༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དེང་སྐབས་ཨ་རིའི་རྒྱལ་སའི་ཁུལ་དུ་གནད་ཡོད་མི་སྣར་མཇལ་འཕྲད་དང་ཚོགས་འདུར་མཉམ་ཞུགས། དེ་བཞིན་བོད་དོན་ཞུ་གཏུག་བཅས་གནང་བཞིན་ཡོད།

དེ་ཡང་ཟླ་འདིའི་ཚེས་ ༢༨ ཉིན་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་དང་མཇལ་འཕྲད་གནང་སྟེ་ཆུ་ཚོད་གཅིག་ལྷག་ཙམ་རིང་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་སྐོར་དང་བོད་དོན་དང་འབྲེལ་བའི་བཀའ་མོལ་གནང་ཡོད་པ་མ་ཟད། ཆུ་ཚོད་གཅིག་ཙམ་རིང་བོད་དོན་ཆེད་དམིགས་བསལ་ཚོགས་འདུ་ཚོགས་ཏེ་བོད་ནང་གི་ཛ་དྲག་གནས་སྟངས་ལས་སྐྱོབ་ཐབས་དང་། མ་འོངས་ལས་དོན་གནང་ཕྱོགས། དེ་བཞིན་མཉམ་ལས་བྱེད་ཕྱོགས་སོགས་ཀྱི་སྐོར་བཀའ་བསྡུར་གནང་ཡོད།

ཕྱོགས་མཚུངས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་མའི་ཀལ་མེག་ཀོལ་ (Michael McCaul) ལགས་དང་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་དང་ཨ་རིའི་གྲོས་ཚོགས་གོང་མའི་འཐུས་མི་ཇིམ་རི་ཤི་ (Jim Risch) ལགས། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་ (Patrick Leahy) ལགས། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མི་ནན་ཌེ་ཛི་ (Menendez) ལགས་དང་ལྷན་མཇལ་འཕྲད་གནང་ཡོད།དཔལ་ལྡན་སྲིད་སྐྱོང་མཆོག་དང་ལྷན་གདན་ས་བཀྲ་ཤིས་ལྷུན་པོའི་མཁན་རིན་པོ་ཆེ་གཟིག་རྒྱབ་རིན་པོ་ཆེ་མཆོག་དང་། རྒྱལ་སྤྱིའི་བོད་དོན་ལས་འགུལ་ཁང་གི་འཛིན་སྐྱོང་ལྷན་ཚོགས་ཀྱི་ཚོགས་གཙོ་དང་ཨ་རིའི་ཧོ་ལི་འུ་ཊི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རི་ཆ་ཌི་གྷེར་ (Richard Gere) ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས། བོད་མིའི་སྒྲིག་འཛུགས་ཀྱི་སྐུ་ཚབ་བཅས་ཕེབས་ཡོད།

དཔལ་ལྡན་སྲིད་སྐྱོང་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་མཆོག་དང་མཇལ་འཕྲད་གནང་རྗེས་ཊུ་ཝི་ཊར་བརྒྱུད་ལྕམ་སྐུ་ནེན་སི་པི་ལོ་སི་མཆོག་དང་མཇལ་འཕྲད་ཀྱི་གོ་སྐབས་བྱུང་བ་སྐལ་བ་བཟང་པོ་ཡིན། ཞེས་དང་། ལྕམ་སྐུ་མཆོག་གིས་རྒྱབ་སྐྱོར་གང་ཡོད་གནང་བར་ཐུགས་རྗེ་ཆེ་ཞེས་འཁོད་ཡོད་པ་རེད།།