༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨོ་ཌི་ཤཱ་ཕུན་ཚོགས་གླིང་དུ་འཚམས་གཟིགས་ཉིན་དང་པོ་སྟེ། ཕྱི་ལོ་ ༢༠༢༢ ཟླ་ ༤ ཚེས་ ༩ ཉིན་གྱི་སྔ་དྲོར་ས་གནས་ཀྱི་རྟེན་མཁར་མཇལ་ཁ་དང་། ས་གནས་འཐུས་ཚོགས་ཀྱི་ལས་ཁུངས་དང་ཚོགས་ཁང་། ས་གནས་འགོ་འཛིན་ལས་ཁུངས། མཉམ་འབྲེལ་ལས་ཁུངས་དང་ཆུ་བཟོ་ཁང་། ལྕགས་བཟོ་ཁང་། རྩམ་ཐག་ཁང་། ཚོང་ཁང་། རྒས་གསོ་ཁང་། ཡན་ལག་སྨན་རྩིས་ཁང་། ས་གནས་འཕྲོད་བསྟེན་སྨན་ཁང་བཅས་སུ་གཟིགས་སྐོར་གནང་ཡོད་པ་མ་ཟད། བདེ་ཆེན་ཆོས་འཕེལ་གླིང་དང་། ཨོ་རྒྱན་ཐེག་མཆོག་གླིང་། བདུད་འདུལ་རབ་བརྟན་གླིང་། བཙུན་དགོན་ནམ་མཁའ་ཁྱུང་རྫོང་། རི་དགོན་ཐུབ་བསྟན་སྨིན་གྲོལ་གླིང་། གནས་རྡོ་ཨོ་རྒྱན་ཐེག་མཆོག་གླིང་བཅས་སུ་མཆོད་མཇལ་ཞུས་ཡོད།དེ་ཡང་གོང་ཚེས་ཉིན་གྱི་ཕྱི་དྲོར་དཔལ་ལྡན་སྲིད་སྐྱོང་མཆོག་གིས་གཞིས་ཆགས་ཀྱི་གཞོན་སྐྱེས་གྲངས་ ༣༠ ཙམ་དང་ལྷན་ཟུར་དུ་མཇལ་འཕྲད་ཀྱིས་དྲི་བ་དྲིས་ལན་གནང་བ་དང་འབྲེལ་རང་རེའི་གཞིས་ཆགས་ཁག་སྲ་བརྟན་ཡོང་ཐབས་སུ་ས་གནས་སུ་ཡོད་པའི་གཞོན་སྐྱེས་རྣམས་ནས་འགན་འཁུར་དང་མཉམ་ཞུགས་གནང་དགོས་པའི་གལ་གནད་སྐོར་གསུངས་པ་མ་ཟད། གཞོན་སྐྱེས་རྣམས་ཀྱིས་ལག་ཤེས་སློབ་སྦྱོང་དང་སྦྱོང་བརྡར་བྱེད་རྒྱུ་ཤིན་ཏུ་གལ་ཆེན་པོ་ཡིན་པའི་སྐོར་དང་། གཞིས་ཆགས་སུ་ཚོང་ལས་ཀྱི་ལས་འཆར་གསར་པ་བརྩམ་རྒྱུར་ཚོང་ལས་དེས་ཕུགས་ཕན་ཇི་ཙམ་ཡོད་མེད་དང་། སྤྱི་སྒེར་ཚང་མར་ཕན་རླབས་ཇི་ཙམ་ཡོད་མེད་སོགས་ཀྱི་སྐོར་ཉམས་ཞིབ་དང་བསམ་བློ་ཡག་པོ་གཏོང་དགོས་པ། ལས་འཆར་ཡག་པོ་ཡོད་ཚེ་བོད་མིའི་སྒྲིག་འཛུགས་ནས་བུན་གཡར་སོགས་གནང་རྒྱུའི་དགོངས་པ་ཡོད་ཚུལ་སོགས་གསུངས།

གཞན་ཡང་དཔལ་ལྡན་སྲིད་སྐྱོང་མཆོག་གིས་གཞིས་མི་རྣམས་ལ་དགུན་དུས་སུད་ཚོང་སྐབས་ཚོང་སའི་དཀའ་ངལ་དང་། དེ་བཞིན་ཕྲུ་གུ་རྣམས་ལ་སྐྱབས་བཅོལ་ལག་དེབ་གསར་བཟོའི་དཀའ་ངལ་སེལ་ཐབས་དང་། ཚོང་ས་ཐོབ་ཐབས་སུ་ལྡི་ལིར་ཡོད་པའི་འཕགས་བོད་འབྲེལ་མཐུད་ལས་ཁུངས་སུ་ལས་བྱེད་བཀོད་སྒྲིག་གནང་རྒྱུ་བཅས་ཀྱི་སྐོར་གསུངས།ཕྱི་ཚེས་ ༡༠ ཉིན་གྱི་སྔ་དྲོར་དཔལ་ལྡན་སྲིད་སྐྱོང་མཆོག་གིས་ལ་རྒྱབ་ཏུ་ཡོད་པའི་ཞིང་སར་གཟིགས་སྐོར་གནང་གྲུབ་མཚམས་སཾ་བྷོ་ཊའི་སློབ་གྲྭ་གཉིས་སུ་འཚམས་གཟིགས་དང་། སློབ་ཕྲུག་དང་དགེ་ལས་ལྷན་བཞུགས་མོལ་ཚོགས་འདུ་ཚོགས་གནང་ཡོད། དེ་རྗེས་གཞིས་མི་རྣམས་ལ་གསུང་བཤད་དང་། དེ་བཞིན་དྲི་བ་དྲིས་ལན་གནང་བར་ཐོག་མར་ས་གནས་འགོ་འཛིན་བསྟན་འཛིན་དགེ་ལེགས་ལགས་ཀྱིས་ངོ་སྤྲོད་གསུང་བཤད་དང་ལས་བསྡོམས་སྙིང་བསྡུས་སྙན་སྒྲོན་ཞུས་རྗེས་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན། སྲིད་སྐྱོང་གི་འགན་འཁྱེར་བའི་རྗེས་ལ་དྭགས་ཁུལ་དང་། ཀ་རྡོར་སྒང་གསུམ། ཨུཏྟརཱ་ཁནྜ་ཁུལ་གྱི་བོད་མིའི་གཞིས་ཆགས་བཅས་སུ་གཟིགས་སྐོར་གནང་ཟིན་པ་དང་། ད་ལྟ་ཨོ་རི་ས་དང་། མན་སྤར། བྷན་རྡ་ར་བཅས་སུ་གཟིགས་སྐོར་གནང་རྒྱུ་ཡིན་པ། རིང་མིན་ཕྱི་ཟླ་དྲུག་པ་ནང་ཚུན་རྒྱ་གར་བྱང་ཤར་ཁུལ་གྱི་བོད་མིའི་གཞིས་ཆགས་དང་། ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་བཅས་པར་གཟིགས་སྐོར་གནང་འཆར་ཡོད་པའི་སྐོར་དང་། དེ་རྗེས་དཔལ་ལྡན་སྲིད་སྐྱོང་མཆོག་ནས་བཀའ་ཤག་གི་འདས་པའི་ཟླ་གྲངས་བཅུའི་རིང་ལས་དོན་ཇི་གནང་སྐོར་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བའི་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱ་གྲོས་མོལ་དང་བོད་རྒྱ་གཉིས་ཀྱི་དཀའ་རྙོག་སེལ་ཐབས་གནང་རྒྱུ་ཡིན་པ། དེ་དང་འབྲེལ་ཐབས་བྱུས་འཆར་འགོད་ཚོགས་ཆུང་གསར་འཛུགས་གནང་བ། བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་ཀྱི་སྲི་ཞུའི་ལས་བྱེད་ཀྱི་ས་མིག་སྒྲོམ་གཞི་བསྐྱར་སྒྲིག་གནང་བ། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པ་རྣམས་ཀྱི་བླང་དོར་དང་། ཐོབ་ཏང་གི་སྒྲིག་གཞིར་བསྐྱར་བཅོས་གནང་བ་སོགས་ཀྱི་སྐོར་གསུངས།ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་རྒྱ་གར་གཞུང་མང་གཉིས་ནི་རང་རེའི་བོད་མི་རྣམས་ལ་ཧ་ཅང་བཀའ་དྲིན་ཆེན་པོ་ཡིན་པ་དང་། གཞིས་མི་རྣམས་ནས་དུས་རྒྱུན་དུ་ཡུལ་མི་དང་ལྷན་འཆམ་མཐུན་དགོས་རྒྱུ་ཧ་ཅང་གལ་ཆེན་པོ་ཡིན་པ། དེ་བཞིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནི་བོད་མི་རྣམས་ལ་མཚོན་ན་བཀའ་དྲིན་ཤིན་ཏུ་ཆེན་པོ་ཡིན་སྟབས། མགོན་པོ་གང་ཉིད་མཆོག་གི་དགོངས་གཞི་དང་ལམ་སྟོན་འོག་བོད་མི་ཚང་མས་ཤར་བསྐྱོད་གནང་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་གྲུབ་མཚམས་མང་ཚོགས་ཀྱི་དྲི་བར་བཀའ་ལན་ཞིབ་རྒྱས་གནང་ཡོད། ཨོ་ཌི་ཤཱ་ཕུན་ཚོགས་གླིང་དུ་འཚམས་གཟིགས་ལེགས་པར་གྲུབ་རྗེས་ཉིན་རྒྱབ་དཔལ་ལྡན་སྲིད་སྐྱོང་མཆོག་མན་སྤར་ཕན་བདེ་གླིང་བོད་མིའི་གཞིས་ཆགས་སུ་ཕྱོགས་ཕེབས་གནང་ཡོད་བཅས། །