༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕྱི་ལོ་ ༢༠༢༢ ཟླ་ ༤ ཚེས་ ༡༡ ཉིན་མན་སྤར་ཕན་བདེ་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་ས་གནས་འཐུས་ཚོགས་ཀྱི་ཚོགས་གཙོ་དང་ཚོགས་མི་རྣམ་པ། ས་གནས་འགོ་འཛིན། ས་གནས་རང་བདེན་ཚོགས་ཆུང་གི་ཚོགས་གཙོ་དང་ཚོགས་མི་རྣམ་པ། ས་གནས་གཞོན་ནུ་དང་བུད་མེད་ཚོགས་པའི་ཚོགས་མི་རྣམ་པ་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། 

དེ་ཡང་དཔལ་ལྡན་སྲིད་སྐྱོང་མཆོག་ས་གནས་སུ་འབྱོར་མཚམས་གཞིས་དགོན་ཁག་ཏུ་མཆོད་མཇལ་དང་། ས་གནས་འཐུས་ཚོགས་ཀྱི་ལས་ཁུངས་དང་ཚོགས་ཁང་། ས་གནས་འགོ་འཛིན་ལས་ཁུངས། ས་གནས་རང་བདེན་ཚོགས་ཆུང་གི་ལས་ཁུངས་དང་ཚོགས་ཁང་། མཉམ་འབྲེལ་ལས་ཁུངས། གཞིས་སློབ་དང་ཉལ་ཁང་། ཡན་ལག་སྨན་རྩིས་ཁང་། ས་གནས་འཕྲོད་བསྟེན་སྨན་ཁང་། རྒས་གསོ་ཁང་། ས་གནས་ལྷ་མོ་ཚོགས་པའི་ཚོགས་ཁང་། རླངས་རྫས་ལས་ཁང་། ཆུ་བཟོ་ཁང་། འཕྲུལ་བཟོ་ཁང་། དེ་བཞིན་གཞིས་གྲོང་ཁག་ཏུ་གཟིགས་སྐོར་གནང་ཡོད། སང་ཉིན་ཏེ་ཕྱི་ཚེས་ ༡༢ ཉིན་གྱི་སྔ་དྲོར་དཔལ་ལྡན་སྲིད་སྐྱོང་མཆོག་གིས་གཞིས་མི་རྣམས་ལ་གསུང་བཤད་དང་དྲི་བ་དྲིས་ལན་གནང་རྒྱུ་ཡིན་པ་མ་ཟད། གཞོན་སྐྱེས་ཁག་གཅིག་དང་ཟུར་དུ་བཞུགས་མོལ་ཚོགས་འདུ་འཚོགས་གནང་རྒྱུ་ཡིན་ཞིང་།  ཕྱི་དྲོ་མན་སྤར་ནས་བྷན་རྡ་ར་ནོར་རྒྱས་གླིང་བོད་མིའི་གཞིས་ཆགས་སུ་ཕྱོགས་ཕེབས་གནང་རྒྱུ་ཡིན་པ་བཅས།།