༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་རྒྱ་གར་ནང་ཡོད་པའི་ས་གནས་བོད་མིའི་འཕྲོད་བསྟེན་སྨན་ཁང་དང་སྨན་ཞབས་པ་སོགས་ནས་འཛམ་གླིང་འཕྲོད་བསྟེན་ཉིན་མོ་སྲུང་བརྩི་གཟབ་རྒྱས་ཞུས་ཡོད།
དེ་ཡང་ར་ཝང་ལ་ཀུན་ཕན་གླིང་བོད་མིའི་གཞིས་ཆགས་སུ་སྨན་ཞབས་པ་སངས་སྒྲོལ་དཀར་ལགས་ཀྱིས་སཾ་བྷོ་ཊ་སློབ་གྲྭར་སློབ་ཕྲུག་གྲངས་ ༤༢ དང་། སློབ་ཕྲུག་གི་ཕ་མ་རྣམས་ལ་ཕྲུ་གུའི་གཟུགས་པོའི་འཚར་ལོངས་དང་འཕྲོད་བསྟེན་ལ་ལྟ་སྐྱོང་གནང་དགོས་པའི་གལ་གནད་སྐོར་གཏམ་བཤད་གནང་གནང་ཡོད།
ཕྱོགས་མཚུངས་ལ་ཁན་ཝ་ལ་བོད་མིའི་གཞིས་ཆགས་སུ་ས་གནས་འགོ་འཛིན་ཚུལ་ཁྲིམས་རྡོ་རྗེ་ལགས་ཀྱིས་གཙོས་སྐུ་མགྲོན་རྣམ་པ་དང་། ས་གནས་མི་མང་བཅས་ནས་འཛམ་གླིང་འཕྲོད་བསྟེན་ཉིན་མོ་སྲུང་བརྩི་གཟབ་རྒྱས་ཞུས་ཡོད་པ་མ་ཟད། སྨན་ཞབས་པ་བཀྲ་ཤིས་བསམ་གྲུབ་ལགས་ཀྱིས་ང་ཚོའི་གོ་ལ་དང་ཁྱིམ་གཞིས་ཞེས་པའི་བརྗོད་གཞིའི་ཐོག་གཏམ་བཤད་དང་ཁྲག་ཤེད་མཐོ་བའི་ནད་རིགས་དང་ཟ་ཁུ་གཅིན་སྙིའི་ནད་གཞི་སོགས་ཀྱི་སྐོར་གཏམ་བཤད་གནང་ཡོད།
དེ་བཞིན་ཀྲུ་ཀྲིང་དུ་སྨན་ཞབས་པ་སངས་རྒྱས་ལྷ་མོ་ལགས་ཀྱིས་གཙང་སྦྲ་འཕྲོད་བསྟེན་གྱི་གལ་གནད་སྐོར་གཏམ་བཤད་གནང་ཡོད། སྐབས་དེར་ས་གནས་ཀྱི་ཁྲག་ཤེད་མཐོ་བའི་ནད་པ་དང་ཟ་ཁུ་གཅིན་སྙིའི་ནད་པ་སོགས་མཉམ་ཞུགས་གནང་ཡོད། གཞན་ཡང་མེའོ་ཆོས་འཕེལ་གླིང་དུ་ས་གནས་འཕྲོད་བསྟེན་སྨན་ཁང་གི་དྲུང་ཆེ་ལྷ་དབང་ལགས་ཀྱིས་སྣེ་ཁྲིད་འོག་ས་གནས་འཕྲོད་བསྟེན་སྨན་ཁང་གིས་མི་རེ་ངོ་རེས་གཙང་སྦྲ་འཕྲོད་བསྟེན་གནང་དགོས་པའི་གལ་གནད་སྐོར་གཏམ་བཤད་དང་ལས་འགུལ་སྤེལ་ཡོད།
བཀྲ་ཤིས་ལྗོངས་བོད་མིའི་གཞིས་ཆགས་སུ་སྨན་ཞབས་བདེ་སྐྱིད་དཔལ་འཛོམས་ལགས་ཀྱིས་ལོ་ན་ ༥༠ ཡན་གྱི་མི་གྲངས་ ༢༥ ཙམ་ལ་ཁྲག་ཤེད་མཐོ་བའི་ནད་གཞི་དང་དེའི་འབྱུང་རྐྱེན། ནད་རྟགས། སྨན་བཅོས་སོགས་སྐོར་གཏམ་བཤད་གནང་ཡོད་པ་དང་། སྦན་ད་ར་ནོར་རྒྱས་གླིང་དུ་ས་གནས་འཕྲོད་བསྟེན་སྨན་ཁང་གིས་གཟུགས་པོའི་ལྗིད་ཚད་སྟངས་འཛིན་གནང་ཕྱོགས་དང་། ཟས་སྤྱོད་བསྟེན་སྟངས་ཀྱི་གལ་གནད་སྐོར་གཏམ་བཤད་གནང་ཡོད་པ་མ་ཟད། རིན་མེད་ཐོག་ཁྲག་ཤེད་དང་ཟ་ཁུ་གཅིན་སྙི་ཡོད་མེད་སྐོར་བརྟག་དཔྱད་གནང་ཡོད།
ཌོ་ལན་ཇི་བོན་གཞིས་སུ་སྨན་ཞབས་ལྷག་པ་བུ་འཁྲིད་ལགས་ཀྱིས་བོན་ཕྲུག་ཁྱིམ་སྡེའི་ཕྲུ་གུ་གྲངས་ ༨༠ ཙམ་ལ་འཛམ་གླིང་འཕྲོད་བསྟེན་ཉིན་མོ་སྲུང་བརྩི་གཟབ་རྒྱས་ཞུ་དགོས་པའི་གལ་གནད་སྐོར་གཏམ་བཤད་གནང་ཡོད། མཚོ་པདྨ་ཁུལ་དུ་སྨན་ཞབས་སྲི་ཐར་ཚེ་རིང་ལགས་ཀྱིས་ཟས་སྤྱོད་བསྟེན་སྟངས་དང་། གཟུགས་པོའི་ལྗིད་ཚད་སྟངས་འཛིན་བྱེད་སྟངས། སེམས་ཀྱི་འཕྲོད་བསྟེན་བཅས་ཀྱི་གལ་གནད་སྐོར་གཏམ་བཤད་གནང་ཡོད།
ཨོ་ཌི་ཤཱ་ཕུན་ཚོགས་གླིང་བོད་མིའི་གཞིས་ཆགས་སུ་སྨན་ཞབས་གསུམ་གྱིས་སློབ་ཕྲུག་གྲངས་ ༡༧༠ ཙམ་གྱི་གཟུགས་པོའི་ལྗིད་ཚད་བརྟག་དཔྱད་གནང་ཡོད། བདེ་སྐྱིད་གླིང་བོད་མིའི་གཞིས་ཆགས་སུ་ས་གནས་འཕྲོད་བསྟེན་སྨན་ཁང་གིས་མི་གྲངས་ ༥༠ ལ་ཟ་ཁུ་གཅིན་སྙི་ཡོད་མེད་བརྟག་དཔྱད་དང་། མི་གྲངས་ ༥༤ ལ་ཁྲག་ཤེད་ཡོད་མེད་སྐོར་བརྟག་དཔྱད་གནང་ཡོད། ཧོན་སུར་རབ་རྒྱས་གླིང་བོད་མིའི་གཞིས་ཆགས་སུ་ས་གནས་འཕྲོད་བསྟེན་སྨན་ཁང་གི་སྨན་པ་བསྟན་འཛིན་ཆོས་ཉིད་ལགས་ཀྱིས་ས་གནས་སྤྱི་ཁང་དུ་མི་མང་འདུ་འཛོམས་ཐོག་ཁྲག་ཤེད་དང་ཟ་ཁུ་གཅིན་སྙིའི་སྐོར་གཏམ་བཤད་གནང་ཡོད།
ལ་དྭགས་ཁུལ་དུ་འཛམ་གླིང་འཕྲོད་བསྟེན་ཉིན་མོ་སྲུང་བརྩི་ཞུས་པ་དང་འབྲེལ་གཙང་སྦྲ་འཕྲོད་བསྟེན་དང་། མྱོས་རྫས་ལོག་སྤྱོད། ཁོར་ཡུག་གཙང་སྦྲ་སོགས་ཀྱི་གལ་གནད་སྐོར་གྲོས་བསྡུར་གནང་ཡོད། འབྲས་ལྗོངས་ཀྱི་རྒྱལ་ས་སྒང་ཐོག་ཏུ་སྨན་ཞབས་བདེ་ཆེན་ལགས་གྱིས་བོད་ཀྱི་གསོལ་མགྲོན་ཁང་གི་ལས་བྱེད་རྣམས་ལ་ཁྲག་ཤེད་ཡོད་མེད་བརྟག་དཔྱད་གནང་ཡོད། ཁེ་ར་བོད་མིའི་གཞིས་ཆགས་སུ་གཙང་སྦྲ་འཕྲོད་བསྟེན་དང་། ཁྲག་ཤེད་མཐོ་བའི་ནད་གཞི། ཟ་ཁུ་གཅིན་སྙི་སྐོར་གོ་རྟོགས་དང་། དེ་བཞིན་སྔོན་འགོག་དང་སྨན་བཅོས་སོགས་ཀྱི་སྐོར་གོ་རྟོགས་སྤེལ་ཡོད། སྦིར་ཁུལ་དུ་འཛམ་གླིང་འཕྲོད་བསྟེན་ཉིན་མོར་གཟུགས་པོའི་འཕྲོད་བསྟེན་བདེ་ཐང་ཡོང་བར་དམིགས་ཏེ་རྒྱང་རྒྱུག་གི་ལས་རིམ་ཞིག་གོ་སྒྲིག་ཞུས་ཡོད། མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་ས་གནས་སྨན་ཁང་གི་སྨན་ཞབས་པའི་འགན་འཛིན་བསྟན་ཆོས་ལགས་ཀྱིས་གཙོས་ཕྱག་རོགས་རྣམ་པས་རྒན་གསོ་ཁང་དུ་རྒན་རྒོན་གྲངས་ ༥༦ ལ་ཁྲག་ཤེད་ཡོད་མེད་བརྟག་དཔྱད་གནང་ཡོད། ལྡི་ལི་ནས་ས་གནས་མང་ཚོགས་ལ་ཁྲད་ཤེད་ཡོད་མེད་བརྟག་དཔྱད་དང་། གཟུགས་པོའི་ལྗིད་ཚད་བརྟད་དཔྱད་གནང་ཡོད།
ཌལ་ཧོར་ཕུན་ཚོགས་གླིང་དུ་སྨན་ཞབས་བཀྲ་ཤིས་མཚོ་མོ་ལགས་ཀྱིས་ས་གནས་བོད་མིའི་མི་ཚང་རེ་རེའི་སྒོ་ཁར་ཕེབས་ཏེ་འཕྲོད་བསྟེན་སྐོར་གོ་རྟོགས་སྤེལ་ཡོད། སྤུ་རུ་ཝ་ལ་ས་སྐྱ་གཞིས་ཆགས་སུ་སྨན་ཞབས་ཚེ་རིང་དབྱངས་འཛོམས་ལགས་ཀྱིས་ང་ཚོའི་གོ་ལ་དང་ཁྱིམ་གཞིས་ཞེས་པའི་བརྗོད་གཞིའི་སྐོར་གཏམ་བཤད་དང་། དེ་བཞིན་ཁྲག་ཤེད་མཐོ་བའི་སྐོར་གཏམ་བཤད་གནང་ཡོད།
ཀོ་ལི་གྷལ་དོན་ལྡན་གླིང་དུ་སྨན་པ་དབང་ཕྱུག་ལགས་ཀྱིས་ལུས་སེམས་ཀྱི་འཕྲོད་བསྟེན་དང་། ཁྲག་ཤེད་མཐོ་བའི་ནད་གཞི་སོགས་ཀྱི་སྐོར་གཏམ་བཤད་གནང་ཡོད། མན་སྤར་ཕན་བདེ་གླིང་དུ་ས་གནས་འཕྲོད་བསྟེན་སྨན་ཁང་གིས་བུད་མེད་རྣམས་ཀྱི་འཕྲོད་བསྟེན་ལ་དམིགས་ཏེ་ཞབས་བྲོ་གོ་སྒྲིག་གནང་ཡོད་པ་མ་ཟད། སྨན་ཞབས་པ་རྣམས་མི་ཚང་རེ་རེའི་སྒོ་ཁར་ཕེབས་ཏེ་ཁྲག་ཤེད་མཐོ་བའི་ནད་གཞི་དང་ཟ་ཁུ་གཅིན་སྙི། དེ་བཞིན་ནད་གཞི་དེ་དག་སྔོན་འགོག་དང་སྨན་བཅོས་སོགས་ཀྱི་སྐོར་གོ་རྟོགས་སྤེལ་ཡོད་པ་བཅས།།
